143
Amisye anajo indamu Po sopambe wansai muno Po wansaugavo unanui nsarokire raito
1 Masmur Daud po ratoe.
Sya AMISY, syare namarikoame rasakinavo sya sambaya rai,
syare Nyo sya ana danajo raraniv,
muno Nyo ravera mamaisyo rinai,
weye Winyamo moyar dave muno winteto Nya urairi rai tutir.
2 Risyamo Nya vatano syanapatambe Nai,
ti vemo Nyo mangke rapatimugo sya ayao kakai rai jinya,
weye vatane inta mamai dave no winamune rai jewen bayave.
3 Weye sya marova po inangkarimu muno po inapinde,
po rinaugaveto po rinansowave no varoro ngkaumudi rai,
ti risyamo maisyare vatano rikakaija ntoa nugoenta to wemaisy.
4 Sya mayare nsaonto ti rakanive rinai to,
muno inanuga mamaun dave.
5 Inaemen akato masyoto nde nto to rai janyi,
syo Nya anakotaro ndave ratantonave,
muno syo Nya ana ndave rakaraebeve.
6 Inaneme raijaseo ore no Winui, syo winawain,
sya jugara bekero Amisye Winai maisyare kopa ngkanembe mbekero mana nde rai wemaisy.
7 Sya AMISY, syare nyavave Nyo sya ana danajo ravera mamaisy,
weye ripapirabe akato ramu to!
Vemo winakirive rinai nora,
indamu vemo risyamo maisyare vatano kakai ti pasyo no atemo amanija rai to wemaisy inya.
8 Syare Nya muinyo no tawane rarorono rinai no awatan ngkove yanteter,
weye Wibuiny irati inanaveano namen!
Syare Nyo unanui mamaisyo ritavondi rai rarorono rinai,
weye Winyirati syo sya sambaya raura ore Nai.
9 Sya AMISY, syare Nyo inapaya irati sya marova mai,
weye Wibuiny irati syakaore gaugambe Nai!
10 Syare Nyo inanyao da ibeto Nya mbekere rai,
weye Winyirati sya Amisye Pi Winy.
Syare Amisye Winya Wayo Kove mo inaugav tutir
no unanuijo nsarokire raito.
11 Sya AMISY, syare Nyo kovo wanyine raugakare rinai, wirati syo Nya tame raijaseo titive,
Nyo inapaya irati ana nsosobe rai weye Winyamo moyar muno ngkov dave tutir.
12 Nya muinye no tawano rinai, weti syare Nyo sya marova maupaeta,
muno vatano wo inansewabe nawamo Nyo mansaubaisy,
weye risyamo Nya vatano syanapatambe Nai.