17
Kulanda kwa munhu yanojile
(Kulanda kwa Daudi.)
1 Gwa Mkulu Nguluwi uhulichize chiwalo cha heni cha hachi,
uhulichize chililo cha heni,
uhulichize kulanda kwa heni kulihela uhadi.
2 Utaguso wa heni uye kulawa kwa hegwe,
kwa vila hegwe kuizela mbuli iwele ya hachi.
3 Hegwe kwanguizela ng'hatu nhumbula ya heni,
nakumbuyila nechilo kumhugajiza,
nakumbika kuli kujezigwa.
Huweza kuwona wihe mgati mwa heni,
nanyamula silonga chinhu chihile.
4 Kuwala madito gowalingudita wanhu,
heni nyhulichiza malajizo ga hegwe,
nandiwika kutali na nzila za wanhu wehile.
5 Mbinza ng'hatu nzila ya hegwe,
ne hado silechile hebu.
6 Ndangukuchema, hegwe Nguluwi, kwa vila hegwe kwangunyidichila,
unyhulichize goya, uhuliche ulonzi wa heni.
7 Ulajile kunoga kwa igano lya hegwe lya kwimilila,
uwalohole kulawa kwa wang'honyo wa hewo,
wala walingubilimila kikala goya kwa hegwe.
8 Unyamile kota vyoulingulyamila iziho lya hegwe,
uvise heni kuli lubehelo lwa mabawa ga hegwe,
9 kutali na kudumigwa na wehile,
kutali na wang'honyo wa heni walinguzunguluta.
10 Awo wahela isungu lyoneche mnhumbula,
wamema ulonzi wa kidadambala.
11 Wangumbinza na kunzunguluta,
wangumbeteza heni leka wangwise.
12 Wangugana kundadula kota isimba.
Kota isimba lilingupelemba.
13 Winuche, gwa Mkulu Nguluwi,
witowe na hewo na kuwagwisa.
Kwa ipanga undohole kulawa kwa wang'honyo.
14 Kwa moko wa hegwe, gwa Mkulu Nguluwi,
undohole kulawa mmoko mwa wanhu awo,
wanhu wawele ng'hano ya hewo ndo kuli isi ayi hela.
Uwamemeze magazo gouwawichile,
leka wawenago ga kuhega na wana wa hewo,
wawalechele mbaka wazukulu wa hewo.
15 Nani kuli kutanganika ndokona kumeho kwa hegwe,
hondililimka ndomema kusangalala kwa kukona.