57
Amisye anajo indamu aemeno wansai arono marova wo wansawatan
1 Daud apa ransyerano Masmur po ratoe, arono Saul po awatan ti sarar to no no tinda ama uga. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Vemo wapo vatane maupaisy inya.’’
2 Sya Amisy, naemeno rinai, syare naemeno rinai,
weye Winyirati inamamavube Nai.
Rigaugambe Nai jao ntoa ana nde ti mare mo inakupi so nde nto ra rakanive rati,
maisyare mangkuere tuvane gaugambe irati akoe ama pepak ate rai wemaisy.
3 Syo Amisy Titi Rave awain,
syo Amisy anajo indamu Apa bekere mirati mamaisyo rinai.
4 Nai Manunggara, Po rinasopan muno Po rinapaya irati sya marova mai,
Po vatano wo rinatawanto mapinde.
Amisye pamo teto Apa urairi rai tutir,
muno Apa muinye mamo no tawano rinai.
5 Rino no no sya marova awa yasyine rai,
onawamo maisyare make sivuiny wo vatane maubaisy wemaisy.
Matomokane nsiu dave maisyare weyam muno ato nsasiu dave wemaisy,
muno mansaunane mamo mo inaveti inanuga njoram.
6 Sya Amisy, syare Nya ntiti rave raroron no naume warae,
muno Nya kovo ntiti raroron no mine tename so rai.
7 Sya marova manatantonave rinai, maisyare wo isyeane ratugar ti mo inamane wemaisy,
weti inanuga mamaun.
Wo ateme rawae ti mo inaman no sya unanui idaito rai,
weramu taune nawirati wakata utatae asyo rai.
8 Inanuga so ntindimu sya Amisye Winai, inanuga so ntindimu Nai.
Syare rikinyo ransyerane rai, rikangkamambe Nai.
9 Inya, syare ibeseo, syo itari anakoe muno itari mamaune raeyan,
rikiny no arono akane mare ntipu kobe.
10 Sya Akoe, Winyirati syare syo kove raura seo Nai no vatan tenambe so awa yasyin,
syare rikinyo ransyeran kangkamane raijo Winai no susye kotaro mine so awa yasyin.
11 Weye Nya muinyo no tawane mamo ntitito no naume warae,
muno winteto Nya urairi rai mamo nto rave ti mo kamure rakivan.
12 Sya Amisy, syare Nya ntiti rave raroron no naume warae,
muno Nya kovo ntiti raroron no mine tename so rai.