☰ MASMUR 144
144
Amisye ararimbe muno kove ranajo Ai
1 Masmur Daud po ratoe.
 
Syo AMISY ararimbe! Wepirati sya unato oram inamamavube Ai.
Wepirati Po inaneme ranyao marova rai,
Wepirati Po inanyao indamu syo marova rave.
2 Wepirati Apa muinye no tawano rinai muno be yambe inaora sya marova mai,
Wepirati rinino aowan muno Po rinapaya kakai rai.
Wepirati darino rinaora maisyare vakane ramaisy, ti rigaugambe Ai,
Po susye kotare maveaje utantuna no inajo ate rai.
 
3 Sya AMISY, vatane nanawamo animai dave, weti Winyo mansatantona rave?
Muno arikainyo vatane nanawamo animai dave ti Winyo matantona rave?
4 Vatane nanawamo maisyare ovar bayave,
awa ukov ti una no mine somamo maisyare ugara de to ti akanive.
 
5 Sya AMISY, syare Nyo naume raneka muno Nyaje no mine so,
nyantukamo papukame rai indamu kijao mpatututo rai.
6 Winyo ivake ratatukande, indamu sya marova mpusyek,
Winyo Nya atoe ratapo, indamu sya marova unanajibe tatugadi.
7 Winyi no no munijo Manunggara, syare naneme rareande indamu Nyo inapaya irati kakai rai.
Syare Nyo rinapaya irati sya marova wanui rave* so mai,
Nyo rinapaya irati sya marova susyo marane awa vambunine rai.
8 Wenawamo ubekero wo aarurijate bo raker,
muno wangkarive vayave arono wo urairije raokaisy.
 
9 Sya Amisy, syare rikinyo ransyerano wanyine raijo Winai,
syo itari anakoe† ama wai abusyin raeyan dai syo winararimbe.
10 Winyirati Nyo anasineko raunande irati akari titi Israel mansai,
muno Nyo Daud,‡ akari titi panapatambe irati Winai, apaya irati apa marova mai.
11 Syare Nyo vatano mamune awa omake raveto marambe irati rinai,
muno Nyo rinapaya irati susyo marane awa vambunine rai.
Wenawamo ubekero wo aarurijate bo raker,
muno wangkarive vayave arono wo urairije raokaisy.
 
12 Amisye, syare reama arikainyo anya nanawamo maisyare anare ntubai mavave muno ubambunin no arono ta ukamurame so.
Muno syare reama arikainyo wanya nanawamo maisyare ajijo rave yavare rai, ratotov ti ngko dave.
13 Syare reama yavare mamo ntairi anaisye kotare rai.
Syare reama maero domba ntuna no anoke mainyamo mbaki janyi ti ama manui nseo ribuge abusyin rakivan.
14 Syare reama maero sapi mainyamo indati ubakija§ awa tuvane wanui rave kobe,
muno* awa tuvane inta aumandi ramu muno tuvane inta kakai kamurambe no akoe ranobone ramu.
Syare reama munije ama uga so raita, vemo reamo vatane inta mansanauno wanonae awa siuri rai jinya.
15 Kove ngkov irati vatano nanawirati Amisye Po kovo maisyare umaso maisye raugaje mansai mai!
Kove ngkov irati vatano are nawirati wo AMISY aura ware Opamo awa Amisye Pije!
* 144:7 marova wanui rave: Ayao Ibrani maisyare so: ‘‘Syare Nyo rinapaya irati mana njame rai.’’ Ayao ‘‘mana njam’’ omamo ananeneae ama ine mare marova wanui rave. † 144:9 itari anakoe ranigwano ‘‘gambus’’ rai. ‡ 144:10 Daud: ayao so mo akari titi Daud obo aura jewen, yara mo apa susyo bakipambe nanawirati ube akari titive maura tenambe. § 144:14 ubakija: Ayao Ibrani ama ino kaijinta mare: ‘‘Syare reama maero sapi mainyamo ubambunin dave indamu wo nawaisye ama ine raugav.’’ * 144:14 Ayao Ibrani ama ayao naiso mbare ramu. Ama ino kaijinta mare: ‘‘Vemo vatano Israel awa marova wo munijo Israel randamisy, wo mapinde umba wo maugaveto arove inya.’’
☰