44
Susyo matawanto awa anonae
1 Ransyerano ananyao susyo Kora wo ratoe. Nto irati akari po vatano matayao ukiny maugavo ransyerane rai ai.
2 Tugae Amisy, anainamo ndarorono reama aneno sinane mai,
no arono wusyinoe,
omamo wo rarire reansai ti,
taune reamo ranauno reansamarikoame rai to.
3 Taune Nya nanemo vambunine mirati Nyo veano susyo wanave Nai jewene mawatano kopa so rai,
indamu Nya kawasae wakasisa utantuna rai.
Susye kotaro kaije nawamo Nyo kakai raugaje mai,
yara Nya kawasae nawamo Nyo maveti ubambunin.
4 Weye Nya kawasae awa omake mirati mbewar, wo kopa so raugavo mansamaroma jewen,
muno taune awa vambunine mirati mo anasine ugavo maija jewen tavon.
Yara Winya vambunine mi no mai muno Nya kove mbaro mai omirati mbewar utantuna rai,
weye winanuga no irati mai.
5 Winyirati sya Amisy muno sya Akari Titi,
anasineko mamo Winyirati Nyo rapatimu Yakop apa susye mai.
6 Nya vambunine mirati reamo veano marova maroyar ti makanive,
muno Nya tame mirati mbewar reamo vatano umarovave reansai mataka doyadi.
7 Weye sya apae, atoe mirati sya vambunine nsawa raija jewen,
muno sya omake mamo mo anasine ugavo rinai ramu.
8 Yara Winyirati Nyo reansapaya irati reama marova mai,
muno Nyo vatano manuga mamuno reansai maveti usamane.
9 Weti masyote anteter reamo Amisye winararimbe,
muno Nya tame mi reangkangkamambe raija ntoa nuge nuganui.
10 Weramu soamo winaijaro reama naite matavon da wata marova rai akatoe ramu,
yara winakirive reansai muno naneme mpaya reansai ti reansamane.
11 Winaneme mpaya reansai ti marova wo reansakupire ti reamansuk akiri,
muno vatano manuga mamuno reansai wo reama ananu raowen ti mewen.
12 Winyo reansapaya ti marova wo reansaubaisy, maisyare domba maotare wemaisy,
muno Nyo reansampusyek ti reanta na no susye kotaro wanave jewene awa yasyin.
13 Winyo Nya kawasae reansamavunta mawebe vayave,
muno ama kove inta makare Nai ramu.
14 Winaneme mpaya reansai ti susyo una reansakijani wo reansampami,
wugoeno reansai muno wo reansaura tantunawi.
15 Winaneme mpaya reansai ti susye kotaro wanave Amisye Ai jewene wugoeno reansai;
onawamo mansakari rangkiki reansai.
16 Masyote tename omamo wo reansave samaneve,
weti reansamane dave tutir.
17 Weye reamo ranaun, vatano mansanuga mamuno reansai muno umarovave reansai
wo reansaura tantunawi muno wo reansakaajian.
18 Anakotare so nande reansai,
weramu reamamo reansanimari Winai ramu,
muno Nya urairi ndaokae nande reansai mamo reandakanyoandi ramu.
19-20 Winyo reansakupi ti soamo reama kopa mamo maisyare nugo maninimbe maero sivuinye obo una rai wemaisy,
muno Nyo reansaugavo weno ngkakai raronto kobe.
Weramu reansanuga mamo reamo namamarave ramu,
muno reamanya marambe Nya unanui rai ramu.
21 Ranivara reambeaje reama Amisye Winai akato jewen,
yara reamakata mbeaje vatano marane awa anawayo kotare mai ratire,
22 wea indati Winyo raena mo?
Weye Winyamo Nyo ana ngkokaibe no reansanuga rai raen to!
23 Vatane manuga mamuno reansai weye reantavondi Amisy Winai,
namane rinit ubeker wo reansaubaisy,
reamaisyare maero domba auga da apa isyisye raotare amaisy.
24 Akoe Winy, mbeseo! Mbeanimaibe Nyo reansaene jewen? Winikija e?
Mbeseo ra Nyo reansaen! Vemo nyonae reansai tutir bayave kobe inya.
25 Mbe animaibe winamune rangkokaibe reansai?
Muno nanimarijo reansai reama siuri muno reansansewabe so raija e?
26 Weye reama marova wo reansataopon,
ti reantatayaje ntavainy no kopa rai.
27 Weti mbeseo ra Nyo sopambe reansai,
Nyo reansapaya anakotare so rai weye Nya muinye mamo no tawano reansai.