4
1 दाक्पुला कोन्छ्योककी ङप्सु ङ्येतुपला थाक्छ्येतुप ति तन्दा साङ लुनी वे। तुक क्यानी दाक्पु च्यक्पु कितुप। तमा ख्यिराङ सु साङ ती ङासोप दासाला शुकुप मेङ्येवु मोडोशी।
2 दाक्पी हङ्गावातिवाला दोके दाक्पुला साङ लेन ल्यामु सिक्यानी वे। यिने तिवाला सिक्यावु सुङ ति तेर्मेला गाल वे। च्यिलासिसिन तिवी ती लेन ल्यामु थोसिनाङ तेपा माक्या।
3 त याङ दाक्पु तेपा कितुपतिवा ति कोन्छ्योककी थाक्छ्येन नङ्गुप ङासोपकी दासाला शुकुप ङ्येकिवी। यिने तेपा मिकिवु मीतिवी कोर्ला खोकी दुक सुङ्नी वे,
“ङला ङ्यिर्मु लानी तिवाला दुक सिनी न क्यलिन,
‘ङे ङप्सुला तिवा नाम्साङ शुकुप मेङ्येवी।’ ”
जम्बुलिङ ज्येनी सिन्दुप पेला नेज्यु कोन्छ्योककी ती ङासोप टडिक क्या नङ्गुप ति छेसिनाङ खोकी तुक सुङ्सुङ।
4 दाक्पु दी खोकी टडिक क्या नङ्गुप ति हाक्कोकिवी, च्यिलासिसिन खोकी सुङला ङासोप ङ्यिमाकी कोर्ला दुक सुङ वे,
“कोन्छ्योककी तेरी लाकातिवा नेसुर ङ्यिमा दिनकी छेर्मु ङप्सु ताङ्सुङ।”
5 यिने खोकी यम्बा दासाला दुक साङ सुङ्नी वे,
“तिवा ङे ङप्सुला नाम्साङ शुकुप मेङ्येवी।”
6 तोङ्ला लेन ल्यामु थोवुतिवी दी लेन ल्यामुला माङ्येन्दुप तप्की खोकी ङप्सुला शुकुप माङ्ये। यिने ललाइ ति तरोङ साङ ती ङप्सुला शुकुप लुनी वे।
7 तुक क्यानी येलुङ कोन्छ्योककी यम्बा ङ्यिमाला “हारिङ” ङ्यिमा सिनी तेन्तेन क्या नाङ्सुङ। तमा तोङ्ला सुङ्गुप दोके क्यानी खोकी लो बङी ज्युक्ला दाऊद नेसुर दुक सिनी सुङ्सुङ,
“हारिङ ख्यिरा कोन्छ्योककी सुङ ति थोसुङ सिसिन सेम क्योङ्बु माजो।”
8 दोजो यहोशूकी इस्राएलकी मीतिवाला कोन्छ्योककी थाक्छ्येन नङ्गुप ङप्सुला क्यलुप यिन्सिन खोकी ज्युक्ला वुङ्गुप यम्बा ङ्यिमाकी कोर्ला मुसुङ्गुप ति यिन्जा।
9 तुक क्यानी कोन्छ्योककी मीतिवी थोक्ला ङप्सु लङ्गुप ति लुनी वे।
10 कोन्छ्योककी खोरे छ्यक्लेन नेसुर ङप्सु तङ्गुप दोके खोकी ङप्सु ङ्येतुप मीतिवी साङ खोप्रे लाका नेसुर ङप्सु ङ्येकिवी।
11 ती तप्की दाक्पु साङ खोकी ङप्सु ङ्येतुपला अछ्योता सेक टेमु कितुप। तुक क्यानी दाक्पु सु साङ तेपा माक्यानी खोकी कला मेङ्येन्दुप मीतिवा दोके तेन्नी मोतोङ्शी।
12 च्यिलासिसिन कोन्छ्योककी सुङ ति ङोसु ताङ ङार छ्येवु वे। ती सुङ ति ख ङ्यी वोतुप खुर्पा सिनाङ नेन्बु वे। तुक क्यानी तीकी मी सेम ताङ थुकी नाङ्ला शुकुप ताङ जुकी थिन्जाम ताङ रुकककी काङ काङला शुनी कुतुक कुतुक मागल्वा सेक तीकी तुप्किवी। तमा सेमगी नासाम ताङ नोवा ति काङ नोक सिनी छ्या देन्गिवी।
13 कोन्छ्योककी ज्येवु च्यालकतिवी नाङ्ला खोकी थोङ मुथुपुप ति काङ साङ मे। खोकी थोङ्दाङला तेरी ताम्ङेतिवा ठछ्येली थोङ्गिवी। तमा खोला राङ दाक दाक्पी क्यावु लाकाकी कोर्ला तेरी ताम्ङे टेङ्बु कि गोकी।
येशू चोछ्येवु कोङ्यार छ्ये यिन
14 तुक क्यानी देवाच्येनला तेक्नी फेवु कोन्छ्योककी सेवु येशू ति चोछ्ये वोतुप तेरी सिनाङ कोङ्यार छ्ये यिन्दुप तप्की दाक्पी मीतिवी मिङ्गाला सेमला लानी तेन्तेन क्यावु तेपाला मङ रम्बु क्यानी देतुप।
15 खो दाक्पुला छेटाङ दुङल ख्येलुप पेला टोङ्गु तेर मुथुपुप कोङ्यार छ्ये मिन। च्यिलासिसिन खो ति दाक्पु दोके तेरी ताम्ङेला शैतानकी खोक्पा ल्हापला ख्येल्सुङ, यिन्सिनाङ खोकी दिक्पा माक्यासुङ।
16 तुक क्यानी दाक्पु ज्यिवा माक्यानी कटिन वोतुप कोन्छ्योककी ग्येल्ठिककी चिप्ला डोप। तमा कतुकार ख्येलुप पेला दाक्पुला कटिन ताङ च्यम्बा थोप्किवी।