37
Kaunde-undena Mia Madhaki Sabantaramea
37:1-40
Zaburuna Daud.
 
Bholi uʼamara roonamo o mia mopewauna kadhaki,
bholi ugigibulu* tee pande gau-gau roonamo opea ipotibhaakana,
roonamo manga incia bhealausaka amatuu mboomo rumpu,
tee amalau mboomo penembula.
 
Paracaeamo i KAWASANA OPU, tee upewaumo momalapena,
mbooremo i lipu sumai tee uʼamani.
Kaunde-undemo roonamo KAWASANA OPU
sumaimo Incia bheadhawuakako opea ipeelumu.
Pasaraakaakea o dhadhimu i KAWASANA OPU tee uparacaeamo i Incia,
sumaimo Incia bheatulungiko.
Incia bheapatiumba kabanaramu mboomo kainawa,
tee o kaʼadilimu mboomo caheana matanaeo.
 
Tanangimo, bholi tee uuʼuumu i aroana KAWASANA OPU tee uantagimea.
Bholi uʼamara tee mia momalapena dhawuana,
atawa tee mia mopekagau.
 
Untomo uʼamara tee ubholimea opea ilumbuakana incamu.
Untomo uʼamara, roonamo giu incia sumai bheaumbaaka kadhaki.
Satotuuna o mia mopewauna kadhaki bheatopabinasa,
maka manga incia moharapuna i KAWASANA OPU bheapotibhaaka tana tinauraka ijanjiakana sumai.
 
10 Inda amangenge indamo bheadhaangia uka o mia madhaki.
Wakutuuna upeeloa i tampana, indamo tee manga incia.
11 +Maka o mia mopaporitambena karona bheakotinaurakaaka tana incia sumai,
tee akaunde-unde aniʼimati kasanaa motaralabhi-labhi.
 
12 Mia madhaki ahaejati inda momalape i mia mobanara,
tee apakiri-kiriakea tee ngincina.
13 Maka o Aulataʼala apotawaikia
roonamo akamatea ande o eona amakasumo.
 
14 Manga mia madhaki ahela ewangana tee apasiapu panana
to apekamate manga mia misikini tee manga mia monarakaa,
tee apekamate manga mia momakatena incana.
15 Maka manga incia bheatobhoki badana karona,
tee o panana manga incia bheatokatuki.
 
16 Saidhe o harataana mia mobanara
alabhi o kalapena minaaka i mia madhaki mobharina harataana.
17 Roonamo o takiona mia madhaki bheatokatuki,
maka o KAWASANA OPU bheajagani mia mobanara.
 
18 KAWASANA OPU ajagani dhadhina mia inda tee kasalahana,
tinaurakana manga incia sadhaadhaa saʼumurua.
19 Manga incia inda bheamaea i wakutuuna kanarakaa,
tee i wakutuuna kaara manga incia bheamambosu.
 
20 Maka o mia madhaki bheabinasa,
tee manga musuna KAWASANA OPU bheamofu, mboomo kamba-kamba i tana mokorumpu.
Manga incia bheamofu tee atopadha mboomo ombu.
21 Ande dhaangia iadhana mia madhaki, manga incia inda bheapambulia pendua opea iadhana sumai,
maka o mia mobanara abukeaka kaasi tee sadia apekadhawu.
22 Satotuuna o mia ibarakatina KAWASANA OPU bheakotinaurakaaka tana ijanjiakana sumai,
sainamo o mia itundana bheatopamofu.
23 KAWASANA OPU mosusuakana dhala mobanara,
to mia momalapena feʼelina mopasanaana ngangarandana.
24 Moomini asindoli incia inda bheamandawu
roonamo KAWASANA OPU atuko limana.
 
25 Pepuu minaaka kumangura sakawana kumancuana,
indapo mina kukamata mia mobanara abholia KAWASANA OPU,
atawa o siwuluna amembali pande pengkaemani.
26 Incia abukeaka kaasi tee sadia apekapaadha,
tee manga anana amembali barakati to incia.
 
27 Bholia momadhakina tee upewaumo momalapena,
sumaimo ingkoo bheusadhaadhaa umboore to saʼumurua.
28 Roonamo KAWASANA OPU amaasiaka pewau momalape tee moʼadili,
tee inda abholi manga mia mosaalihi.
Manga incia bheatojagani saʼumurua,
maka o siwuluna mia madhaki bheatopamofu.
29 Mia mobanara bheakotinaurakaaka tana ijanjiakana sumai,
tee amboore iwe sumai saʼumurua.
 
30 Mia mobanara o pogauna akohikimati,
bhari-bharia ipogauakana aʼadili.
31 Hukumuna Aulataʼalana manga incia adhikaia i nuncana ngangarandana,
tee o bhengkalana inda bheasindoli.
 
32 Mia madhaki amata-matai mia mobanara,
tee ahaejati apekamatea.
33 Maka o KAWASANA OPU inda bheataroakea amandawu i limana musuna,
atawa ataroakea atohukumu i wakutuuna atoʼadili.
 
34 Harapumo i KAWASANA OPU tee utaʼatia o parintana,
sumaimo Incia bheaangkako to apamembaliko mokotinaurakaakana tana ijanjiakana sumai,
tee ingkoo bheukamata manga mia madhaki atopamofu.
35 Saangu wakutuu kukamata mia madhaki mopisakina mia mosagaanana,
dhadhina mboomo puuna kau motuwuna ajulu amaoge tee amaowo i lipuna,
36 maka sapadhana sumai incia amofu, tee indamo atokamata.
Moomini kupeeloa, indamo kupotibhaakea.
 
37 Kamatea o mia inda tee kasalahana tee momakatena incana,
roonamo manga mia modhadhina mopomalape bheakaunde-unde o siwuluna naile itu.
38 Maka o mia mokodosa bheapabinasea bhari-bharia,
tee o siwuluna bheatopamofu.
 
39 KAWASANA OPU apasalaamati mia mobanara,
tee ajagani manga incia i wakutuuna kaseke.
40 KAWASANA OPU atulungi tee apasalaamati manga incia;
Incia apasalaamatia minaaka i manga mia madhaki,
roonamo manga incia apeulu i KAWASANA OPU.
* 37:1 ugigibulu: Maʼanana uʼiri. + 37:11 Mat. 5:5. 37:35 amaowo: Maʼanana "rimbun."