☰ MASMUR 108
108
Amisye anajo indamu Po wansapaya irati marova mai
1 Ransyeran. Masmur Daud po ratoe.
 
2 Inanuga so ntindimu sya Amisy Nai,
syare rikinyo ransyerane rai, rikangkamambe Nai inanuga ntenami rautan.
3 Inya, syare ibeseo, syo itari anakoe muno itari mamaune* raeyan,
rikiny no arono akane mare ntipu kobe.
4 Sya AMISY, Winyirati syare syo kove raura seo Nai no vatan tenambe so awa yasyin,
syare rikinyo ransyeran kangkamane raijo Winai no susye kotaro mine so awa yasyin.
5 Weye Nya muinyo no tawane mamo ntitito no naume warae,
muno winteto Nya urairi rai mamo nto rave ti mo kamure rakivan.
6 Sya Amisy, syare Nya ntiti rave raroron no naume warae,
muno Nya kovo ntiti raroron no mine tename so rai.
7 Reamare Nyo reama ana ndanajo raraniv,
muno Nyo reansapaya irati reama marova mai nanemo vambunine rai,
indamu vatano winanuga no mai upaya irati kakai rai.
 
8 Arono Amisye Po kopa Kanaan raosoro vatano Israel mai, payao no Apa tuna ri ndandinit,
pare: ‘‘Rinanayanambe ti syare Syo kopa Sikem raosor.
Muno Syo kaivo Sukot rataun, indamu Syo raosor.†
9 Kopa Gilead muno Manasye‡ omamo Risya ma,
Epraim§ omirati maisyare sapeo besi no inakari raora wemaisy,
muno Yehuda wemirati Sya isyo akari titi raugaje nteto rai.
10 Weramu munijo Moab* omamo maisyare unggano inajo rarondomo rai mije,
yara Edom omamo inajo kokome ramauto ntami rai weti Sya ura rai,
muno rigwain inananibe weye syanasineko muni Pilistea rai.’’†
 
11 Arepi indati po inaugave to no munijo Edom?
Arepi tavono rinai ti rito no munijo ama yano orame ntindimu ratuije rai?
12 Sya Amisy, Winyamo ntavondi reansai ramu ge?
Muno naijaro reama naite matavon da wata marova rai ramu ge?
13 Nde Nyo sopambe reansai inda reamo marova mapinde,
weye vatan bayave wo sopambe reansai mamo mamaisye ramu.
14 Ranivara Amisy wintavono reansai, weamo reambambunin dave,
weye Winyi Nyo reama marova matakarasyo.
* 108:3 itari anakoe muno itari mamaune ranigwano ‘‘gambus’’ muno ‘‘kecapi’’ rai. † 108:8 Sikem no no mana Yordan ama ranijo varet, muno Sukot no no ama ranijo wanamuram, kopa umaso ibe rarorombe munijo Israel ama mantamito rai tenambe. ‡ 108:9 Gilead muno Manasye no no mana Yordan ama ranijo wanamuram. § 108:9 Munijo Epraim omirati naito anaanive una ri we, yara munijo Yehuda omirati akari titi Israel no ri we. * 108:10 Aneme so ama ine mare Amisye Apa ura kopa Moab muno Edom muno Pilistea rai tenambe, weramu ponae rai weye awa kawasae wanave Ai jewen. † 108:10 Aneme so ama ine mare vatano susye mandeije so–Moab, Edom, muno Pilistea–onawamo Amisye indati Po mapinde tenambe indamu munijo Israel mbe akarive mai.
☰