18
Lwimbo lwa kusumya
(2 Samweli 22:1-51)
(Kwa yalingwaluchiza kwimba. Lwimbo lwa Daudi, chitumagwa wa Nguluwi, lwoyamwimbile Mkulu Nguluwi zuwa lila loyamlohole mmoko mwa wang'honyo wa heye na mmoko mwa Sauli.)
1 Ndangukugana, gwa Mkulu Nguluwi, mong'ho wa heni.
2 Mkulu Nguluwi ndo italawe lya heni,
ngome ya heni na mlohozi wa heni,
Nguluwi wa heni, italawe lya heni yondilingumbilimila kikala goya,
ngawo ya heni na mong'ho wa ulohozi wa heni na ngome ya heni.
3 Nandimchema Mkulu Nguluwi, yalinguganigwa kutogoligwa yanhanze,
nani nandoholigwa kulawa kwa wang'honyo wa heni.
4 Kwa vila ng'weso za kubagama nazinzunguluta,
mazi tendema ga kudumya nagavaba heni,
5 ng'weso za kuli isi ya wabagame nazimbata,
midiwa ja kubagama najifika.
6 Kuli magazo ga heni nandimchema Mkulu Nguluwi,
nandimlilila Nguluwi wa heni yanhanze.
Kulawa kuli ng'handa ya heye, nakahulika lizi lya heni,
kulila kwa heni nakufika kuli makutu ga heye.
7 Aho isi naikakama na kutigasika,
na misisi ja vidunda najitigasika,
navitigasika kwa vila Nguluwi nayali yazudile.
8 Iyosi nalifung'ha kulawa kuli mhenyelo ya heye,
chiluli chilingulakaza nachilawa kuli mlomo wa heye,
makala ga chiluli nagaka kulawa kwa heye.
9 Nakagubula ulanga nakadulika,
ng'hungugu nhitu hasi ha magulu ga heye.
10 Nakakwina chilumbigwe chiwele na mabawa na kuguluka,
nakaguluka himahima mchanya mwa mbeho.
11 Nakegubika jiza banzi zeng'ha,
chigubiko cha heye nachali jiza,
nachali ng'hungugu ng'hulu ya kilanga.
12 Lumwemwesa nalumwemwesa hali heye,
kulawa kuli ng'hungugu nakulawila nhonya ya maganga na makala ga chiluli.
13 Mkulu Nguluwi nakabuma kulawa kilanga,
Nguluwi Yawele Kuchanya nakalavya lizi lya heye,
nhonya ya maganga na makala ga chiluli navilawila.
14 Nakawatozela wang'honyo misale ja heye na kuwasambalula,
nakatoza lumwemwesa, nakawawinga.
15 Kwa kung'hanuchila kwa hegwe, gwa Mkulu Nguluwi,
kwa lweselo lwa mhenyelo ya hegwe,
hasi ha bahali nakugubuligwa,
misisi ja isi najoneka hazelu.
16 Nguluwi nakagolola moko wa heye kulawa kuchanya na kundavya,
kulawa hasi ha mazi menji nakanyasula.
17 Nakandohola kulawa kwa mng'honyo wa heni yawele na mong'ho,
na kulawa kwa hewo wanzudile kwa vila nawali na mong'ho lukami kusinda heni.
18 Nawavaba vyombele kuli magazo,
ila Mkulu Nguluwi nayali kitumbila kwa heni.
19 Nakandavya na kunyhilika kuli kilejeha,
nakandohola kwa vila nakanojezwa na heni.
20 Mkulu Nguluwi nakamha heni chonolo kwa kiwhana na kutanganika kwa heni,
kiwhana na welile wa moko ga heni.
21 Kwa vila nandizibatilila nzila za Mkulu Nguluwi,
na simbelenhuche Nguluwi wa heni.
22 Kwa vila nhaguso za heye zeng'ha nazali hali heni,
silechile kuwinza malajizo ga heye.
23 Hali heye siwele na nongwa,
nandiwika kutali na gehile ga heni.
24 Lelo Mkulu Nguluwi nakamha heni chonolo kwa kiwhana na kutanganika kwa heni,
kwa kiwhana na welile wa moko ga heni hali heye.
