4
Vilongozi wa Solomoni
1 Solomoni nayali mndewa wa isi yeng'ha ya Isilaeli.
2 Wano nawali wamwe wa vilongozi wa heye wakulu. Asaliya, mwana wa Sadoki, nayali mtambika.
3 Eliholefu na Ahiya wana wa Shausha, nawali walingwandika. Yehoshafati, mwana wa Ahiludi, nayali yalingwandika kukumbuchila.
4 Benaya, mwana wa Yehoyada, nayali chilongozi wa wamizi na Sadoki na Abiatali, nawali watambika.
5 Asaliya, mwana wa Natani, nayali chilongozi wa wakulu wa mikowa na mtambika Sabudi, mwana wa Natani, nayali goloko wa mndewa.
6 Ahishali, nayali mkulu wa ng'handa ya mndewa na Adonilamu, mwana wa Abuda, nayali yalingulolela mijito ja kukola lupichi.
7 Solomoni nayali kahi na vilongozi kumi na weli kuli isi yeng'ha ya Isilaeli. Awo nawapegwa mijito ja kuwinza chilyo kwa chiwalo cha mndewa na kwa chiwalo cha wanhu wa ng'handa ya heye mndewa. Chila yumwe wa hewo nakegala chilyo kwa mwezi umwe kuli chila mwaka.
8 Aga ndo matagwa ga vilongozi, Beni-huli, nakalongoza isi ya vidunda vya Efulaimu
9 na Beni-dekeli, nakalongoza miji ja Makasi na Shaalibimu na Beti-shemeshi na Eloni-beti-hanani.
10 Beni-hesedi nayali chilongozi wa muji wa Aluboti na Soko na isi yeng'ha ya Hefeli.
11 Beni-abinadabu, mlume wa Tafati, mhinza wa Solomoni, nakalongoza isi yeng'ha ya Nafoti-doli.
12 Baana, mwana wa Ahiludi, nakalongoza miji ja Taanaki na Megido na honhu heng'ha ha Beti-sheani iwele habehi na muji wa Saletani, kusini mwa muji wa Yesileeli na kulawa Beti-sheani mbaka muji wa Abeli-mehola mbaka kupuluta muji wa Yokimeamu.
13 Beni-gebeli nakalongoza muji wa Lamoti-gileadi hamwe na vijiji vya Gileadi viwele kuli isi ya Yaili, mlelwa wa Manase. Nakalongoza kahi mkowa wa Aligobu, uwele Bashani, najali miji mikulu makumi sita jizungulusilwe lukanzi na kuwichilwa fito za shaba kuli lwizi.
14 Ahinadabu, mwana wa Ido, nakalongoza muji wa Mahanaimu.
15 Ahimaasi, mlume wa Basemati, mhinza wa Solomoni, nakalongoza isi ya Nafutali.
16 Baana, mwana wa Hushayi, nakalongoza isi ya Asheli na Bealoti.
17 Yehoshafati, mwana wa Palua, nakalongoza isi ya Isakali.
18 Shimeyi, mwana wa Ela, nakalongoza isi ya Benjamini.
19 Gebeli, mwana wa Uli, nakalongoza isi ya Gileadi, ndo yila iwele naiholigwa na Sihoni, mndewa wa Waamoli na Ogu mndewa wa Bashani.
Mzidi wa awa kumi na weli, nakwali na mkulu yumwe yawele nayali yolongoza isi yeng'ha.
Ulongozi wa Solomoni wangulutilila goya
20 Wanhu wa Yuda na wa Isilaeli nawali wenji kota sangalaza za mhwani, nawalya na kunwa na kusangalala.
21 Solomoni nakalongoza undewa weng'ha wa kwaluchila lwanda lwa Eyufulate mbaka kuli isi ya Wafilisti na kuli mbaka wa Misili. Wanhu wa isi zeng'ha nawamkolela mijito na kulavya kodi kwa heye kuli mhela weng'ha wa kikala kwa heye.
22 Chilyo choyatumiye Solomoni kuli zuwa limwe nachali utimbo unojile lita elufu sita na miya sita na utimbo wunji wa hihi hela lita elufu kumi na zidatu na miya mbili
23 na misenga jinyatile kumi na misenga jilingulya kisolo makumi meli na ming'holo miya imwe, hamwe na ibala na chifuno na kulungu na ng'huku zinojile lukami.
24 Kwa vila Solomoni nakalongoza undewa weng'ha wa kolizinjilaga isanya mwa lwanda lwa Eyufulate, kwaluchila Tifusa mbaka Gasa, ahyo nayali na kikala goya kuli banzi zeng'ha.
25 Mazuwa geng'ha ga ulongozi wa heye Solomoni kwa wanhu wa Yuda na wa Isilaeli, kulawa Dani mbaka Beeli-sheba, nawekala kwa kikala goya chila munhu hali migodi ja heye ja mizabibu na mitini.
26 Solomoni nayali na vibumuli elufu makumi gane (40,000) kwa chiwalo cha falasi na mituka ja heye ja kubulunwa na wamizi wakwina falasi elufu kumi na weli (12,000).
27 Wala vilongozi kumi na weli, chila yumwe kuli mwezi woyalonjelwe, nawegala chilyo cha kuhega kwa chiwalo cha mndewa Solomoni na wanhu weng'ha walingulya hali chisaga cha mndewa. Nawali wokweneza chila chinhu chilinguganigwa.
28 Nawali wochigala kahi honhu ha vinhu vilinguganigwa vya shayili na misolo kwa chiwalo cha falasi na kwa falasi wanji walingubilima lukami.
Luhala lwa mndewa Solomoni
29 Nguluwi nakamha Solomoni luhala na nyhala ng'hatu na kuvizela lukami kuwele hakulinguweza kupimigwa kota sangalaza za mhwani.
30 Luhala lwa Solomoni nalwali lukulu kusinda luhala lwa wanhu weng'ha wa kolilawila isanya na kusinda luhala lwa wanhu wa Misili.
31 Nayali na luhala kusinda Etani, Mwesila na kusinda Hemani na Kalikoli na Dalida, wana wa Maholi. Lutogo lwa heye nalwenela kwa wanhu wa isi zeng'ha za habehi.
32 Nakandika nhelo elufu zidatu (3,000) na nzimbo elufu imwe na zihano (1,005).
33 Nakalonga mbuli zilinguwala migodi, kwaluchila mwelezi uwele Lebanoni na isopolo, mizuchila jilingota kuli lukanzi. Nakalonga kahi kuwala migongolo na videje na vilumbigwe vilingutambala viwele na danda izizime jilingulagaza mafinga, kota somba.
34 Wanhu wa isi zeng'ha nawoya kuhulichiza luhala lwa Solomoni, wawele nawalajizwa na wandewa weng'ha wa kuli isi zeng'ha wawele nawahulika kuwala luhala lwa mndewa Solomoni.