58
Amisye anajo indamu Po mangke raugaje akari mamune mai
1 Daud apa ransyerano Masmur po ratoe. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Vemo wapo vatane maupaisy inya.’’
2 Inya, akari weap, wapa ana wadapatimu mamo mamaisyo Amisye Apa ananyao rai jivae e?
Mangke wapo rapatimu irati vatane mai mamo moyar ivae e?
3 Jewena! Weapa ana wadatantona no wasanuga wato mamo ana ngkakainoanive obo mi no wasai,
muno wapo vatane manepati tatugadi vayave no munije so.
4 Akari umaso nanawamo arono mano aje we ndea naisoamo makirive Amisye Ai,
muno aarurijate obo mirati no mai arono mansano aje we ndea naiso.
5 Wenanawamo mamun dave maisyare tawae mamune ramaisy,
muno wonae wo ananyao raranivi,
maisyare tawae mamuno ngkokobe kakai wemaisy.
6 Weti wenawamo maisyare tawae mo vatano pare danyao da ngkokobe apa anamote raranive jewen,
muno mo vatano po marandine raugaje rai aranive jewene wemaisy.
7 Sya Amisy, syare Nyo mapinde maisyare singa apa atomokano nsiu radaute wemaisy!
AMISY, syare Nyo mapinde maisyare singa kamuramo usivuiny dave awa matomokane rapapatine wemaisy.
8 Syare koveamo akari mamun umaso maumandita maisyare mana ama wayo nsaonto ti raumandi wemaisy,
muno syare koveamo wenawamo mayondi maisyare insumaijo mayone wemaisy.
9 Syare koveamo wenawamo maumandita maisyare kangkinu baibindi, sanun ti pewene wemaisy,
muno maisyare arikainyo kakai no akoeya ranobon arono avaki rainy weti po vare raene jewen.
10 Avave mangke raugaje mai maisyare anomano ntuna tanamo mbadurure rai weti kavuratawe mamoan dave.
Syare avave da maupaeta maisyare ininai ugo ngkanen weti ovare damawisyamo rakaniveta.
11 Indati vatano ubeta Amisye Ai nanawamo manayanambe arono wo raen Amisye Po mangke rasakinavo vatano mamune mai.
Umba vatano kove wo vatano mamune awa mavu ratakadi muno usuijo rai.
12 Indati vatane wo raura ware:
‘‘Tugae ivae, vatano ubeta Amisye Ai nanawamo Amisye Po kove ratayao mai.
Muno Amisye no tugae ivae, Wepi Po ayao mamaisye rapatimu vatano mine so mai.’’