23
1 Paul boru ḡeḡetelarana i ʼnana-jijini ma i riwa, “Varevareiu tau au nola God awarina i jijimana ma orau aiaina da wei paratana.”
2 Ma Pirisi ḡeḡetelarana Ananias rava ḡelauna Paul au ririvana i maimairi i egari da Paul i raunavanavai.
3 Ma Paul Ananias i riwei, “God ina raunavanavaim, tam morumorum! Moses ana tarawatuei e rarauetareu wate maranai am rava u riwei da i raunavanavaiu tam tarawatu u viaigai.”
4 Taui Paul au ḡereḡerena i maimairi Paul i riwei, “Aiwai aubaina God ana Pirisi Ḡetelarana e vivijiboḡi?”
5 Paul i paribelei, “Varevareiu eḡa ata aramanei da tauna God ana Pirisi ḡeḡetelarana. Au buka i terei da Eḡa God ana taunola ma parivai-apoapoeni.” (Exodus 22:27)
6 Anina ma Paul i ʼnanai da Sadusi ma Pharisi ḡelaui kampa ma ponana i rata ma i riwa, “Varevareiu tau Pharisi, amau maiteni Pharisi. A vivitumaḡana da God rava iraḡelei ina vovaimairini wei lamna aubaina taumi o etaetareu!”
7 Maranai wei i latoni Pharisi ma Sadusi viparipariniḡai i raukarei ma boru i kai da ruaḡa.
8 Aubaina Sadusi e ririwa da rava e irairaḡe lamna eḡa ita vovomairi me, ma anela da aruarua eḡa ita vivitumaḡanei, wate Pharisi wei anatapui e vivitumaḡanei.
9 Ḡaiawa ḡaeḡaena i tupua ma tarawatu babadai ḡelaui taui Pharisi, i vomairi ma i babani guratana i pa, “Tauai eḡa aiwai apoapoena ata inanai wei ravana awarina! Mepa da anela bo Bada Aruana tauna awarina i babani?”
10 Viḡaiḡaiawa ḡaeḡaena i tupua ma sorodia ai bada i rovo mepa da rava Paul ina viaisikasikai ma sorodia i egari da i rui ma Paul i taravaina-opunei ma ina naieiau bareki.
11 Ma waguvarai ḡelauna, Bada Paul au ririvana i mairi ma i riwei, “Tepam ina tora! Me aubaiu u jima au Jerusalem nanare aubaiu au Rome ma jima.”
Mai Jew i vioga da Paul ina viraḡeni
12 Ubaubanai mai Jew ḡelaui i vitagogiei ma i viogatara ma i parivainuaḡana da eḡa ina am bo ina uma da Paul ina viraḡeni.
13 Nelara 40 nanare i vianina da Paul ina viraḡeni.
14 Taui i nae pirisi babadai ma dogadogara awarii ma i riwei, “Tauai parivainuaḡana bagibagina a kauei da eḡa ana am da Paul ana viraḡeni.”
15 Taumi Boru ḡeḡetelarana maiteni ona moru ma riwa ona pari-tawanei sorodia badana awarina da Paul ina neiai ma ona vitara-virevirei da riwa kaua ona vaia. Tauai ana vipaipai da ana viraḡeni muriai da weka ina ḡetai.
16 Wate maranai Paul avuna wei ogatarana i nonori ma i nae sorodia ai au bareki ma Paul i pariverei.
17 Ma Paul sorodia badana i ḡoreiai ma i riwei, “Wei laragana laḡilaḡina ma naiei ami bada awarina da ana riwa ina riwei.”
18 Ma i naiei ai bada ḡaeḡaena awarina ma i riwei, “Panipani wavana Paul riwa i paritawanei awariu ma i riweu da wei laragana ata neiai awarim aubaina am riwa awarina.”
19 Sorodia ai bada ḡaeḡaena laraga i vinimavoai ma i maeria ma i paridadanei, “Am riwa aiwai ma riweu?”
20 I riwa, “Mai Jew i riwa da ita vibaḡaim da au maratom Paul uta naiei ai au Boru ḡeḡetelarana, Wei anatapuna moru.
21 Wate eḡa ma rautaniḡanei aubaina rava 40 nanare pota e paipaini da ina viraḡeni. Taui i vioga da eḡa ina am da Paul ina viraḡeni. Taui i vokaukaua ma am vianina ava e paipaini.”
22 Ma bada laraga i riwei da eḡa aiai ina riwei ma i paritawanei.
Taui Paul i paritawanei Gavena Felix awarina.
23 Anina ma sorodia ai bada ḡaeḡaena babada ruaḡa i ḡoreiai ma i riwei, i pa, “Sorodia sod ravai 200, aiera ravai 200 ma hos ravai 70 ma vaia ma ona vokaukaua da waguvarai 9 oklok ona vomairi.
24 Hos biaḡa ona vaia Paul aubaina da aiaina ona naiei gavena Felix awarina au Caesarea.”
25 Ma sorodia ai bada pepa wenanare i girumi:
26 Tau Claudius Lisias, a girugiruma awarim au bada vinualaulaunam, Gavena Felix.
Egualau.
27 Mai Jew wei orotona i vojijini ma ita viraḡeni, wate maranai a nonori da tauna Rome-ei ma lamna aubaina au sorodia maiteni a opu da au urai a vaitawanei.
28 A ḡoei da ata aramanei ana apoapoe aiwai, da ata naiei ai Boru ḡeḡetelerana awarina.
29 Ma a nelaḡai da viwavuna lamna tauiava ai tumaḡana kauai ma Rome ana tarawatuei lamna tauna eḡa aiwai apoapoena ita kauei da ata viraḡeni bo ata pani.
30 Maranai riwana a vaia da mai Jew i ḡoei da govagovaḡanei tauna ita vunui. Lamna maratagogi a paritawanei awarim, ma nanare tauviwavu a riwana-guratei da kampa ina ḡetai da ai viwavu ina kauei.
31 Ma sorodia ai babada i ririweia nanare i kauei ma waguvarai Paul i taravaini ma i naiei da au taon Antipatris i ḡeta.
32 Au maratomna aiera ma sod sorodiai i naeme au Jerusalem ma hosi sorodia Paul i naei au Caesarea.
33 Maranai hosi sorodiai au Caesarea i ḡeta pepana ma Paul gavena i veredamanei au urana.
34 Gavena pepa i ʼavi ma Paul i paridadanei metauna provins-na u tupua ma i riwa, “Silisia.”
35 Gavena i riwa i pa, “Am etara ana nonori maranai am tauviwavu ina ḡetai.” Ma sorodia i naiei Herod numa i voavoaiana da ita inana-vaitetei.