☰ MASMUR 132
132
AMISY Po Daud aijaseo akari titi rai muno Po Sion ratayao terave Ai
1 Ransyerano Israel ukiny dai arono wanya usea no Yavar Amisy no Yerusalem.
 
Sya AMISY, syare naemeno Daud ai,
vemo mparandeno ai no apa siuri kotare rai jinya.
2 Vemo AMISY winanimari apa urairi po raokae nande Nai rai jinya,
urairijo namirati po raokae nande Israel* reama Amisy Mbambunin Dave Winai rai jinya.
3 Po raura pare: ‘‘Tugae, risyamo indati risiso tuna no sya yavare ama uga rai rainy,
riseo niki no vasyoto riniki ri rai jewen.
4 Tugae, inamije mamo syo ratu ra niki jewen,
indako, inamije maomon da niki mariraave jewen,
5 weye syana syo yavare rauseo nteto mumuimbe AMISY amarom ndainy.
Israel wama Amisy Bambunin Dave Apa tuna ri mamo syo ranari rainy.’’
6 Kasyamo urairije† mamo arono reana no Eprata‡ weamo reamo ranaun to,
umba reamo rakanija reananta rai no anoko Yaar.§
7 Umba wo raura ware: ‘‘Wade ra wanta no AMISY Apa yavaro tuna ri,
wade ra wambeaje Ai no Amun no Apa kursijo titi tuna ri.’’
8 Sya AMISY, syare mbeseo ra nde no tawan no Nya Yavar,
nde no irati kasyamo urairi mbe rarorombe irati Nya vambunine raije rautan.
9 Syare syeno wanapatambe Nai nawamo awa ana udave mamaisyo Nya mbekere rai,
muno Nya kawasae nawamo ukiny mananibe.
10 Daud opamo Nya vatano panapatambe nai,
weti vemo nakirive Nya akarijo titi Nyo aijaseo umaso ai jinya.
11 AMISY Po urairi raokae nande Daud ai to,
muno Opamo indati Po Apa urairije rakanyoandi ramu, yara teto rai kobe.
Po raura pare: ‘‘Daud nya arikainyo nyo avaki inta pirati indati Syo aijaseo akari titi rai,
indamu be akari titive po nanigwan akato.*
12 Weti ranivara nya arikainye, ajavije wo Sya urairi idaokae raijaro matuve,
muno ubeta irati Sya ananyao Syo raugaje mai rai,
weamo ntoa nuge nuganuijamo indati awa susyo wo mampame wo nanigwan utantuna akari titi rai tutir kobe.’’
13 Weye AMISY Po unato Sion rapatimu to,
Opamo anuga no irati rai indamu tuna no we.
14 Po raura pare: ‘‘Unato Sion so mirati indati ride no tawan no we, ntoa nuge nuganui,
unate so mirati indati rituna rai, weye rinanuga no rai mijem.
15 Anaisye kotaro vatano una no Sion ubekedaije mamo indati Syo raunande ti mawes no awa munije we rai.
Muno vatano ana jajewembe mai nawamo Syo anaisye raugaje mai ti wo raisya uman dave.
16 Indati syeno una no Sion wo raura irati kawasae Israel mai, ware Risyirati Syo mapaya irati kakai rai.
Muno vatano una no Sion nawamo ukiny mananibe.
17 Indati nai Daud apa susyo po rampame rai, Risyo akari titi bambunine inta aijaseo no Sion rai.
Indati apa be akari titive mamo Syo raveti ntindimu no tawan,
maisyare yawainyo mbar ti no tawan tutire wemaisy.
18 Apa marova nawamo indati Syo mapinde ti usamane,†
yara apa be akarive mamo Syo rainyave kovo no tawane rai.’’‡
* 132:2 Israel: ayao Ibrani mo ‘‘Yakop’’ ratoe weye aneno Yakop awain tavonamo ‘‘Israel.’’ † 132:6 Kasyamo urairi omirati Amisye Apa urairi Po raokaisyo Israel mai raugasyo ntami rai. ‡ 132:6 Eprata omamo Betlehem ama tamo wusyine mijem. § 132:6 Yaar omamo munijo no no Yerusalem ama ranijo wanansai, ama nggwaravainyo Yerusalem rai mamo kilometeri abusyin eane mambisy (14), omirati kasyamo urairi raugaveto ntuna no we. Kasyamo urairi raugaveto ntuna no Yaar umasoamo nseo no tume tenam (20), no arono vatano Pilistin wo raugav akare kobe we, weye wo raugavo vatano Israel maora arono umarovave vatano Israel mai no wusyinoe. 1Sam. 4:1-6:16, 7:1-2; 2Sam. 6:2-15; 1Taw. 13:5-8, 15:5-12 * 132:11 2Sam. 7:12-16; 1Taw. 17:11-14; Maz. 89:4-5; Arakov. 2:30 † 132:18 Ayao Ibrani maisyare so: ‘‘usamane dave maisyare ansuno manawadi inta mo matatuve wemaisy.’’ ‡ 132:18 Ayao Ibrani maisyare so: ‘‘apa kakiono emasije mamo indati mba dave,’’ ama ine mi ratoe no naiso. Kakiono emasi mbe rarorombe Daud apa be akarive rai.
☰