☰ MASMUR 23
23
AMISY Wepi Po rinayaranande ngko dave
1 Masmur Daud po ratoe.
 
AMISY Po rinayaranande maisyare vatano po maero domba makum,
weti anakotare inta meweno rinai jewen.
2 Po inaugav asyo tuna no anoko insumai njayaibe rai,
Po inaugave to no mana ami ntanamanine rai.
3 Wepi Po vambunine raugav akare rinai jakato,
muno Po rinaugavo unanuijo nsarokire raito,
indamu Apa tame raijaseo titive.
4 Arono syanya kaivo wen akoe no rai raito,
syo ama ngkakai rasyanive ramu,
weye wintuna rinautan.
Nya kaijije me isyo me nanairati yo inayaranande,*
weti ino kovo saumane rai.
5 Winyi Nyo anaisye ratayao ti maweso rinai,
no sya marova mansamune rai.
Winyi Nyo manino mbovove rauvaro inakari rai,†
muno Nyo sya kapijo syo mana ramanam daije raveti ntairi tutir.
6 Syo raen, tugae, AMISY Nya mbekobe muno Nya muinye manakoe rinai no arono ta rikove so;
muno indati rituna no AMISY Nya Yavare rai tawan tutir.
* 23:4 Kaijije muno isyo omamo veano domba mansayaranande. Kaijije veano domba manepat indamu wanya sarokibe, muno veano makeo sivuinye manepat tavon indamu vemo wo domba maubai nora. Umba isyo mamo ama kume ngkariwae indamu rave wusyawave inda veano domba awa nyovaravao, nyoamane wo raisye rauvade, muno domba temasyo no ateme pamo ransawa ai ti auvasen. † 23:5 manino mbovove rauvaro inakari rai: koano manine somamo Israel wo rave vatano wo aovambe ai.
☰