24
Paul Gavena Felix au naona i mairi
1 Aupom 5 au murina Pirisi ḡeḡetelarana Ananias ma dogadogara i ḡaira au Caesarea ai taurauetara wavana Tertelus maiteni.
2 Ma Paul i ḡoreiai gabemani au naona. Ma Tertelus i vomairi ma viwavuna i vikarei:
Au bada Felix vinualaulaunam, Am vibadanei ta mae ubauba ma ata nota eḡa aiwai. Ma kaua vouii ma aiaii u kaukauei ata dobu voana aubaina i voagu-kaueta.
3 Anatapuiai mepamepa a mamae a vinuaiai kaua tam awarim.
4 Wate eḡa ata ḡoei da ana visina-viraviraim. Ma lamna aubaina a ḡoeḡoei da uta rautaniḡaneu mara aburuna ava.
5 Tauai a nelaḡai da wei ravana lamna orana potapotana ma viḡaiḡaiawa tauvikareina mai Jew awarii dobu au anatapuna. Tauna boru vouna e ḡoreḡorei mai Nasaret ai bada.
6 Taui i ḡoei da Tempol maiteni ita tuvaidoedoei ma lamna aubaina a pani.
7
8 Ma rauetarei ma ma nelaḡai da ai viwavu lamna anatapui riwa kaua.
9 Ma mai Jew Tertelus au murina i mairi ma i riwa, “Wei babani anatapui riwa kaua!”
10 Anina ma Gavena Felix Paul i raumotemotei da ita babani. Paul babani i vikarei i pa:
Au bada vinualaulaunam, a aramanei da tam madeḡa biaḡa wei dobuna ai taurauetara lamna aubaina tau ana nuaubau ana babani aubaiu.
11 Am rava ina riwem da tau pom ota aupom 12 nanare a ḡeta memei au Jerusalem da Bada ata voepaepai.
12 Au tauviwavu eḡa ita nelaḡaiu ata viḡaiḡaiawa au Tempol bo au boru-numana bo mepa nanare au Jerusalem.
13 Ma ai viwavu tau awariu menanare tana aramanei da lamna riwa kaua?
14 Wate riwa kaua da tau amamata ai God a voepaepai ma Bada Iesu ana etanai, a votaḡotaḡoi ma taui e ririwa da wei lamna taparoro morumoruna. Wate nanare Moses tarawatu i girugirumi ma God ana peroveta nununai i girugirumia anatapuna a vivitumaḡanei.
15 Tau God awarina a vitumaḡana guratana me ravai nanare, da tauna muriai rava anatapui iraḡelei ina vilawana-melei, ravai aiaii ma rava apoapoei.
16 Lamna aubaina a kaukauana guratei da orau ina ai rava ma Bada awarii.
17 Jerusalem a netawanei madeḡa biaḡa i kwa ma pom ota a nememei da molamolakai ata puloi ma pulo ata kauei God awarina.
18 Tau aiaiu, maranaina i nelaḡaiu au Tempol viaina pulona a kaukauei. Eḡa patara maiteni ma eḡa visinaviravira.
19 Wate mai Jew ḡelaui Eisia provinsei i nei kampa. Taui mepa marina! Ita nei au naom da ai viwavu ita terei.
20 Bo babada weka ita riweta au apoapoe aiwai maranai boru ḡeḡetelarana au naona a mairi.
21 Wate mepa da maratagogi awarii a garara a pa, “A vitumaḡana da God rava anatapui iraḡelei ina vovaimairini! Lamna aubaina tau weka a maimairi.”
22 Felix tauna Bada Iesu ana Etanai riwana i aramana-kauei, boru i gudui ma i riwa, “Maranai sorodia ai bada Claudius Lisias ina nei, ma ina paribelem.”
23 Ma sorodia ai bada i egari da Paul ita inana-vaitetei ma ita voterei da ita bababara ma ana rava ita nei da ita raraugenari.
Paul Felix i viararamani
24 Aupom biaḡa au murina Felix awana Drusila maiteni i nei. Drusila lamna wavine Jew ei. Ma riwa i paritawanei da Paul i neiai, ma rava ai tumaḡana Iesu Keriso awarina i babaniei ma Felix i rautaniḡana.
25 Wate maranai Paul babani i vikarei da God ana ḡoana, da rava lawana aiaina ma jijimanina ina maeni, ma erawa kauai ma ḡoʼapoapoe ina geduaiei, aubaina mara e nenei maranai rava anatapui ina etarei. Felix wei babanina i nonori tauna i rovo ma Paul i riwei, “Ma nae! Ma maranai ana ḡoem lamna ana kwatuem.”
26 Ma Felix i ḡoeḡoei da Paul tauna manelei ita gwalai ma lamna aubaina mara i maḡa i raukwatuei ma awarina i babani.
27 Madeḡa ruaḡa au murina Felix i rautom ma ana gabu Posias Festus i vaia. Felix i ḡoei da wavana ita ai mai Jew awarii lamna aubaina Paul au numa panipani i votere-tawanei.