144
Malumbo kwa kusumya
(Lwimbo lwa Daudi.)
1 Yatogoligwe Mkulu Nguluwi, italawe lya heni,
yalingugadita moko ga heni gazowele kitowa ngondo,
na kuvilangusa vidole vya heni kitowa.
2 Heye ndo igano lya kwimilila lya heni na ngome ya heni
yalingunyamila na mlohozi wa heni,
heye ndo ngawo ya heni na honhu ha heni ha kubilimila,
kanguwasumyaga wanhu wa isi zinji na kuwawika hasi ha heni.
3 Gwa Mkulu Nguluwi, munhu ndo choni mbaka umlolele?
Munhu ndo choni mbaka umjese?
4 Munhu ndo kota lweselo hela,
mazuwa ga heye ndo kota isisila lilingukola.
5 Uchumule ulanga wa hegwe, gwa Mkulu Nguluwi, uduliche.
Uvidolize vidunda navyo vilavye iyosi.
6 Wambuze lumwemwesa, luwasambalule wang'honyo,
utowe misale ja hegwe, leka wabilime.
7 Ugolole moko wa hegwe kulawa kuchanya,
undohole na kumbusa kuli mazi aga menji,
umbuse kuli moko ga wajenzi,
8 wawele wangulongaga ulonzi wa udesi,
wangugololaga moko kwa ulolezi wa udesi.
9 Gwa Nguluwi, ndokwimbila lwimbo lunyale,
ndokutowela ching'weleng'wele cha ng'weso kumi,
10 hegwe ulinguwapa wandewa kusumya,
ulingumlohola Daudi chitumagwa wa hegwe.
11 Undohole na ipanga lya mng'honyo yamemile wihe,
umbuse kuli moko ga wajenzi,
wawele wangulongaga ulonzi wa udesi,
wangugololaga moko kwa ulolezi wa udesi.
12 Wasongolo wa hetwe wakule goya kota mizuchila kuli kagunda,
wahinza wa hetwe wawe kota mizengo jihongoligwe kwa kuinoliga ng'handa ya mndewa.
13 Ng'hano za hetwe zimeme mbena.
Ming'holo ja hetwe kuli migunda jilele maelufu kwa maelufu.
14 Migongolo ja hetwe jiwe jinenehe na mong'ho,
jileche kwajiliza nyinda ne kulela mhela haunafika,
ne chililo cha magazo kuli vijiji vya hetwe.
15 Kukomya, nawatambichizwa wanhu wa isi wawele watambichizwe mbuli azo.
Nawatambichizwa wanhu wa isi wawele Nguluwi wa hewo ndo Mkulu Nguluwi.