27
Amisye anajo indamu darino wansaora
1 Masmur Daud po ratoe.
AMISY, Winyirati mbaro sya unanui rai muno Nyo inapaya kakai rai,
weamo indati are pirati syo asyaniv akato?
AMISY, wibuiny irati sya yano oram ndarino inaora,
weti rijanive ramu.
2 Ranivara vatano mamune maroyaro rinai,
ware wo rinaubaisy,
wea indati sya marova umaso taune nawirati
majo rantukam, ti utaopon.
3 Ranivara naito wanui wo rinawariki kai,
weramu rijanive ramu.
Ranivara marova ntipu ti mo rinaron kai,
weramu sya anave mamo no tawano Amisy Ai.
4 Ana ibekero rai ti syo ranajo AMISY Ai,
omamo intabom dave:
syare rituna no AMISY Apa yavar
arono ta rikove so,
indamu syo AMISY Apa kove raen,
muno syo anajo irati Apa bekere rai no Apa Yavar.
5 Weye Opirati indati darino rinaora,
arono ana ngkakai mare nde rinai;
Po inangkokaibe no Apa yavar,
muno no rinaora, maisyare Po rinapaato no no unato orame rai wemaisy.
6 Umba soamo syo anasineko sya marova wo inakijaniri mai,
weti indati syo maere rameseo no Yavaro Amisy, rigwain inananibe rautan,
muno rikinyo ransyeran kangkamane raijo AMISY Ai.
7 Sya AMISY, syare Nyo rinaranivo sya ana dawain ore rai,
naemeno rinai muno Nyo sya ana danajo ravera mamaisy!
8 Syo ranaun no inanuga Winyo raura nyare: ‘‘Nde ramu mbeaje Rinai.’’
Weti AMISY, syore beaje Winai kobe.
9 Vemo winamune rangkokaibe rinai nora.
Risyamo syanapatambe Nai, muno Winyirati Nyo inayaranande,
weti vemo wimpari rinai muno nakirive rinai nora.
Sya Amisy, Winyirati Nyo inapaya irati kakai rai,
weti vemo Nyo inavakano marambe inya, muno naneme mpaya rinai inya.
10 Ranivara sya injaya pe ingkoa me yaneme mpaya rinai rave kai,
weramu AMISY Winyamo Nyo rinakum.
11 Sya AMISY, syare Nya unanuijo kove rarorono rinai,
muno Nyo inaugavo unanuijo nsarokire raito,
weye sya marova wanui rave.
12 Vemo Nyo rinaunanto sya marova maneme uga rai jinya,
weye usea wo ayao angkarije rangkivano rinai,
muno ware wo ivuinye veano rinave.
13 Tugae, syanave indati syo AMISY Apa kove raen,
no arono ta rikov no mine so.
14 Syare wansanaveano AMISY amen,
wansanuga raveramu mbambunin muno ntindimu Ai.
Tugae, syare wansanaveano AMISY amen!