130
Amisye anonae indamu aemeno wansai no nsosobe ama uga rai
Ransyeran Israel ukiny dai arono wanya ti usea no Yavar Amisy rai no Yerusalem.
 
Sya AMISY, syo nawain arono rino ana nsosobe ama uga rai.
Sya Akoe Winy, syare Nyo sya anonae so ranaun,
koveamo namarikoame rasakinav de sya ana danajo ore rai.
Sya AMISY, ranivara Nyo reama ayao kakai ama manuije rator tenambe,
weamo tugae, indati reanajivo Akoe Winya mangke raora kakai.
Weramu Winyirati mayaro Nyo vatane reama ayao kakaije rapaya reansai,
indamu vatane reamo nasyaniv muno reambeaje Nai.
AMISY, Winyirati syo nanyube,
inanuga ntenami syo nanyube,
muno Nya ayao mirati inanaveano ramen.
Sya jugara so bekero sya Akoe Winai,
mo naito po munije inta rayaranande namane rai ti bekero nsansiman bavai, apa bekere rakivan.
Tugae, mo naito po munije inta rayaranande namane rai ti bekero nsansiman bavai, apa bekere rakivan.
 
Inya, kawasae Israel wasanaveano AMISY obo amen!
Weye AMISY Apa muinye no tawan,
muno Opirati mayaro Po wansapaya kakai rai tenambe.
Opirati Po Israel wansapaya irati
wama ana wandaveti ngkakai rai tenambe.