22
Nnap-nshì igwan aDawuda
(Nnap Nsh 18.1-50)
1 Nnap-nshì va ta̱ uDawuda shì ka̱ nva̱ngva̱ uYawe ka̱m ishishi ka̱ ashe awo nkpaktak onəm oga nkpang na, ká̱ uShawulu.
2 Oga nnap-nshì va̱ uza̱ shì te nna ta̱ pa̱,
<<UYawe uwa ìpang mi ká̱ atak mbwam mi. Uwa unəm uga nka̱m ishi mi.
3 Inan mi uwa ìpang va̱ mi bwam kà̱,
uza̱ uwa ngwangwang mi, ká̱ ikam iga nka̱mshi mi.
Uza̱ uwa atak mbwam mi, uwa akamsəlang va mbwam mi,
uza̱ wa i kpak mi, uwa unəm uga nka̱m ishi mi ka̱ ashe awo onəm oga nyang mi.
4 Mi wór ka̱ ashe aɗin aYawe uva̱ kukur pa̱ mmá na aɗəngchi á na,
ka̱kul uza̱ i ka̱m ishi mi ka̱ ashe awo okpa ìkum mi.
5 <<Ka̱kul igum ndəng ngga ikú gang mi,
igum ndəng ngga nzhì onəm kà̱ nnang i watar á mi ká̱ ishi.
6 Asang awap chəp mi chit,
ajip ikú kpan mi chit.
7 Ka̱ ashe mɓək anung mi te n wór uYawe,
n wór Inan mi.
Ka̱ ashe nzhi awuwop te, uza̱ fe achu mi,
uza̱ gwong achwang ka̱ ayə́ng mi.
8 <<Te apambin tan kang ayənggət,
mbang apaɓur tan kang ayənggət
ka̱kul uza̱ mən ìkum.
9 Ngu fa ka̱ mɓol alulur,
aɓələm apər asalsal fa ka̱ ashe atətam,
amor apər asalsal fa ka̱ ashe atətam.
10 Uza̱ kakchi apaɓur fər vang,
ká̱ ilulu ìkpá̱rkpà̱r ka̱ avəng ashəshar.
11 Uza̱ kyen ka̱ apal aKerub uza̱ wong ka̱ pal,
mmá ya na ka̱ apal abasəm ayər.
12 Uza̱ gún ishi wò ká̱ atak akpá̱rkpà̱r,
ká̱ ilulu ikpá̱rkpà̱r iga iva̱r.
13 Ǹnyi te, aməlam fa ka̱ ashe ilulu va̱ ta,
amor apər fa ka̱ mpipyal.
14 UYawe ləp ìgbarman ka̱ apaɓur,
mmá fe achu Anəm uga Ichumchum.
15 Uza̱ tat iwár wò kang à lyanshin okpa ìkum
uzá̱ re ǹre ká̱ aməlam apər zangtal oza̱.
16 Mmá bol akum ìwa ka̱ gbagba,
kang mbang apambin mmá re ka̱ gbagba,
ka̱ atak nra̱n aYawe,
ka̱ atak nyi nkamkam va̱ fa ka̱ alulur.
17 <<Ka̱ apaɓur uYawe yichi awo yar mi ká̱,
uza̱ dapchi mi n fa ka̱ ashe oga ndəng ngbà̱nggbà̱ng.
18 Uza̱ fa ká̱ mi ka̱ ashe awo okpa ìkum mi okamkam,
ka̱ atak okpa ìkum mi va̱ kam ji mi ji.
19 Oza̱ ru mi ká̱ ilum ka̱ awalang va̱ mmami ka̱ ashe nɗaktak,
ǹnyi te, uYawe pángchí mi.
20 Uza̱ fa ká̱ mi ga ká̱ ka̱ atak va ikangkang kà̱,
uza̱ ka̱m ishi mi ka̱kul uza̱ fe nchang mi fe.
21 <<UYawe mwa mi ka̱ atak nnap-nnəm mi nnəna̱n,
uza̱ mwa mi ka̱kul awo mi yà ká̱ adak ka̱t.
22 Ka̱kul n kpak nnap-mpakpak aYawe,
n yà ká̱ mpat ka̱ atak nəm nnap-mɓá̱ngɓa̱ng Înan mi ka̱t.
23 N kpak oga nnap-mpakpakpakpak pa̱ kpaktak,
n re oga nnap-nkpakkpakkpakkpak chit ka̱t.
24 N yà ka̱ mpat nro ka̱ mpipyal ka̱t,
kang n kpak ishi mi ka̱ atak iya̱m inga.
25 UYawe mwa mi chit ka̱kul nnandər va̱ mmami ká̱,
ka̱kul mmami pa̱ satsat ka̱ mpipyal.
