23
Nnap-nlà aDawuda ngga nkur anung
1 Oga nnap-nlà aDawuda ngga nkur anung oma ta̱.
Oga nnap-nlà aDawuda uya aJese ununggwan,
nnap-nlà anəm va Inan rup ká̱ na,
unəm va Inan aYakubu gar pa̱ á yà uponzhi,
unəm oIsa̱rila uga shì oga nnap-nshì nchángchàng. Á là pa̱.
2 <<ARuhu aYawe na nnap-nlà á mi pa̱ n là,
nnap-nləla ka̱ asap anung mi.>>
3 Inan oIsa̱rila á là nnap,
Ìpang oIsa̱rila á là á mi pa̱,
<<Unəm va̱ kà̱ nnəm iponzhi ka̱ apal onəm ká̱ nnandər,
uva kà̱ nnəm iponzhi ká̱ ayər Inan te,
4 uza̱ wá atak aghánghan aga anung ìpin va i ɓa nzəng ká̱ nfa alum,
a va yà ká̱ ìlulu iro kà̱ ka̱t,
wa atak aghanghan ka̱ nva̱ng ìva̱r
a va i nak ìpəpa i fa ka̱ mbin.>>
5 <<Nnandər, wa ǹna ta nzhi mi ka̱ mpyal Inan ka̱t ɗò?
Ka̱kul uza̱ yar nsar nnap-nlà ngga mbyet ká̱ mi,
nsar nnap-nlà va uza̱ ɗa̱mshi kang à yəl.
Nnandər, uza̱ i nak mi myak,
ká̱ nkpaktak iya̱m va̱ mmami ka̱ nɗuɗom.
6 Ǹnyi te, mi swang nkpaktak onəm onga ka̱ cho wa izú,
va mi wur ká̱ awo ka̱t.
7 Unəm va̱ pa̱ káp i dok izú te,
ya uza̱ i nəm inok ká̱ iya̱m wa acham ka̱t te akun aɓár.
Mí shì oza̱ pa̱ chatchat ká̱ apər ka̱ atak va̱ oza̱ ra kà̱.>>
Oshozha aDawuda oga ǹnyi ìkum
(1 Nnap Nshet 11.10-39)
8 Aɗin oshozha aDawuda oga ǹnyi ìkum oma ta̱.
Unəm uga nggəshi te, uJosheb-Bashebet unəm uga aTakemon, uwa unəm uga mpyal oshozha oga oshatɗing va̱. Uza̱ yar aɓár te, a gbá̱ng onəm ká̱ ìgba̱l pa̱ ìna̱nne ka̱ awalang azəngtəng.
9 Uga nvəva̱ng ka̱ ashe onəm oga oshatɗing va̱ te uEleyazar uya aDodayi ununggwan ka̱ akum aAhohi. Uwa yà nzəng ká̱ uDawuda ká̱ ilum va̱ oza̱ ɓák onəm oga aFilisti va̱ ɓut ka̱kul nlung ìkum. Te onəm oga aIsa̱rila chəng le nva̱ng,
10 ǹnyi te, uEleyazar sat gbá̱ng oFilisti awo ga wom na kang à ma̱t na kà̱ nvachi ka̱ izər ndokchi. UYawe na igwan pa̱ makmak ka̱ nda va̱ ta. Oshozha va̱ ka̱ chəng te, a le ga atak aEleyazar kang oza̱ ga wur iya̱m iga ngwur ka̱ atak ìkum.
11 Ka̱ nva̱ng aEleyazar te, uShamma uya aAgi ununggwan unəm oHarar. Awalang va̱ oFilisti ɓut ka̱ atak aro va ìram iro va̱ yə́l ká̱ aso njiman kà̱. Te oIsa̱rila chəng oFilisti.
12 Ǹnyi te, uShamma sat ka̱ ishimshe ìram va̱ ta. Uza̱ pá̱ngchí ìram va̱ ta kang a gbá̱ng oFilisti. UYawe na igwan imakmak.
13 Ka̱ nda ro ka̱ ashe awalang ngga mɓún iya̱m te, onunggwan pa̱ shatɗing ka̱ ashe onunggwan ìsəm pa̱ shatɗing oga ìkum fa ga atak aDawuda ka̱ ashe agba̱k aAdulam. Ka̱ awalang ta te, oFilisti oma ləp apa̱k ka̱ mba̱nda̱m aRefayim.
14 Ka̱ awalang va̱ ta te uDawuda wa ka̱ atak mbwam, kang ìdongkong oshozha oFilisti ǹnyi te, na ka̱ yà ká̱ aBet-Lehem.
15 Ndəng gba̱l nəm uDawuda te, uza̱ là pa̱, <<Unəm uro ka̱ pa ndəng nká̱pka̱p ngga anung asa̱l ntar aBet-Lehem á mi ká̱ na n wá.>>
16 Te oshozha oga ǹnyi ìkum oga shatɗing va̱ ta kák ka̱ ishimshe apa̱k oFilisti, pa ndəng ka̱ anung asa̱l ga ntar aBet-Lehem, kang à ɓa ká̱ ûDawuda. Ǹnyi te, uza̱ yang ká̱ ngwuwa. Ka̱ ɗor ngwuwa te, uza̱ tar ka̱ mbin ka̱ mpyal aYawe wa iya̱m inana.
