50
Kufugamila kwa kukomya
(Zabuli ya Asafu.)
1 Nguluwi wa mong'ho, Mkulu Nguluwi, nakalonga na kuwachema walingikala muisi,
kulawa kwa isanya mbaka kuzibila kwake.
2 Kulawa Siyoni, muji unojile lukami,
Nguluwi nakelajila, yolangaza.
3 Nguluwi wa hetwe kanguya, haiwele tulu,
chiluli chilingulakaza nhimwa changumlongola,
chivuluvumbi chikulu changumzunguluta.
4 Kulawa kuchanya kanguvichema kilanga na isi,
vilole vyoyalinguwatagusa wanhu wa heye.
5 Mng'hungajizile wanhu wa heni wa kukundigwa,
wawele nawadita ilagano na heni kwa nhambiko.
6 Ulanga wanguwikula kutanganika kwa Nguluwi,
kota Nguluwi yuye ndo mtagusa.
7 “Mhulichize wanhu wa heni, chondilingulonga.
Isilaeli, ndangukulonjeleza.
Heni nda Nguluwi. Heni nda Nguluwi wa hegwe.
8 Hambe ndikung'hanuchile kwa chiwalo cha nhambiko za hegwe,
hulechile kundavila nhambiko za kulakazwa.
9 Kwa kukomya hambe ndiligane ibuguma lya ibani lya hegwe,
ne ipongo kuli ibani lya hegwe,
10 kwa vila migongolo jeng'ha ja kisolo ndo ja heni,
maelufu ga migongolo kuli vidunda ndo ja heni.
11 Ndanguchizela chila chideje cha kuli vidunda,
vilumbigwe vyeng'ha vya kuli chiwala ndo vya heni.
12 “Wone ndahawele na nzala hanasali kukulonjela hebu,
kwa vila isi zeng'ha na vyeng'ha viwele mgati ndo vya heni.
13 Ndaze, wangijesa ndangulya iwunde lya ibuguma,
ama kunwa danda ya mhene?
14 Kulonga malumbo kuwe ndo nhambiko ya hegwe kwa Nguluwi,
mwenezele Nguluwi Yawele Kuchanya chilaho cha hegwe.
15 Unyheme mhela wa magazo,
nani ndokulohola, nagwe konyhulichiza.”
16 Ila Nguluwi kangumlonjela munhu mwihe,
“Kuna choni kugalongalonga hela mizilo ja heni?
Lekachoni kwangulongalonga kwa chiwalo cha ilagano lya heni?
17 Hegwe kwanguzudila makanyo ga heni,
ulonzi wa heni hulingugana kuuwinza.
18 Loumona mhizi kwanguwa hamwe na heye,
wang'hondwa kwangihanza nawo.
19 Kwa goya mazuwa gose kulonga gehile,
mijito ja umyango wa hegwe ndo kulonga udesi.
20 Kwangikalisa na kumheha myago,
ena kumlonjeleza mng'holozo.
21 Nakudita aga geng'ha nani nanyamalila.
Ndaze, wangijesa kukomya heni nda kota hegwe?
Ila sambi ndangukung'hanuchila,
ndangulonga nongwa za hegwe hazelu.
22 “Mijese goya mbuli ayi, hemwe mlingumsemwa Nguluwi,
ama ndowadumya hemwe,
ne hakuwa na wa kuwalohola.
23 Yalingumha heni malumbo kota ndo nhambiko ya heye,
ayo ndo yalingunyhulichiza,
yoneche yalingibatilila nzila ya heni Nguluwi,
ayo ndo yondimlohola.”