24
AMISY Wepi Akari Titi, de no Apa Yavar rai no Yerusalem
1 Masmur Daud po ratoe.
AMISY Wepirati peyave irati mine so rai muno ama anakotaro ntuna rai rautan,
muno vatano ntuna rai mautan tenambe.
2 Weye Wepi Po muni so rauseo nte no mana ntuna no kopa mate so ama vone rai.
Po raveti ntindimu no mana masyo rave ama vone rai.
3 ‘‘Are pirati indati mamaisyo seo no unato AMISY we rai?
Are pirati indati mamaisyo de siso no AMISY Nya Yavar, indamu beaje irati Nai?’’
4 ‘‘Vatano anuga ngkakavin, muno apa ana dave ngkov,
paarurijabe jewen arono po urairije raokaisy,
muno beaje yare rai jewenep.
5 Vatano napije, indati AMISY Po kove raugaje ai.
Amisye, Opi Po apaya kakai rai, pare vatane sopamo ayao kakai meweno ai.
6 Maisyare wemaisy vatano nanawirati ude no Amisye Winui,
onawirati ude indamu ubeaje irati Amisye Winai, Winyirati aneno Yakop beaje Nai.’’
7 Inya, unsanda akokoe no no wusyin to, nsaneka!
Nsaneka ra ntanenae,
indamu Akari Titi, Apa kove ntiti, de siso.
8 Akari Titi so, Apa kove ntiti, opamo are pije?
Opamo AMISY, anaaniv muno bambunin dave,
AMISY bambunin Po anasine ugav no marova rai!
9 Inya, unsanda akokoe no no wusyin to, nsaneka!
Nsaneka ra ntanenae,
indamu Akari titi, Apa kove ntiti, de siso.
10 Akari titi, Apa kove ntiti, opamo are pije?
Opamo AMISY Wepi be akarive naito munijo ntiti mansai,
Opirati Akari Titi, Apa kove ntiti rave!