30
Ransyeran kangkaman weye mpaya irati kakai rai
Masmur Daud po ratoe. Ransyerane somamo vatano Israel ukiny dai no arono usisa Yavaro Amisy ama one rai.
 
Sya AMISY, syare syo naijaseo titive,
weye Winyi Nyo rinapaya irati waneno mangke dave rinaije rai,
muno sya marova nawamo Nyo mansamayaro umananibe sya wanene rai jewen.
AMISY, sya Amisy, Winyirati syo nawain syare naemeno rinai,
umba Nyo saumane raude rinai to.
Sya AMISY, Winyirati Nyo inapaya irati munijo wen akoe rai,
Winyo kove raude rinai ti syasyo no aipapo amanija ama ate waraya rai jewen.
 
Inya, kawasae wasatawandi watavondi AMISY Ai weap,
wakinyo ransyeran kangkamane raijo Ai,
Opirati dandinit dave, ti wapo kove raura seo Ai.
Weye Amisye pamo Apa parije ma ntora nugoenta ramu,
yara anuga ngkovo wansai mi no tawan no arono ta wangkove so.
Nai namano waravainyoe mamo wamoyov,
weramu arono akane ntipu, wansanayanambe akato.
 
Arono risya kovo syanya rai mamo rino anayanambe obo rai, syo raura syare:
‘‘Risyamo inanto ana nsosobe inta rai jakatoe ramu ntoa nuge nuganui!’’
Weye AMISY, wimbekobe irati rinai,
Winyo rinaveti ritindimu maisyare unato ntindimuge wemaisy.
Weramu arono winakirive rinai, weamo rijaniv dave.*
 
Sya AMISY, Winyirati syo nawain indamu naemeno rinai;
sya Akoe, Winyirati syo nanajo indamu Nyo sopambe rinai.
10 Syo raura syare: ‘‘Ranivara rikakai ti to tami no atemo amanijamo,
ama kovo animaisye mi makaore Winai?
Muno vatano kakai to apa kopa mamo indati makaseo mo nararimbe
muno mo winteto Nya urairije rai ravov akatoe ramu.
11 Sya AMISY, syare Nyo rinaraniv muno naemeno rinai.
AMISY, syare Winyirati Nyo sopambe rinai!’’
 
12 Sya oyove mamo Nyo ranigwan akato anayanambe rai ti risarer,
rinanimaumbe mamo Nyo rapaya rinai muno Nyo ranigwano ananibe rai.
13 Weti anamainitu rinai ramu, yara inanuga ntenami rikinyo ransyeran kangkamane raijo Winai,
AMISY, sya Amisy, syo kove raura seo Naijao ntoa nuge nuganui.
* 30:8 Arono Pemasmur nanto waneno mangke rai, weamo po rakarae pare Amisye akirive ai to. 30:12 Ayao Ibrani maisyare so: ‘‘sya ansuno ridave no arono rinanimaumbe rai mamo Nyo ranigwano ansuno wanyino syo rave no arono rinanibe rai jakato.’’ No koano Israel raijamo wo iije vasye karisya veano maakuvi arono manimaumbe rave.