38
Doʼa i Wakutuuna Kapii
38:1-23
1 Zaburuna Daud. Zikiri i wakutuuna pasombaana kurubanina kaudhania.
2 E KAWASANA OPU, bholi uhukumuaku i nuncana amaramu,
bholi usikisaaku i nuncana pamurumu.
3 Roonamo anana panamu atongke i badaku,
tee o limamu amakaa abhebheaku.
4 Inda dhaangia o kalapena namisi i badaku roonamo pamurumu,
inda amatangka manga bukuku roonamo dosaku.
5 Manga kasalahaku abhari alaloia o bhaaku,
mboomo bhawa momatamo mpuu to iaku.
6 Manga kambelaku akobhou tee amabuto,
roonamo o kabhongo-bhongoku.
7 Kapiiku amatamo mpuu, sabutuna inda amembali kukakaro.
Saeoa kutangi mboomo mia momaporona incana.
8 Badaku amasodho roonamo amagari buluku,
inda dhaangia kalapena namisi i badaku.
9 Tanagaku amapupumo sabutuna inda kunamisi opeopea,
iaku kupekidhei roonamo alilaho ngangarandaku.
10 E Kawasana Opu, bhari-bharia pemeliliku atokamata i aroamu,
tee peenciku inda kubuniakea minaaka i Ingkoo.
11 Randaku akabhaka-bhaka tee o tanagaku indamo dhaangia,
mataku amarawumo.
12 Manga sabhangkaku indamo akasuiaku roonamo panyakiku,
witinaiku apekaridho minaaka i iaku.
13 Manga mia bhemopekamateaku ataakaaku katapu,
tee manga mia mohaejatiakana kadhaki to iaku apogauaka kahancuru.
Manga incia afikiriaka tuaapa carana amembali ahianati mia mosagaanana saeoa.
14 Maka iaku mboomo mia mabhongo inda moporango,
mboomo mia mobhea inda momembalina mopogau.
15 Atotuu, iaku mboomo mia inda moporango,
rampaakanamo incia sumai inda kutagali.
16 Maka iaku kuharapu i Ingkoo, e KAWASANA OPU.
E Kawasana Opu, e Aulataʼalaku, Ingkoomo bhemolawaniaku.
17 Iaku kupogau, "Ancosala manga incia akaunde-unde akamataaku kusukara,
atawa asomboaka karona wakutuuna akamataaku kusindoli."
18 Iaku saidhepo kumandawu,
tee atorotorosu kunamisi kapii.
19 Iaku kuʼakuia manga kasalahaku,
tee kulilaho wakutuuna kufikiri manga dosaku.
20 Manga musuku amakaa tee abhari mpuu,
manga incia abanciaku inda tee sababuna.
21 Manga mia abalasi kalapeku tee kadhaki,
tee amembali bhaliku garaaka iaku kupewau giu momalape.
22 E KAWASANA OPU, bholi ubholiaku.
E Aulataʼalaku, bholi upekaridho minaaka i iaku.
23 Tulungiaku pekadhei,
e Kawasana Opu, mopasalaamatiaku.