17 Uza̱ là kà̱ pa̱, <<UYawe á dang mi ká̱ nnəm apir iya̱m va̱ ta̱, nna pa̱ ngwa nchə̀r onəm va̱ ta̱ ova yáp ká̱ irirì oza̱ á.>> Ka̱kul nva̱ ta te, uDawuda wa ndəng va̱ ta ka̱t. Oga iya̱m ichumchum va ta̱ ovan nunggwan oga oshatɗing va̱ ta̱ nəm á.
18 UAbishayi uya aZeruya ugənang aJowap uwa unəm uga mpyal ôvan nunggwan oga ìsəm pa̱ ishatɗing oga ǹnyi ìkum va̱. Ka̱ nda ro te, uza̱ yar aɓár wò te, uza̱ gbá̱ng onəm ìgba̱l pa̱ ishatɗing. Wanta na uza̱ nəm aɗin wa onəm oga ashatɗing va̱ ta̱ kpa.
19 Uza̱ wa aɗiɗin dam ma̱t ka̱ ashe onəm oga shatɗing va̱ ta̱. Ka̱kul nva̱ ta te, uza̱ ta̱l unəm uga mpyal oza̱, kap ka̱ nva̱ pa̱ uza̱ yà ka̱ ashe oga oshatɗing va̱ cho ka̱t.
20 Te uBenaya uya aJehoyada ununggwan, unəm oga aKapzeyel, unəm uga ǹnyi ìkum á nəm oga iya̱m ichumchum. Uza̱ gbá̱ng onəm oMowap pa̱ oparəm ova i lung ìkum wa ìlir á. Ka̱ nda aro ka̱ awalang va atak i rusok i pə̀ng ká̱ aɗəɗal va̱ mi wor pa̱ asuno te, uza̱ fə́r ga ashe ache aro, kang à gba̱l ilir ka̱ ta.
21 Uza̱ gba̱l m ɓa agbán anəm uro uga aMasar ro uva ká̱ aɓár ka̱ awo. UBenaya ǹnyi te, a ga atətak ká̱ ìdari, kang uza̱ ga vyat aɓár va̱ ka̱ awo anəm uga aMasar va̱ ta kang a gbál na ká̱.
22 Oga iya̱m va ta̱ uBenaya uya aJehoyada ununggwan nəm, kang aɗiɗin dam wa aɗin onunggwan ìkum oga oshatɗing va̱.
23 Mmá shep na ji onəm oga ìsəm pa̱ ishatɗing va̱ ji, ǹnyi te uza̱ chu oga oshatɗing va̱ cho ka̱t. UDawuda nak na sat unəm uga mpyal onəm oga pángchí ikángkáng wò.
24 Onəm va̱ ta̱ oma ka̱ ashe onəm ìsəm pa̱ ishatɗing va̱, oma,
uAsahel ugənang aJowap,
ká̱ uElhanan uya aDodo ununggwan unəm uga aBet-Lehem,
25 ká̱ uShamma
ká̱ uELika onəm oga aHarot,
26 ká̱ uHelez unəm oga aPalti,
ká̱ uIra uya aIkesh ununggwan unəm oga aTekowa,
27 ká̱ uAbiyezer unəm oga aAnatot,
ká̱ uShibekayi unəm oga aHusha,
28 ká̱ uZalmon unəm oga aAhohi,
ká̱ uMaharayi unəm oga aNetofa,
29 ká̱ uHelep uya aBayana ununggwan unəm oga aNetofa,
ká̱ uItayi uya aRibayi ununggwan unəm oga aGibeya ka̱ akum ìjili aBenjamin,
30 ká̱ uBenaya unəm oga aPiraton,
ká̱ uHidayi ka̱ oga mba̱nda̱m aGayash,
31 ká̱ uAbi-Albon unəm oga aArbat,
ká̱ uAzmavet unəm oga aBahurim,
32 ká̱ uEliyaba unəm oga aShayalbon,
ká̱ ovan aJashen onunggwan,
ká̱ uJonatan,
33 ká̱ uShamma unəm oga aHarar,
ká̱ uAhiyam uya aSharar ununggwan, unəm oga aHarar,
34 ká̱ uElifelet uya aAhasbayi ununggwan unəm oMakati,
ká̱ uEliyam uya aAhitofel unəm oga aGilo,
35 ká̱ uHezro unəm oga aKarmel,
ká̱ uPayarayi unəm oArba,
36 ká̱ uIgal uya aNatan ununggwan unəm oga aZoba,
ká̱ uBani unəm oGat,
37 ká̱ uZelek unəm oAmmon,
ká̱ uNaharayi unəm oga aBeyerot, uwa unəm uga kpan iya̱m-wór ûJowap uya aZeruya ununggwan,
38 ká̱ uIra,
ká̱ uGarep onəm oga aItiri,
39 ká̱ uUriya unəm oHiti.
Pa̱ kpaktak te, oza̱ ìsəm pa̱ ishatɗing ama̱n pa̱ nfangshat.