109
Vatano aura tantunawi apa sambaya
1 Masmur Daud po ratoe. Nto irati akari po vatano matayao ukiny maugavo ransyerane rai ai.
Sya Amisy, Winyi syo nararimbeve tutir,
syare vemo manin bayave inya.
2 Weye vatano mamun muno vatano mawa ntairi aarurijate rai
wo rinaura tantunawi muno wayao angkarive irati rinai.
3 Awa ayao wo inaura ti mamune mamo wo veano inanepat,
muno wo inakekebe vayave ayao mamaisye jewene rai.
4 Risyamo bekobe mai muno syo Amisye anajo indamu Po kove raugaje mai,
weramu wo rasakinav akare mamo, ayao kakai mi wo rantutibe rinai.
5 Risyamo ibekobe mai yara onawamo wo rasakinavo ana ngkakai rai,
risyamo muinyo mai weramu wo rasakinavo manuga mamune rai.
6 Syare Nyo vatano mamune inta atayao da tet no akarije amun,
indamu po ayao kakai rantutibe sya marova ai.
7 Arono indati ayao rapatimu sya marova umaso ai, weamo syare mangke wemi ntende ai,
muno apa ana danajo Amisye Ai mamo mbe ayao kakaive taune ai.
8 Koveamo apa matame raotar aje tumaimbe,
muno apa anakero po raijare mamo vatano kaijinta po anigwano rai kai.
9 Koveamo apa arikainye ube arikainyo wawat be,
muno apa anamu mbe kavinive.
10 Koveamo apa arikainye mapaya ti ntuna mandup bayave muno wanatambe,
muno mawatan inda wusya irati awa yavaro randujai ti ntuna we raora.
11 Syare koveamo vatano de po atan irati ananugo davae dainye raijep, po apa ananuge raugaveto vintabo aora,
muno vatano pantatukambe maije inta wo apa mamoane raugaveto aora tavon.
12 Vemo vatane inta ubekobe ai jakato inya,
muno apa arikainyo po mapaya ti una wenao, vemo inta maemeno mai jinya.
13 Koveamo arikainyo po mampame maotar da makanive,
muno nto irati susyo jirume rai, vemo apa tame ranaun akato inya.
14 Koveamo apa anene awa ayao kakai mamo AMISY animari irati rai jinya,
muno apa akoeam ama ayao kakaije raupaisy inya.
15 Koveamo awa ayao kakai namijem, AMISY ami ntami rai tutir,
muno vatano mine so maemen akato maive inya.
16 Weye vatane sop, ponae po muinye inta rarorombei,
yara po vatano usiuri muno awa ananuge meweno maije mawatan muno po mansewabe,
muno po vatano manuga mpatimu maubaisy.
17 Opamo anayanambe panaamatambe vatane mai,
weti koveamo apa anaamatane nsakinav makare taune ai.
Opamo ponae po Amisye anajo indamu Po kove raugaje vatano kaijinta maiji,
weti koveamo kovo Amisye raugaje ai jewen tavon.
18 Apa ana no ai tenambe tutire mamo anaamatane bom,
ramaisyare apa ansuno po rave masyote antetere wemaisy.
Anaamatane umaso maisyare mana ramanam, weti mo anasine rarijate wemaisy,
muno maisyare manino veano anasine rayarer, ti mo rauva nto pae rai wemaisy.
19 Koveamo apa anaamatane ama mangke mo atatuv maisyare ansuno mo akakipimbe wemaisy,
maisyare tarandino rarajuto ateririje rai ti mo aokae tutire wemaisy.
20 Sya AMISY, syare Nyo mangke rapinde irati sya marova wo ayao kakai rantutibe rinaije so mai,
onawamo vatano nanawirati wo mamune ratoraje rinai nao.
21 Yara sya AMISY, Winyirati sya Akoe pi Winy,
syare Nyo sopambe rinai indamu Nya tame raijaseo titive,
muno Nyo inapaya irati inansuimbe so rai,
weye Nya muinyo no tawane ngkov dave.
22 Weye risyamo vatano siuri muno sya ana jajewembe rinai,
muno inanuga so njoram dave.
23 Risyamo kavintare inaumandi kobe maisyare arono uma pasyo ti sya ugara aumandi kobe wemaisy.
Muno risyamo maisyare kao insumai no no nyovara wao rai, ovare po amawisy ti saonto wemaisy.
24 Inatawandi marore rai indamu risambayambe, weti umba sya vukane ntutar,
muno inanasine ndupan bintabo.
25 Vatano wo rinaene wo inaura tantunawi,
umba makari rangkikive rinai.
26 AMISY, Winyirati sya Amisy, syare naemeno rinai,
Nyo inapaya irati kakai rai mamaisyo Nya muinyo no tawane rai.
27 Indamu sya marova wo raen ware tugae, AMISY Winyirati Nyo inapaya kakai rai to.
Winya nanemo vambunine omirati mo inapaya kakai umaso rai.
28 Maisyeamo wanaamatambe rinai kai, weramu kove mi ndaugaje rinai,
ware umarovave rinai kai, weramu Nyo mapinde ti usamane,
yara Nya vatano syanapatambe Nai risyamo inanayanambe.
29 Syare koveamo vatano wo ayao kakai rantuna rinai nawamo usamane,
muno usamane dave maisyare ansuno manawadi inta mo matatuve wemaisy.
30 Syare syo kove raura seo manakoe irati AMISY Ai,
muno syo ararimbe no anugane ama yasyin no Yavar Amisy.
31 Weye Opirati Po marimbe vatano mayondi mai,
indamu Po mapaya irati vatano ware wo mangke maubaisye raugaje maije mai.