21
Manase kangulongoza Yuda
1 Manase nayali na miyaka kumi na mili loyaluche kulongoza. Nakalongoza ako Yelusalemu kwa miyaka makumi gahano na jihano. Mayake nayali yochemigwa Hefusiba.
2 Nakadita gehile hali Mkulu Nguluwi kwa kuwinza vihendo vihile vya wanhu wa isi wawele Mkulu Nguluwi nayali yawawinjile hali Waisilaeli.
3 Kwa vila nakahagongomanya kahi honhu ha kufugamila milungu hawele Hesekiya, mhaza wa heye nayali yahabomole. Nakahagongomanya kahi honhu ha kulavila nhambiko ha Baali na mizengo ja Ashela, kota Ahabu, mndewa wa Isilaeli vyoyaditile. Nakavifugamila vinhu vyeng'ha vya kuli ulanga.
4 Nakazenga honhu ha kulavila nhambiko kuli ng'handa ya Mkulu Nguluwi, honhu hawele Mkulu Nguluwi nayali yalonjile, “Hali Yelusalemu ndoliwika Itagwa lya heni.”
5 Kuli lugagala lweng'ha lwa ng'handa ya Mkulu Nguluwi, nakazenga honhu ha kulavila nhambiko kwa chiwalo cha vinhu vyeng'ha vya kuli ulanga.
6 Nakamlavya mwanage kota nhambiko ya kulakazwa kuli chiluli. Nakadita uhawi na kulagula na kuluta kulanda utanzi kwa walaguzi na kulonga na wanhu walingulongasa na mihoka. Nakadita gehile ng'hatu hali Mkulu Nguluwi, nakamzudiza.
7 Nakalihola limalukolo lya Ashela lyoyalihongole na kuliwika kuli ng'handa, iwele Mkulu Nguluwi nayali yawalonjele Daudi na Solomoni, mwanage, “Kuli ng'handa ayi na kuli Yelusalemu yondiihagule kulawa kuli nhanzi zeng'ha za Isilaeli, ndoliwika Itagwa lya heni mazuwa gose.
8 Sigadita kahi magulu ga Waisilaeli galubelube kulawa kuli isi yondiwapele wasekulu wa hewo, wone wowa wololela kuli kudita chila chinhu chondiwalajize na kikala kuli malajizo geng'ha gowapegwe na Musa, chitumagwa wa heni.”
9 Ila wanhu awa hawahulichize. Manase nakawajiliza, ahyo nawadita gehile ng'hatu kusinda gowaditile wanhu wa isi wawele Mkulu Nguluwi nayali yawadumye hali Waisilaeli.
10 Hamba Mkulu Nguluwi nakalonga kukolela vitumagwa wa heye waloli,
11 “Mndewa Manase nakadita mbuli azi za kuzudiza, mbuli zihile ng'hatu kusinda zila zowaditile Waamoli walongole na nakailongoza Yuda kuli gehile kwa jimalukolo ja heye.
12 Lelo, heni Mkulu Nguluwi, Nguluwi wa Isilaeli, ndokugala kudumya kukulu mchanya mwa Yelusalemu na Yuda mbaka makutu ga chila yumwe wone gohulika kuwala mbuli ayo gokwawa.
13 Ndoudumya muji wa Yelusalemu kota vila vyonditile kuli Samaliya na kwa mndewa Ahabu na walelwa wa heye. Ndoyusa Yelusalemu kota munhu vyoyalinguhovuga chisaye na kuchigubika.
14 Ndowaleka awo wanhu wa uhalizi wa heni wasigale na kuwawika mmoko mwa wang'honyo wa hewo. Wosukulwa lufufu lwa hewo na kuholigwa na wang'honyo wa hewo weng'ha kota wapogozi.
15 Ndowaditila ago geng'ha kwa vila nawadita gehile hali heni na kunzudiza kwaluchila hala wasekulu wa hewo lowalawile Misili mbaka mhela awu.”
16 Mzidi wa ago, Manase kahi nakabohola danda nyinji ilihela nongwa, ahyo nakaimemeza danda Yelusalemu yeng'ha. Kahi nakawambuza wanhu wa Yuda kudita gehile hali Mkulu Nguluwi.
17 Madito ganji ga ulongozi wa Manase na geng'ha goyaditile na gehile ga heye geng'ha, navyandichigwa kuli chitabu cha kukumbuchila kwa wandewa wa Yuda.
18 Manase nakabagama na kutiligwa kuli kagunda ka ng'handa ya chiundewa ya heye yuye, kuli kagunda ka Usa. Amoni, mwanage nakawa mndewa honhu ha heye.
Mndewa Amoni kangulongoza Yuda
(2 Mihela 33:21-25)
19 Amoni nayali na miyaka makumi meli na meli loyaluche kulongoza. Nakalongoza kwa miyaka mili ako Yelusalemu. Mayake nayali yochemigwa Meshulemeti, mhinza wa Halusi, kulawa Yotiba.
20 Nakadita wihe hali Mkulu Nguluwi, kota vila Manase, mhaza wa heye vyoyaditile.
21 Nakawinza nzila ya mhaza wa heye na kujikolela mijito jimalukolo jiwele mhaza wa heye nakajikolela mijito na kujifugamila.
22 Nakamleka Mkulu Nguluwi, Nguluwi wa wasekulu wa heye, hawinzile nzila za Mkulu Nguluwi.
23 Hamba vitumagwa wa Amoni nawewika goya kumditila vibi Amoni, nawamkopola kuli ng'handa ya heye.
24 Hamba wanhu wa isi ya Yuda nawawakopola weng'ha wawele nawamkopola mndewa Amoni. Nawamdita Yosiya mwanage, yawe mndewa honhu ha heye.
25 Madito ganji ga ulongozi wa Amoni na gala goyaditile, nagandichigwa kuli chitabu cha kukumbuchila kwa wandewa wa Yuda.
26 Amoni nakatiligwa kuli kagunda ka Usa. Yosiya mwanage, nakawa mndewa honhu ha heye.