22
Yosiya kangulongoza Yuda
(2 Mihela 34:1-2)
1 Yosiya nayali na miyaka nane loyaluche kulongoza. Nakalongoza ako Yelusalemu kwa miyaka makumi gadatu na umwe. Mayake nayali yochemigwa Yedida, mhinza wa Adaya, mwenyeng'haye wa muji wa Bosikati.
2 Yosiya nakadita mbuli zigoloche hali Mkulu Nguluwi na kuwinza nzila zeng'ha za mndewa Daudi, sekulu wa heye. Hagaluchile kuli kumoso ne kudilo.
Chitabu cha malajizo changoneka
(2 Mihela 34:8-28)
3 Kuli mwaka wa kumi na nane wa ulongozi wa heye mndewa Yosiya, nakamlajiza yalingwandika Shafani, mwana wa Asaliya, mwana wa Meshulamu, kuluta kuli ng'handa ya Mkulu Nguluwi. Nakalonga,
4 “Ulute kwa mtambika mkulu Hilikiya na umlonjele yawaze zila sendi zigaligwe kuli ng'handa ya Mkulu Nguluwi, ziwele wamizi wa kuli lwizi nawakongoza kulawa kwa wanhu.
5 Walonjele wawape wanhu wahaguligwe kujilolela mijito ja ng'handa ya Nguluwi. Walonjele wanhu wano wawalipe wakola mijito walinguzenga kahi ng'handa ya Mkulu Nguluwi,
6 wawele ndo walinguhongola vinhu vya mbawo na walinguzenga ng'handa na walinguhongola maganga. Walonjele kahi wagule mbawo na maganga gahongoligwe kwa chiwalo cha kuzenga kahi ng'handa ya Mkulu Nguluwi.
7 Wanhu walingulolela mijito ja kuzenga, waleche kulavya hisabu ya sendi zowapegwe kwa vila wangukola mijito kwa kukundigwa.”
8 Hamba Hilikiya, mtambika mkulu, nakamlonjela Shafani yalingwandika, “Nandichona chitabu cha malajizo kuli ng'handa ya Mkulu Nguluwi.” Hilikiya nakamha Shafani chitabu chila, naye Shafani nakasoma malajizo gawele amo.
9 Hamba Shafani, yalingwandika, nakaluta kwa mndewa na kumha mbuli ayo, yolonga, “Vitumagwa wa hegwe nawalavya zila sendi ziwele nazali mgati mwa ng'handa ya Mkulu Nguluwi na kuwapa wanhu walingulolela mijito ja ng'handa ya Mkulu Nguluwi.”
10 Shafani nakamlonjela mndewa, “Mtambika Hilikiya nakamha chitabu achi.” Naye Shafani nakasoma malajizo gawele amo hali mndewa.
11 Mndewa loyahuliche ulonzi wa chila chitabu cha malajizo, nakadadula mivalo ja heye kwa masinzo.
12 Mndewa nakawalajiza mtambika Hilikiya na Ahikamu, mwana wa Shafani na Akiboli, mwana wa Mikaya na Shafani yalingwandika na Asaya, chitumagwa wa mndewa, yolonga,
13 “Mlute mkamuuze Mkulu Nguluwi kwa chiwalo cha heni na kwa chiwalo cha wanhu wanji na kwa wanhu wa Yuda weng'ha, kuwala ulonzi wandichigwe kuli chitabu achi chiwele nachoneka. Ng'halazi ya Mkulu Nguluwi naing'hang'hala kwa chiwalo cha hetwe, kwa vila wasekulu wa hetwe hawauhulichize ulonzi wa chitabu achi. Hawaditile kwa kiwhana na gala geng'ha gandichigwe amu kuwala hetwe.”
14 Ahyo mtambika Hilikiya na Ahikamu na Akiboli na Shafani na Asaya, nawaluta kulongasa na mloli mdala, yalinguchemigwa Huluda, yawele nayali mche wa Shalumu, mwana wa Tikwa, mwana wa Halihasi, yalingulolela chihengo cha mivalo. Huluda nayali yochikala Yelusalemu kuli chijiji cha keli.
15 Lelo yula mloli mdala nakawalonjela kota Mkulu Nguluwi, Nguluwi wa Isilaeli kangulonga hino, “Mumlonjele ayo munhu yawele nakawalajiza hemwe kwa heni kota
16 ndokugala kudumya hali honhu hano na kwa wanhu wake, kwa kiwhana na chila chinhu chandichigwe kuli chitabu acho, chisomigwe na mndewa wa Yuda.
17 Kwa vila nawandeka na kujifunyhizila ubani milungu na kunzudiza kwa jimalukolo jeng'ha jigongomanyigwe kwa mijito ja moko ga hewo, ng'halazi ya heni yokwaka mchanya mwa honhu aha, haiweza kuditigwa isindamale.
18 Ila mumlonjele mndewa wa Yuda kota
19 kwa vila nhumbula ya hegwe nayali ya kuhulichiza na kunyenyetela hali heni Mkulu Nguluwi, louhuliche londonjile kuwala honhu aha na kuwala wanhu wake, kota wanguganigwa kulechigwa wachiwa na kupanjilwa na kwa vila nakudadula mivalo ja hegwe na kulila hali heni Mkulu Nguluwi, nandikuhulika.
20 Lelo ndokukungajiza hamwe na wasekulu wa hegwe, nagwe kotiligwa kwa kikala goya. Meho ga hegwe hagokona kudumya kweng'ha kuwele ndokugala hali honhu aha.” Ahyo nawahilika mbuli ayo kwa mndewa Yosiya.