26 <<Ka̱ atak anəm uga nnandər te, u nyám ishi ɓu unəm uga nnandər,
ka̱ atak anəm va̱ pa̱ chak te, u nyám ishi ɓu unəm va pa̱ chak.
27 Ka̱ atak anəm va̱ yà ká̱ adak kat te, u nyám ishi ɓu pa̱ u yà ká̱ adak ka̱t,
ǹnyi te, ka̱ atak onəm onga te, u nyám ishi ɓu unəm uga ntan.
28 Ɓu ka̱m ishi onəm oga nyen ká̱ ishi,
ǹnyi te, ìwu ɓu ka̱ ndər onəm oga nrup ká̱ ishi pa̱ na u yen ká̱ oza̱.
29 ÁYawe, mmaɓu na atak tantàn mi,
uYawe ga̱ɓa̱n atak kpa̱rkpa̱r mi sat atak tantàn.
30 Nzəng ká̱ nka̱mshi ɓu te, mi nəm igwan nəm ká̱ ìdongkong oshozha,
ka̱ atak ichumchum aponzhi Inan mi te, mi gantal nza̱ akamsəlang nggo.
31 <<Inan pa te, asəsa̱l pa̱ zara̱ra̱.
Nnap-nləla təm chit wanta,
uza̱ ngwangwang n̂kpaktak onəm va̱ bwam ka̱ atətak á.
32 Uda Inan ká? UYawe uwa Inan byet.
Uda ìpang ga bwam yi yà? Inan yi uwa byet.
33 Inan uwa i na ikam a mi,
kang i nak asa̱l mi i ga ikángkáng pa̱ sham.
34 Uza̱ nak ashar mi á yà wa ashar nkar,
uza̱ nak mi n sat ka̱ apal oga aɗuktum akúrkúr.
35 Uza̱ ɗyáng ashar ìkum âwo mi,
awo mi i wul ìjang acham arəzang.
36 U na ngwangwang ngga ka̱m ishi a mi,
ka̱ atak nka̱mshi ɓu na n sat unəm uchumchum.
37 U nak mi ka̱ asa̱l va yà ká̱ nla̱p ìfang ka̱t,
le kang ashar mi a málkán ka̱t.
38 <<N wà okpa ìkum mi n ga nzhì oza̱,
n sat ka̱t ga chu awalang va̱ oza̱ zhì kang.
39 N zhì oza̱, n tung oza̱ ka̱ mbin ngwong ma̱t oza̱,
oza̱ tak ka̱ avəng ashar mi.
40 U na ikam á mi ka̱kul nlung ìkum,
u nak okpa ìkum mi ka̱ avəng mi.
41 U nak okpa ìkum mi ga̱ɓa̱n chəng ka̱ mpyal mi,
kang n zhì onəm va̱ yang mi.
42 Oza̱ yə́ng i ram nka̱mshi, ǹnyi te, unəm uro ya pa̱ a ka̱m ishi oza̱ ka̱t.
Oza̱ wór uYawe, ǹnyi te, a ma̱n oza̱ ka̱t.
43 N tòng oza̱, oza̱ yal lúkút wa mɓwang.
N kpà oza̱, kang n tòng oza̱ wa aɓyer aga iwu asa̱l.
44 <<U ka̱m ishi mi chit ka̱ atak onəm va̱ fa iya̱mkak ká̱ mi.
U nak mi n ta̱l uponzhi ka̱ apal ishi oɗyanəm, kang onəm va̱ n nyi ka̱t te, oza̱ nyang ozwal mi chit ǹyangmata̱.>>
45 Oɗyanəm ɓa ɓəram á mi ka̱ mpyal,
nva̱ oza̱ fe izər mi te, oza̱ kpak nnap-nnəm á mi.
46 Ichəgwak ləp oza̱,
Oza̱ fa ka̱ atak mbwam oza̱ ká̱ ntán izər.
47 <<UYawe uwa yà ká̱ irirì. Nnap-nnəna̱n a yà îpang mi.
Ichumchum sat iji Inan mi, ìpang iga ka̱m ishi mi.>>
48 Uwa Inan uva i pyát akat á mi,
uva nak oɗyanəm ka̱ avəng mi.
49 Uva fa ká̱ mi ka̱ ashe awo okpa ìkum mi.
U nak mi ka̱ apal ishi onəm oga nkpang mi,
u ka̱m ishi mi ka̱ ashe awo anəm uga nsur ìgwak.
50 Ka̱kul nva̱ ta̱ te mi shep ɓu ka̱ ashe oɗyanəm.
Mi shì nnap ngga nshep aɗin ɓu.
51 <<Uza̱ na igwan imakmak ûponzhi wò,
uza̱ nyám mmá̱n pa̱ ɗəkər û nəm va̱ uza̱ gar,
ûDawuda ká̱ akum ìjilijili mbyet.>>