145
Lwimbo lwa kumtogola Nguluwi
(Lwimbo lwa lutogo lwa Daudi.)
1 Ndokutogola, gwa Nguluwi wa heni na mndewa wa heni,
ndolipa ukulu itagwa lya hegwe mazuwa gose na mazuwa gose.
2 Ndokutogola chila zuwa,
ndolitogola itagwa lya hegwe mazuwa gose na mazuwa gose.
3 Mkulu Nguluwi ndo mkulu, kanguganigwa kupegwa lutogo lwinji,
ukulu wa heye hauweza kupugajizika.
4 Lulelo mbaka lulelo, lutogo lwa madito ga hegwe lwosimilwa,
awo wowikula madito ga hegwe makulu.
5 Wolonga ukulu wa ludali lwa hegwe.
Ndogajesa madito ga hegwe ga kububuwaza.
6 Wowikula ukulu wa mong'ho wa madito ga hegwe ga kububuwaza,
nani ndowikula ukulu wa hegwe.
7 Wowikula lutogo lwa kunoga kwa hegwe kwinji,
na kwimba kwa chiwalo cha kutanganika kwa hegwe.
8 Mkulu Nguluwi kana isungu na uliholile,
halinguzudilaga himahima, nakamema igano lya kwimilila.
9 Mkulu Nguluwi ka yanojile kwa weng'ha,
ndo yawele na isungu kwa vilumbigwe vya heye vyeng'ha.
10 Vilumbigwe vya hegwe vyeng'ha vyolonga malumbo kwa hegwe, gwa Mkulu Nguluwi,
nawo wa kukundigwa wa hegwe wokutogola.
11 Wolonga ukulu wa undewa wa hegwe,
na kuwikula mong'ho wa hegwe ukulu,
12 leka chila munhu yagazele madito ga hegwe makulu,
na ukulu wa undewa wa hegwe.
13 Undewa wa hegwe ndo undewa wa mazuwa gose,
ludali lwa hegwe lukale lulelo lweng'ha.
Mkulu Nguluwi ka wa kukundigwa kuli kulagana kwa heye kweng'ha,
ka yanojile kuli madito ga heye geng'ha.
14 Mkulu Nguluwi kanguwatanzaga weng'ha walingugwa,
kanguwenulaga weng'ha walingugazika.
15 Vilumbigwe vyeng'ha vyangukulola kwa kitumbila ng'hatu,
nagwe kwanguvipa chilyo kwa mhela uwichigwe.
16 Kwangugubula moko wa hegwe kwa isungu,
kwanguvyenezela chila chovilingugana chila chilumbigwe chiwele na ukomu.
17 Mkulu Nguluwi ndo yatanganiche kuli nzila za heye zeng'ha,
ndo yanojile kuli madito ga heye geng'ha.
18 Mkulu Nguluwi ka habehi na weng'ha walingumlanda,
weng'ha walingumlanda kwa nhumbula igoloche.
19 Kanguwagalilaga chowalingugana weng'ha walingumdumba,
kanguhulichizaga chililo cha hewo na kuwalohola.
20 Mkulu Nguluwi kanguwamilaga weng'ha walingumgana,
ila kowadumya wehile weng'ha.
21 Ndowikula lutogo lwa Mkulu Nguluwi,
vilumbigwe vyeng'ha vilitogole itagwa lya heye lyelile,
mazuwa gose na mazuwa gose.