49
Upoka wa kitumbila kuli lufufu
(Kwa yalingwaluchiza kwimba. Zabuli ya Wakola.)
1 Mhulichize mbuli ayi hemwe wanhu wa isi zeng'ha,
muwiche goya makutu hemwe wenyeng'haye mweng'ha wa isi,
2 mhulichize mweng'ha wakulu na wadodo,
wawele na lufufu na wazunwa hamwe.
3 Majesa ga heni gowa ga kitunya,
ndolonga ulonzi uwele na luhala.
4 Ndowika goya ikutu lyangu leka nyhulichize nhelo,
ndotang'hula nhelo kwa muziki wa igombogombo.
5 Lekachoni ndumbe zuwa lihile,
hondizungulutwa na wihe wa mng'honyo?
6 Wanhu wehile wangitumbila lufufu lwao,
wangitogola kwa winji wa lufufu lwao.
7 Ila munhu howeza kumgombola yunji,
hambe yaweze kumhilusila Nguluwi chasi cha ukomu wa heye,
8 kwa vila chasi cha ukomu ndo chikulu ng'hatu.
Howeza kulavya chinhu choneche chiwele chohega,
9 chiwele chomdita yekale mazuwa gose,
yaleche kwinjila kuli chilaga.
10 Weng'ha wanguvizela kota mbaka wawele na luhala wangubagama,
wasowile nyhala mbaka wapoka kahi wangubagama.
Weng'ha awo wanguwalechelaga wanji lufufu lwao.
11 Vilaga vyopona kuwa haluga ha hewo mazuwa gose,
ndo ng'handa ya lulelo mbaka lulelo,
hanga nawali na migunda jiwele nawajichema kwa matagwa ga hewo.
12 Munhu halingikala ng'hatu kuli lufufu lwa heye,
kobagama hela kota igongolo.
13 Ago ndo gowapata hewo wapoka,
kahi walinguwawinza hewo wawele nawakunda ulonzi wa hewo.
14 Wolongozwa kota ming'holo mbaka kuli isi ya wabagame,
kubagama kowa mdimi wa hewo.
Watanganiche wowasumya hamitondo,
ng'huli za hewo zokola kuli chilaga,
kutali na ng'handa ng'hulu za hewo zinojile ng'hatu.
15 Ila Nguluwi kongombola na ako kuli isi ya wabagame.
Kombika habehi na heye.
16 Uleche kusumajila houmona munhu yowa na lufufu,
ne lutogo lwa ng'handa ya heye holukonjezeka ng'hatu.
17 Kwa vila hoyobagama hohola choneche,
lufufu lwa heye haludulika ako hasi hamwe na heye.
18 Hoyochidita ndo mkulu kuli ukomu awu
na kutogoligwa kwa chiwalo cha mbuli za heye kumlutila goya,
19 kochilumba na wasekulu wowamlongole kubagama,
wawele hawoweza kona kahi lumuli.
20 Munhu yawele na lufufu ne luhala,
ndo kota migongolo jilingubagama.