5
Solomoni kangiwika goya kuzenga ng'handa ya Nguluwi
1 Mndewa Hilamu wa Tilo, loyahuliche kota Solomoni nakabakalizwa mafuta leka yawe mndewa honhu ha mhaza wa heye Daudi, nakalajiza wasenga kwa Solomoni, kwa vila heye Hilamu nayali goloko wa Daudi.
2 Solomoni nakahilika usenga kwa Hilamu yolonga,
3 “Kwanguvizela kota mhaza wa heni Daudi nakalemwela kuzenga ng'handa ya kumfugamila Mkulu Nguluwi, Nguluwi wa heye, kwa chiwalo cha kitowa ngondo na wang'honyo wa isi za habehi mbaka hala Mkulu Nguluwi loyampele kusumya.
4 Ila lelo, Mkulu Nguluwi, Nguluwi wa heni, nakamha heni kikala goya kuli banzi zeng'ha. Haduhu mng'honyo ne magazo.
5 Lelo, nanhuwila kuzenga ng'handa kwa chiwalo cha Mkulu Nguluwi, Nguluwi wa heni, kota Mkulu Nguluwi vyoyamlonjele mhaza wa heni Daudi, yolonga, ‘Mwanago yondimuwika kuli chigoda cha undewa honhu ha hegwe, ayo ndo kozenga ng'handa kwa chiwalo cha itagwa lya heni.’
6 Lelo, uwalajize wanhu wa hegwe wateme mielezi ja Lebanoni kwa chiwalo cha heni. Wanhu wa heni wokola mijito hamwe na wanhu wa hegwe, nani ndowalipa vitumagwa wa hegwe kota vyoulonga. Kwanguvizela kota haduhu wanhu walingudaha kutema migodi kota Wasidoni.”
7 Hilamu loyahuliche usenga awo kulawa kwa Solomoni, nakasangalala lukami na kulonga, “Mkulu Nguluwi yatogoligwe lehano, kwa vila nakamha Daudi mwana yawele na luhala yawalongoze wanhu wa isi ayi ng'hulu.”
8 Hamba, Hilamu nakalajiza usenga kwa Solomoni, yolonga, “Nambochela usenga wa hegwe wouulajize kwa heni, ndodita geng'ha goulingugana leka ndikupe mizinga ja migodi ja mielezi na mibeloshi.
9 Wanhu wa heni wojilavya mizinga ajo kulawa Lebanoni mbaka mbahali, nani ndojiwoha kuli vilundo mbaka honhu houlajila jilute. Ako ndojidohola, nagwe kojibochela. Kokweneza kugana kwa heni kwa kumha heni chilyo kwa chiwalo cha wanhu wa kaye kwa heni.”
10 Kwa nzila ayi, Hilamu nakamha Solomoni migodi jeng'ha ja mielezi na mibeloshi kota vyoyaganile,
11 naye Solomoni nakamha Hilamu lita lachi zine na elufu makumi gahano na zine (454,000) za ngano na lita lachi zine na elufu makumi gahano na zine (454,000) za mafuta ganojile ga mzeituni, kwa chiwalo cha wanhu wa kaye kwa heye. Solomoni nakalutilila kumditila ayi Hilamu chila mwaka.
12 Mkulu Nguluwi nakamha Solomoni luhala kota vyoyamlahile. Nakwali na kikala goya hali Solomoni na Hilamu, weng'ha weli nawadita ilagano hali hewo.
13 Mndewa Solomoni nakawakungajiza wanhu elufu makumi gadatu (30,000) kulawa chila honhu kuli isi yeng'ha ya Isilaeli, leka wakole mijito ja kukola lupichi.
14 Nakawahilika wanhu Lebanoni kwa kuwabagula kuli vilundo, wanhu elufu kumi kuli chila mwezi, ahyo nawekala Lebanoni kwa mwezi umwe na myezi mili nawekala kaye. Adonilamu ndo nayali chilongozi wa wanhu walingukola mijito kwa lupichi.
15 Solomoni nayali na vitumagwa wa kupika mhomolo elufu makumi saba (70,000) na wahongola maganga kuli vidunda elufu makumi nane (80,000),
16 hamwe na vilongozi elufu zidatu na miya zidatu wawele nawalongoza mijito ajo na kuwalolela wakola mijito weng'ha.
17 Kwa mzilo wa mndewa, nawabawa maganga makulu ga sendi nyinji, leka gahongoligwe na kuzenjela msisi wa ng'handa ya Nguluwi.
18 Ahyo ndo walinguzenga wa Solomoni na wa Hilamu na wanhu wa muji wa Gebali vyowahongole maganga na kuwika goya mbawo kwa chiwalo cha kuzenjela ng'handa ya Nguluwi.