13
Mí ga nzhì onəm aEfrayim.
1 Kà̱ nva̱ngva̱ uEfərayim là nnap te, izər tán ká̱ onəm,
mmá shep na ka̱ ashe aIsa̱rila,
ka̱kul uza̱ nəm mpat kà̱ ngwop aBaal, te nkpak uza̱ i kú.
2 Ǹyangmata̱, oza̱ ga mpyal ká̱ nnəm nnap mɓá̱ngɓa̱ng,
oza̱ nəm ìchər ka̱ atak aghan oza̱ ká̱ aazurfa îshi oza̱.
Nkpaktak oga ìchər va̱ ta te, iya̱m nnəm onəm oga inok awo,
onəm oga aIsa̱rila i là pa̱,
<<Onəm va̱ i ná nləfər te, oza̱ i má njàng ala̱ka̱n ìna.>>
3 Ka̱kul nva̱ ta te, oza̱ i yà wa ìnanəng iga ìpin,
kang wa ìmimyang ìva̱ i lyangshin ká̱ iɓotak.
I ga wa adùng va ayə́r i dà̱n ka̱ atak mpək ìpirkur,
kang wa nggù nva i fa kà̱ mɓol ayə́r nzhi.
4 Mmami uYawe, Inan wo,
ùva̱ fa ká̱ wo kà̱ mbin aMasar,
Inan iro yà o nyi ka̱t mmami,
unəm uga nka̱mshi uro yà ka̱t mmami na byet.
5 N ɗak ká̱ wo ka̱ ashe ǹzam nkpələng,
kà̱ mbin nva ìva̱r i pəng kà̱ ka̱t á.
6 Kà̱ nva̱ngva̱ n ri ká̱ oza̱ te afu yə́l oza̱,
afu yə́l oza̱ te, oza̱ nəm nkak ishi,
oza̱ ka̱ng ká̱ mi.
7 Te mi ru oza̱ wa ìlir,
wa ìdaməng mi ra anyimnyal oza̱ ka̱ asa̱l.
8 Mi fa óza̱ wa ìdəshìli ìva mmá wur ivəvan,
mi kan ìkwoksok oza̱.
Mi zhì oza̱ ka̱ ta wa ìlir,
mi kan oza̱ wa ìzhe ìga anyin.
9 Mi zhì ɓu, áIsa̱rila,
uda i ka̱mshi ɓu yà?
10 UPonzhi ɓu ka̱ chè ǹyangmata̱ pa̱ á ka̱mshi ɓu yà?
Onəm oga mpyal ɓu ka̱ chè ka̱ ashe nkpaktak itong ɓu,
ova̱ u là pa̱, <<Ná uponzhi ká̱ onəm oga mpyal á mi yà?>>
11 N ná uponzhi a ɓu ka̱ ashe nlak ìgwak mi,
kang n tur na le ka̱ ashe ǹfə́l ìgwak mi.
12 Mmá lur mpat aEfrayim chit,
nnap mɓá̱ngɓa̱ngɓa̱ngɓa̱ng ɓut chit ra.
13 Nrwa afu amar ɓàn na chit,
kang uza̱ uyen upərəkpərək.
Ka̱ awalang amar te,
uza̱ ma̱n pa̱ ó fa ka̱ ashe atak amar ka̱t.
14 Mi mwa ishi oza̱ ka̱ ashe awo aShəwol ɗò?
Mi fa ká̱ oza̱ ka̱ atak ikú ɗò?
Á ikú, arwa ɓu ka̱ chè yà?
Á aShəwol, nzhì ɓu ka̱ chè yà?
Ǹrusok afu i bubwam kà̱ ìwu mi.
15 Káp ka̱ nva̱ uza̱ i myak i ji ka̱ ashe ogənnang wò,
ayə́r nvàngváng ka̱ atak áYawe, kà̱ mɓa ka̱ ashe ǹzam nkpələng.
Atak mɓəl ndədəng ká̱ ìwu ndədəng mɓokɓok i wom,
i lak nza̱ atak nnak iya̱m inəna̱n nggo,
kang ìwuswa i nəm na.
16 Nkpak pa̱ aSamariya á yar iɗək mpat wò,
ka̱kul uza̱ fa iya̱mkak ká̱ Inan wò.
Mí gbá̱ng oza̱ ká̱ ndokchi, mí kyen ovan oza̱,
kang ochəchar oga anyám mí cha afu oza̱.