112
Kusangalala kwa munhu yanojile
1 Mumtogole Mkulu Nguluwi.
Katambichizwa munhu yalingumdumba Mkulu Nguluwi,
yalingusangalala ng'hatu kibatilila malajizo ga heye.
2 Walelwa wa heye wowa wawele na mong'ho kuli isi,
wana wa wagoloche nhumbula wotambichizwa.
3 Kuli ng'handa ya heye kowa na lufufu lwinji,
kutanganika kwa heye kwangikala mazuwa gose.
4 Munhu yanojile kangulangaziwaga lumuli kuli jiza,
munhu yawele na isungu na yaliholile na yatanganiche.
5 Ganojile gomuyila munhu yula yawele na isungu na yalingwazika ne kugana mzidi,
yalingudita mbuli za heye kwa hachi.
6 Yatanganiche hotigasika hebu,
kokumbuchilwa mazuwa gose.
7 Halingudumba hoyofichigwa na mbuli yihile,
kana nhumbula iwele nzinzili na kangitumbila kwa Mkulu Nguluwi.
8 Ka nzinzili mnhumbula, hodumba hebu,
naye kowona wang'honyo wa heye wosumigwa.
9 Kangulavyaga kwa isungu na kuwapa wazunwa,
kutanganika kwa heye kwangikala mazuwa gose.
Ludali lwa heye lwangutogoligwa kwa kuhulichizwa.
10 Wanhu wehile wangugona ago na kuzudila,
wangujejedaga mizino kwa kuzudila na kubilabila ng'hatu,
kitumbila kwa munhu yehile kwangwajilila hela.