111
AMISY Apa bekobe
1 AMISY ararimbe!
Syare syo kove raura seo AMISY aijo inanuga ntenami rai no anugane rai,
no vatano utavondi Apa bekere rai awa yasyin.
2 AMISY Apa ana dave makokoive,
omamo vatano manuga no rai nawamo wo ratantona mavabe tutir.
3 Apa ana dave ama kovo ntiti no rai muno mamaisyo raura titive,
muno Apa moyare mamo no tawan ntoa nuge nuganui.
4 Apa ana dave mbe anainambe ma pare indamu
mansanimari rai nora yara mansaemendi rai.
AMISY Opamo muiny dave muno aemeno mai rave.
5 Anaisye omamo Po raunande vatano wo asyanive mansai,
muno Amisy Opamo aemendi tutir irati Apa urairi rai.
6 Apa vambunine mamo raen no Apa ana dave rai,
namirati Po rarorono Apa kawasae Israel mai,
omamo Po susye kotar awa kopa raunande Apa kawasae umaso mai.
7 Apa ana daijaro aneme rai mamo mamai dave muno moyar.
Muno Apa ananyao mamo ntindimu ti anave rai,
8 ntindimu tutir muno no pitawabe,
Amisy Po raugaje mamaisyo Apa moyare muno Apa mamaisye rai.
9 Wepi Po apa kawasae Israel mapaya aroo rai to,
muno purairive maijo Apa ura mai tawan.
Wepirati Amisyo dandinit muno bambunin!
10 Arepi beker peyave ana ratantona ntiti rai
weamo po AMISY asyani dati,
Vatano ubeta Apa ananyao rai wenawamo awa ana wo ratantona ngkov.
AMISY ararimbe mamo ntoa nuge nuganui!