LIMBAANA
POGAU BHAA-BHAANA
Saro Limbaana atoala minaaka i kajadia bhaa-bhaana apetulatulaakea i nuncana boku incia sii, siitumo limbaana miana Israel minaaka i Mesir, tampana manga incia atopabhatua. I nuncana boku incia sii dhaangia talu weta:
1. Pabebasiana miana Ibrani minaaka i kapabhatua tee lingkaana manga incia i Gunu Sinai.
2. Pojanjiana Aulataʼala tee uumatina i Sinai. I miana Israel adhawuakea manga hukumu adati, pamarinta, tee agama to mosuluwina dhadhi.
3. Karajaana tampana sambahea tee sagala parakakasina to miana Israel, manga adati to manga imamu, tee carana sambahea i Aulataʼala.
Boku incia sii bhaa-bhaana apetulatulaaka opea ipewauna Aulataʼala i wakutuuna Incia apabebasi uumatina ipabhatua, kasiimpo aadhari manga incia amembali saangu lipu maoge, malape, tee atomuliangi.
Mia bhaa-bhaana i nuncana boku incia sii satotuuna Musa, mia ipilina Aulataʼala to akapalai uumatina alimba minaaka i Mesir. Tampa motomatauna mpuu minaaka i boku incia sii siitumo daftara 10 parinta i nuncana pasala 20.
Antona
Miana Israel apabebasia minaaka i Mesir 1:1--15:21
a. Kapabhatua i Mesir 1:1-22
b. Laahiriana Musa tee wakutuuna dhadhina i Midian 2:1--4:31
c. Musa tee Harun apoaro i raja Mesir 5:1--11:10
d. Raraea Paska tee bhoseana minaaka i Mesir 12:1--15:21
Minaaka i Tawo Gelaga i Gunu Sinai 15:22--18:27
Manga hukumuna Aulataʼala tee Pojanjiana 19:1--24:18
Kemana KAWASANA OPU tee manga adatina sambahea 25:1--40:38
1
Miana Israel Atopisaki i Mesir
1:1-22
1 O siimo sarona manga anana Israel moumbana i Mesir apobhawa tee Yakub. Manga incia aumba tee bhawinena tee manga anana sumbesumbere:
2 Ruben, Simeon, Lewi tee Yuda,
3 Isakhar, Zebulon, Binyamin,
4 Dan, Naftali, Gad, tee Asyer.
5 Bhari-bharia siwuluna umane ipokawaakana Yakub kabharina 70 mia. Maka Yusuf aporikana i Mesir.
6 Kasiimpomo amatemo Yusuf, mboo itu uka bhari-bharia witinaina tee bhari-bharia mia saʼumuru tee incia.
7 Manga miana Israel akoana-anamo koopu-opuamo tee ahandamo kabharina tee amadhei mpuu ajulu torotorosu tee amembali amakaa, sabutuna lipu sumai abukeaka manga incia.
8 Kasiimpomo atoangkamo samia raja bhaau moparintana i Tana Mesir, inda momatauna Yusuf.
9 Incia apogau i raʼeatina, "Manga miana Israel sumai atomaeka mpuu to ingkita, roonamo manga incia abhari mpuu tee alabhi kakaana minaaka ingkita.
10 Maimo ingkita tapeelo akala to manga incia, mamudhaakana inda arangani kabharina, tee ande dhaangia potimbea ancosala manga incia aposaangu naile itu tee musuta tee manga aewangi ingkita, kasiimpo alingka minaaka i lipu sii.''
11 Sababuna sumai, raja tee manga pagawena aangka manga miana Mesir mojaganina bhatua to apabhatua manga miana Israel tee karajaa pakisaa. Manga incia tabeana apabhangu kota Pitom tee kota Raamses to tampa adhika gandum tee manga bara sagaanana pewauna raja Mesir.
12 Maka sahandana apabhatuaia, sahandana arangani tee sahandana ajulu kabharina manga, sabutuna miana Mesir amembalimo amaeka i miana Israel sumai.
13 Sabutuna tee kasegana miana Mesir apakisaa miana Israel akarajaa,
14 tee apewau dhadhina manga incia anarakaa i nuncana kapabhatuana momatamona. Manga incia tabeana akarajaa tana reo tee bhatu bata tee bhari-bharia karajaa i inawu, sumaimo bhari-bharia karajaa tee kasegana apakisaakea i manga incia.
15 Kasiimpomo raja Mesir aparintaakea i manga bhisa koana miana Ibrani, samia sarona Sifra tee mosagaanana sarona o Pua,
16 pogauna, "Wakutuuna ingkomiu ubhisaaka bhawine Ibrani tee utulungi manga incia i tampa pakoana, ande ipalaahirina anana umane ingkomiu tabeana upekamatea, maka ande bhawine taroakea incia adhadhi."
17 Maka manga bhisa sumai amaeka i Aulataʼala tee inda apewau mboomo opea ipogauakana raja Mesir i manga incia. Manga incia ataroakea adhadhi manga anana umane sumai.
18 Kasiimpomo raja Mesir akembamo manga bhisa pakoana sumai tee aabha i manga incia, "Pokia ingkomiu upewau hali incia sii, utaroakea adhadhi manga anana umane siimpo molaahirina sumai."
19 Alawanimo manga bhisa pakoana sumai, "Roonamo bhawine Ibrani inda mboomo bhawine Mesir, maka alabhi kakaana. Indapo aumba bhisa pakoana, manga incia padhamo apalaahiri."
20 Sumaimo, Aulataʼala apewau malape i manga bhisa pakoana sumai. Miana Israel ahanda kabharina tee amembalimo amakaa mpuu.
21 Tee roonamo manga bhisa pakoana sumai amaeka i Aulataʼala, sumaimo manga incia abarakatia tee adhawua siwulu.
22 Kasiimpo Firaun adhawu parintana i bhari-bharia raʼeatina, kooni, "Bhari-bharia anaana umane miana Ibrani siimpo molaahirina tabeana atobhanaka i nuncana Umala Nil, maka bhari-bharia anaana bhawine taroakea adhadhi."