111
Madito makulu ga Nguluwi
1 Mumtogole Mkulu Nguluwi.
Ndolonga malumbo Mkulu Nguluwi kwa nhumbula ya heni yeng'ha,
hamwe na ikugusi lya wanhu watanganiche.
2 Madito ga Mkulu Nguluwi ndo makulu ng'hatu.
Weng'ha walingusangalalila wanguwaga wogajesa.
3 Chila choyalingudita chimema ukulu na lutogo,
kutanganika kwa heye kwangikala mazuwa gose.
4 Nakambuza madito ga heye ga kububuwaza gakumbuchilwe.
Mkulu Nguluwi ka yanojile na yawele na isungu.
5 Kanguwapaga chilyo walingumdumba,
mazuwa gose kangulikumbuchilaga ilagano lya heye.
6 Nakawalajila wanhu wa heye mong'ho lwa madito ga heye,
nakawapa isi za wanhu wa isi zinji ziwe uhalizi wa hewo.
7 Madito ga heye ndo ga hachi na ga kukundigwa,
malajizo ga heye geng'ha ndo ga kukundigwa,
8 gangikala mazuwa gose,
nagalavigwa kwa hachi na kutanganika.
9 Nakawagombola wanhu wa heye
na kudita na hewo ilagano lya mazuwa gose.
Heye ka yelile na wa kukabusa ng'hatu.
10 Kumdumba Mkulu Nguluwi ndo msisi wa luhala,
weng'ha walingibatilila malajizo ga heye wangutambichizwa luhala.
Lutogo lwa heye lwangikala mazuwa gose.