26
Amisye anajo indamu Po patimu mamaisye raugaje rinai
1 Masmur Daud po ratoe.
AMISY, syare Nyo patimu moyare raugaje rinai,
weye risyamo rikov irati rinanuga nsarokire rai.
Muno rinanaveano AMISY winamene mamo syo inta rantotobe ramu.
2 AMISY, syare Winyo rinayasiro mavabe muno Nyo rinatauno sya ana dave rai,
Nyo rinanuga muno sya ana datantona rayasir mavabe indamu Nyo raen ayao kakaije inta no rinaija rako?
3 Risyamo inaemendi tutiro Nya muinyo no tawane rai,
muno risyamo inatawandi itavondi Winai.
4 Vatano aarurijate ntubai maije nanawamo syonae rituna matavon ija,
muno vatano awa angkarije ntapekane nawamo syonae tavondi maiji.
5 Risyamo syonae daveo vatano wo ana ngkakai rave nao reangkavave ija,
muno risyamo syonae rituna vatano mamune matavon ija.
6 Sya AMISY, risyamo rinaneme rarondom indamu mbe rarorombe mare sya ayao kakaije meweno rinai.
Umba syanya Nya tewa orame rakijani,
7 muno rikinyo ransyerane rai syo kove raura seo Amisye Winai,
muno syo Nya anakotar tenambe ndave ti mbe anainambe rariri.
8 AMISY, rinanuga ntove rave Nya Yavaro ntuna rije rai rave,
muno ribekero Nya norije rai wemirati Nya kovo ntiti raeno rai.
9 Syare vemo Nyo rinaubaisyo vatano ayao kakaije no mai matavon inya,
muno vatano maneme nijame matavon inya.
10 Wenawamo wo ana kakaije obo raijar tutir,
muno awa ube akarive mamo wavakananta doijo veano mawa rakuvu rai tutir.
11 Risya maisyare wemaisye ramu, yara risyamo rinanuga nsarokir dave,
weti syare naemeno rinai, Nyo rinapaya irati ana nsosobe rinaije so rai.
12 Risyamo rite no unanuijo ngkove rai,
weti risyo AMISY winararimbe no Nya kawasae Israel awa yasyin.