61
Amisye anajo indamu Po akari titi ayaranande
1 Masmur Daud po ratoe. Nto irati akari po vatano matayao ukiny maugavo ransyerane rai ai. Ukinyo rai, wo itari raeyan dai.
2 Sya Amisy, syo winawain ti syare Nyo rinaraniv,
syare Nyo sya ana danajo ore ranaun!
3 Nai munijo nggwaravainy syo Amisye winawain,
weye inanuga so mayondi rave.
Syare Nyo rinaugav to no unato oram ntiti rai.
4 Weye tugae, Winyirati syakaore gaugambe Nai,
maisyare soero mbambunin no rinaora irati sya marova mai.
5 Syare koveamo ride tutir no Nya randumo sambaya raija ntoa nuge nuganui,
indamu rino mariraave no kovo saumane rai,
maisyare mangkuere tuvane gaugambe akoe ama pepak ate rai wemaisy.
6 Tugae, sya urairi syo raokae Amisy Winai mamo Nyo raraniv to,
muno Nya kovo Nyo ratayao mamo Nyo raunande rinai to,
namirati Nyo raunande vatan tenambe wo nasyanive mai indamu awa ura rai tawan.
7 Syare Nyo reama akari titi ayaranande indamu apa matame nggwaravainy,
muno apa be akarive raugakaje apa susyo miridi nto mai indamu utantuna rai tutir kobe.
8 Amisy, syare reama akari titi apa be akarive ntoa nuge nuganui no winanem ate rai.
Winyamo Nya muinye no tawan muno winteto Nya urairi rai,
weti syare Nyo reama akari titi ayaranande.
9 Weamo indati sya urairi syo raokaisyo Amisy Winai to mamo masyote anteter syo raveti mamaisy,
muno indati rikinyo ransyeran kangkamane raijo Nya tame rai tutir.