25 Mkulu Nguluwi, hegwe kowa wa kukundigwa kwa wawele wa kukundigwa,
kwa walihela nongwa, kwangilajila kwahela nongwa.
26 Kwa heye yalingiyeliza kwangilajila kota ndo yelile,
ila kwa wajilile kwanguwaditila kota vyowalinguganigwa.
27 Kwa vila kwanguwalohola walingunyenyetela,
ila kwanguwadulisa walingidaya.
28 Kwa vila hegwe ndo ulingubwina chenje cha heni,
Mkulu Nguluwi, Nguluwi wa heni, kwanguwinga jiza lya heni.
29 Kwa utanzi wa hegwe ndanguwasumya wamizi,
londiwa hamwe na Nguluwi wa heni ndoweza kuzuma lukanzi.
30 Choyalingudita Nguluwi chahela nongwa!
Kulagana kwa Mkulu Nguluwi ndo kwa kukundigwa,
heye ndo ngawo kwa weng'ha walingumbilimila.
31 Whaani yawele Nguluwi, mzidi wa Mkulu Nguluwi?
Whaani yawele italawe lya kutwamila, kota Nguluwi wa hetwe?
32 Nguluwi ndo yalinguwopa heni isali liwele na mong'ho,
nakaidita nzila ya heni iwe inojile.
33 Nakadita magulu ga heni gawe nzinzili kota ga ibala,
na kumbika honhu hanojile mchanya mwa vinhembenhembe.
34 Kangundangusa kitowa ngondo,
leka moko ga heni gawe na mong'ho wa kukwega upinde uwele nzinzili.
35 Nakumha heni ngawo ya hegwe ya ulohozi,
moko wa hegwe wa kudilo naunhanza,
kunyenyetela kwa hegwe nakundita ndiwe mkulu.
36 Nakundita njende kwa kilejeha,
leka magulu ga heni galeche kutelela.
37 Nandiwawinza wang'honyo wa heni na kuwafichila,
sihiluche kumbele mbaka lowadumigwe.
38 Ndowatowanga leka walemwele kwinuka kahi,
wogwa hali magulu ga heni.
39 Hegwe nakundita ndiwe na mong'ho wa kitowa ngondo,
nakuwadulisa wang'honyo hali heni.
40 Nakuwadita wang'honyo wa heni wabilime,
wala wanzudile nandiwadumya.
41 Nawatowa iyowe lya kulanda utanzi, ila hakuwele na wa kuwalohola,
nawamlilila Mkulu Nguluwi ila hawedichile.
42 Nandiwatowa, nawali kota nhimbwisi hali mbeho,
nandiwatoza hanze kota nhope mnzila.
43 Hegwe nakundohola kulawa kuli kutowigwa na wanhu,
nakundita ndiwe chilongozi wa wanhu wa isi.
Wanhu wohambe ndiwazele nawang'holela mijito.
44 Wajenzi nawoya na kufugama kwa heni,
lowahuliche malajizo ga heni, nawanyhulichiza.
45 Wajenzi watweguche nhumbula,
nawoya kulawa kuli ngome za hewo wokakama.
46 Mkulu Nguluwi ka mkomu! Yatambichizwe italawe lya heni!
Yatogoligwe Nguluwi wa ulohozi wa heni.
47 Heye nakandita nyhilule chibida,
na kuwadita wanhu walemwele hali ludali lwa heni.
48 Nakundohola kulawa kwa wang'honyo wa heni.
Ena, kwangunyhinula leka ndiwe mchanya ng'hatu mwa wang'honyo wa heni,
na kundohola kulawa kwa wehile.
49 Ahyo, ndokutogola, gwa Mkulu Nguluwi, hali isi zeng'ha,
ndolimbila lutogo itagwa lya hegwe.
50 Nguluwi kangumtambichizaga mndewa wa heye kusumya kukulu,
kangulajilaga igano lya kwimilila kwa yabakalizwe mafuta wa heye,
ena, kangumditilaga ahi Daudi na walelwa wa heye mazuwa gose.