14
Mmá kà̱ nchal oIsa̱rila pa̱
oza̱ a le atak áYawe
1 áIsa̱rila, le atak áYawe, Inan ɓu,
ka̱kul mpat ɓu nak chit u lə̀p ìfang.
2 Le atak áYawe ká̱ nnap-nlà,
là á na pa̱,
<<Yar nkpaktak mpat á yi,
ka̱m yi ká̱ nrwa ìgwak,
na í shep ɓu ka̱ anung ina yi.
3 AAshur i ka̱mshi yi ka̱t,
í kwak ipəri ìkum ka̱t.
Í yà ká̱ nlà iya̱m nnəm awo yi pa̱,
<Inan yi> ka̱t.
Ka̱ atak ɓu uyenkpələng i ya nrwa ìgwak.>>
4 <<Mi tàn ngga̱ɓa̱n nre nna nnandər oza̱,
kang mi ma̱n oza̱ wa nva̱ n ɗom,
ka̱kul á ga̱ɓa̱n nlak ìgwak mi chit ka̱ atak oza̱.
5 Mi yà wa ìmimyang ûIsa̱rila,
uza̱ i bà̱l wa nggwanggwang ìzhəpndəng,
kang i rwak alə̀ng wa aLebanon.
6 Ntə́təp i bol, kang iɓiɓyen i yà wa ikún mpyet,
te mməmməm wa ikún asida iga aLebanon.
7 Onəm i təm ka̱ avəng ayiyi kà̱ɗi ,
oza̱ i myak wa ìpirkur.
Oza̱ i tə́p wa ikún ìba̱ngba̱ng,
ìdaɓardaɓar i yà wa ndəng ìba̱ngba̱ng ǹsámsàm iga aLebanon.
8 aEfrayim, iza̱ mi nəm ká̱ oga ìchər yà?
Mmami na mi ná ama̱n a ɓu kang mi nak ishi ká̱ ɓu.
Mmami wa ìkun ìsa̱l,
ka̱ atak mi na ó ya awar anəna̱n.>>
9 Unəm va̱ ká̱ aghan te, re uza̱ á kpán ìpir oga iya̱m va̱ ta̱,
unəm va̱ ká̱ nkpán ìpir nnap te,
re uza̱ á nyi ìpipir.
Ka̱kul asa̱l áYawe anəna̱n,
onəm onəna̱n i chen ka̱ ashishe,
onəm oga nfa iya̱mkak i lə̀p ìfang ka̱ apəpal.