31
Nanaveano Amisye amen
1 Masmur Daud po ratoe. Nto irati akari po vatano matayao ukiny maugavo ransyerane rai ai.
2 Sya AMISY, Wibuiny irati syakaore gaugambe Nai,
vemo Nyo rinapayamo sya marova wo rinave samaneve inya.
Amisye Winyamo moyar, weti syare Nyo rinapaya irati kakai rai.
3 Syare namarikoame rasakinavo sya ana danajo ore rai,
muno Nyavave ra Nyo rinapaya irati sya marova aneme rai.
Syare Winyirati maisyare unato oram inamamavube Nai,
muno yano oram ntindimu no inaora indamu ipaya irati kakai rai.
4 Tugae, Winyirati maisyare sya unato oram muno sya yano oram ntindimu.
Syare Nyo rinaugav mavabe, wirati indamu Nya tame raijaseo titive.
5 Syare Nyo rinapaya irati sya marova awa aviri wo ratugar ti mo rinamane rai,
weye Winyirati syakaore gaugambe irati Nai.
6 Syo inanawayoe augav ore no Amisy winanem uga rai.
Winyirati Nyo rinapaya irati sya marova mai,
weye AMISY, Winyirati Amisy nteto Nya urairije rai tutir.
7 AMISY Winyamo nanuga mamuno vatano ubeaje yaro mamaisye jewene rai mansai,
weramu risyamo syanave irati Winai.
8 Indati inananibe muno inanayanambe rave weye Winyo Nya muinyo no tawane raveti mamaisyo rinai,
weye Winyirati Nyo rinaeno sya siuri rai,
muno winanto sya ana nsosobe rai tenambe.
9 Muno Winyo rinaunanto sya marova maneme uga rai jewen,
yara Nyo rinapaya irati ana mo kakai raugave rai.
10 Sya AMISY, syare naemen irati rinai, weye anakotare mo inakikipi.
Inami tuga so mbambanai weye inanuga so ranimaumbe,
inanasine so me sya jugara pe siuri rave.
11 Rimayondi rave, weye arono ta rikove soamo rinanimaumbe tutir,
sya tumo rino no mine vone somamo syanonae tutir.
Sya vambunine ntende, weye sya ayao kakai mbewar,
weti inanasine tename so mayondi.
12 Sya marova wo rinaura tantunawi,
muno sya arakovo reama yavare ntuna nande tenambe wonae daveo rinai.
Sya arakove upaparo mai arono wo sya siurije raen,
muno unande rinai no unanuijamo unaji ti uta rinaora.
13 Vatane manimari rinai to, maisyare rikakai to wemaisy,
Wo inatantona ware risya sya ana intai jewen,
maisyare kavino kopa nturi to ti ramauta vayave wemaisy.
14 Weye syo ranaun vatane wanui usaumugadi wayao rinai,
muno nai rui ruijamo wo rinawariki ti rijaniv.
Wenawamo manatantonave kakai raijo rinai,
muno wanyinyaube ware wo rinaubaisy.
15 Weramu AMISY, Wibuiny irati rinanaveano namen,
weye sya Amisye Pi Winy.
16 Risya masyoto rikovo rai mamo no no winanem uga rai,
syare Nyo rinapaya sya marova wo rinawatan tutire maneme rai.
17 Risyamo syanapatambe Nai, syare Nya kove mbaro rinai,
syare Nyo rinapaya kakaije rai mamaisyo Nya muinyo no tawane rai.
18 Sya AMISY, vemo winaneme mpaya rinai mo risamane inya,
weye rigwain ore Winai.
Syare koveamo Nyo vatano mamune mapinde indamu usamane,
muno koveamo wasyo no amani, indamu anamainitu mai.
19 Syare Nyo vatano waarurijabe umaso mawa rakuvu,
weye umararin wo vatano ubeto irati Amisy Winai makaajian,
muno wo maura tantunawi.
20 Tugae, Amisye Winya kove mamo manakoe rave,
namirati Nyo ratayao ti ntuna vatano wo nasyanive mansamarom,
namirati Nyo raunanto vatano ugaugambe irati Nai mai,
no vatan tenambe mansamun.
21 Winyo mangkaokaibe no nanem ate rai indamu no mansaora
irati vatano manatantonave mamune rai mai.
Winy ndarino mansaora
irati vatano ware wanaikebe irati mansaije mai.
22 AMISY ararimbe!
Weye Po Apa muinyo no tawane rarorono rinai, omamo mbe anainambe,
arono marova wo sya munije rawariki indamu umarovave rinai.
23 Syananepabe vayave, ti syo ratantona syarevo:
‘‘AMISY Po rinawatano marambe no Amune rai to.’’
Weramu jewena, arono risyo awain indamu aemeno rinai,
Opamo Po sya ana danajo Ai raraniv.
24 Inya, kawasae AMISY Apa ura wasai weap, syare wasanuga no irati Ai!
Vatano matawandi utavondi AMISY Aije nanawamo Po mansayaranande.
Yara vatano wo taune mararine nanawamo mangke Po raugaje mai mamo Po rantotobe ramu.
25 Inya, vatan tenambe wasanaveano AMISY amene weap,
syare wasanuga mbambunin muno ntindimu irati Ai.