3
मोशा सिनाङ येशू छ्ये वे
1 तुक क्यानी कोन्छ्योककी कताङ नङ्गुप चाङ्मा वोतुप अच्युनुपतिवा, दाक्पी ख्याप्टाक क्यावु लोमा छ्ये ताङ कोङ्यार छ्ये यिन्दुप येशूला नासाम तोङ।
2 खो ति मोशा कोन्छ्योककी मिछाङला शब्ज्यी कितुपला खोङ्तेर्मु वोतुप दोके खुरुङला कताङ नङ्गुप कोन्छ्योककी थोक्ला खोङ्तेर्मु च्युङ्सुङ।
3 यिन्सिनाङ खाङ्बा सिनाङ खाङ्बा जोप मीला मङ ताङ्देन वोतुप दोके मोशा सिनाङ येशूला मङ छासे ताङ्देन कि छ्योवु वे।
4 तेरी खाङ्बातिवा ललाइ ललाइ मी जोवु यिन, ती दोके तेरी च्यालकतिवा कोन्छ्योक राङ जो नङ्गुप यिन।
5 मोशा कोन्छ्योककी मिछाङकी मीतिवाला लावा दोके क्यानी शब्ज्यी कितुपला खोङ्तेर्मु च्युङ्सुङ। तमा ज्युक्थमाला वुङ्गुप कोन्छ्योककी येन्देनकी कोर्ला पङ्बु बिन्सुङ।
6 यिने ख्रीष्ट ति कोन्छ्योककी पुज्युङ यिन्दुप तप्की खोकी मिछाङकी मीतिवी थोक्ला खोङ्तेर्मु च्युङ वे। दोजो दाक्पी रेवा क्यावु ताम्ङेला ङाडेङ ताङ तेके क्यानी नरी देसुङ सिसिन दाक्पु साङ कोन्छ्योककी मिछाङकी मीतिवा च्युङ्गिवी।
कोन्छ्योककी मीतिवाला ङासोप ङ्येतुप कोर्ला
7 तुक क्यानी कोन्छ्योककी थु चाङ्माकी दुक सुङ्गिवी,
“हारिङ ख्यिरा कोन्छ्योककी सुङ्गुप ति थोसुङ सिसिन,
8 ख्यिरा हङ्गावातिवी दासा पाङ्थेरीला कोन्छ्योककी तेन्दोकला लावु दोके ख्यिरा ति सेम क्योङ्बु माजो।
ती पेला तिवी खोला खोक्पा ल्हानी खोकी तेन्दोकला लासुङ।
9 ते तिवी लो खल ङ्यी सेक खोकी क्यावु हलेवु लाकातिवा थोङ्सिनाङ खोला तेपा माक्यानी खोला खोक्पा ल्हासुङ।
10 तुक क्यानी ती मीतिवी थोक्ला खो छासे ङ्यिर्मु लानी दुक सुङ्सुङ,
‘तिवी सेम ति नरी ख्येम्नी देतुप तप्की ङे कला माङ्येन वे।’
11 तुक क्यानी खो ङ्यिर्मु लानी तिवाला दुक सिनी न क्याल्सुङ,
‘ङे ङासोप दासाला तिवा नाम्साङ शुकुप मेङ्येवी।’ ”
12 अच्युनुपतिवा, च्यक्पु किसा। ख्यिराङ सु साङ तेपा मिकिवु सेम दिक्छेन गल्नी ङोसु वोतुप कोन्छ्योकला क्युर्नी माज्योका।
13 यिने हारिङगी ङ्यिमा सिनी सिक्यावु तुजे वोता सेक ङ्यिमी टेङ ख्यिराङ च्यिककी च्यिकला टोङ्गु बिन। मिसियाङ दिक्पाकी जिनोक जोपला ख्येल्नी ख्यिरा सेम साङ तेरी क्योङ्बु जेवी।
14 दाक्पी गोमाला तेपा कितुप पेला तेन्तेन क्यावु ताम्ङेला तिङ्ला सेक डेकला देसिन दाक्पु ख्रीष्टला वोतुप ति तेरी मुला राङ थोप्किवी।
15 कोन्छ्योककी सुङला दुक सुङ्गिवी,
“हारिङ ख्यिरा कोन्छ्योककी सुङ थोसिन ख्यिरा हङ्गावी कोन्छ्योककी तेन्दोकला लावु दोके ख्यिराङ ति माकी।”
16 सी कोन्छ्योककी सुङ थोनी खोकी तेन्दोकला लासुङ? मोशाकी मिश्र लुङ्बा नेसुर तेन्नी टिनी वावु मीतिवा तेरीकी मिन रो?
17 सी मुला लो खल ङ्यी सेक कोन्छ्योककी ङ्यिर्मु क्या नाङ्सुङ? दिक्पा क्यानी ती दासा पाङ्थेरीला शेप मीतिवी मुला राङ मिन रो?
18 तमा सुला “ङे ङासोप दासाला शुकुप मेङ्येवी।” सिनी कोन्छ्योककी न क्यल वे? काङ खोकी सुङ्गुप सुङला मेङ्येन्दुप मीतिवी थोक्ला राङ सुङ्गुप मिन रो?
19 तुक क्यानी दाक्पी हाक्कोकिवी, तेपा माक्यावु तप्की तिवा ङासोपकी दासाला शुकुप माङ्येसुङ।