9
Abimeleki kangujeza kuwa mndewa
1 Abimeleki mwana mlume wa Yelubaali, nakaluta Shekemu kwa wang'holoze mayake, nakalongasa na hewo na lukolo lwa mayake, yowalonjela,
2 “Mlonje na wakulu wa Shekemu na muwauze, ‘Ndaze, lyakohi linojile kwa hemwe, wana wa Yelubaali weng'ha, wawele ndo wanhu makumi saba, kuwalongoza hemwe ama kulongozwa na munhu yumwe? Mkumbuchile kota heni Abimeleki, nda mng'holozenu.’ ”
3 Nawo wang'holoze mayake nawalongasa na wala wakulu wa Shekemu na nhumbula za hewo nazaluka kumuwinza Abimeleki, kwa vila nawalonga, “Ayu ka mng'holozetu.”
4 Nawamha Abimeleki migwala makumi saba jilawile kuli ng'handa ya Baali-beliti, naye Abimeleki nakawapa wajuvi, leka wamuwinze.
5 Hamba nakaluta kuli ng'handa ya mhaza wa heye ako Ofula, nakawakopola wang'holoze, wana walume wa Yelubaali, wanhu makumi saba. Nakawakopola mchanya mwa iganga limwe, ila Yotamu, mwana mlume mdodo wa Yelubaali, nakapona kwa vila nayali yevisile.
6 Hamba, wala wakulu wa Shekemu naweting'hana hamwe na wanhu weng'ha wa Beti-milo, nawaluta kumuwika Abimeleki yawe mndewa, habehi na igodi lya mwaloni uwele habehi na izengo liwele ako Shekemu.
7 Hamba hala lowamlonjele Yotamu na heye nakaluta na kwima mchanya mwa chila chinhembenhembe cha chidunda cha Gelisimu. Nakatowa iyowe yochemeleza, “Mnyhulichize hemwe wakulu wa Shekemu leka na heye Nguluwi yawahulichize hemwe.
8 Zuwa limwe migodi najilawa leka kuliwika igodi linji liwe mndewa hali hewo. Migodi ajo najililonjela igodi lya mzeituni, ‘Uwe chilongozi hali hetwe.’
9 Ila lila igodi lya mzeituni nalijilonjela jila migodi, ‘Ndigaleche mafuta ga heni ganojile galingukundigwa kukolela mijito ja kujihulichiza milungu na wanhu, leka ndute ndikasanzalime mchanya mwa migodi?’
10 Hamba, migodi najililonjela igodi lya mtini, ‘Uwe chilongozi hali hetwe.’
11 Ila awo mtini naujilonjela migodi ajo, ‘Ndaze, ndiuleche unojenoje wa heni na mafuza ga heni ganojile, ndute ndikasanzalime mchanya mwa migodi?’
12 Hamba, migodi ajo najililonjela igodi lya mzabibu, ‘Uwe chilongozi hali hetwe.’
13 Awo mzabibu nawo naujilonjela migodi ajo, ‘Ndaze, ndeche divai ya heni, iwele ilingujisangalaza milungu na wanhu, ndute ndikasanzalime mchanya mwa migodi?’
14 Aho ndo ajo migodi najililonjela igodi lya miwa, ‘Uwe chilongozi hali hetwe.’
15 Ila igodi alyo lya miwa nalijilonjela migodi ajo, ‘Wone mwangumbika heni ndiwe mndewa hali hemwe, lelo muye mkalise hali lubehelo lwa heni. Wone haiwa ahyo, chiluli chilawe kuli igodi lya miwa na kujilakaza migodi ja mielezi ja Lebanoni.’ ”
16 Yotamu nakalutilila kulonga, “Wone namumditila kwa kunuwila kunojile na kwa kulolela goya kuli kumuwika Abimeleki leka yawe mndewa na wone namumditila ganojile Yelubaali na walelwa wa heye na kumditila kota vyoilinguganigwa,
17 kwa vila mhaza wa heni nakawatowanila hemwe na kugana kwajiliza ukomu wa heye kwa kuwalohola kulawa kuli moko ga Wamidiani,
18 hemwe namuibelenhuka ng'handa ya mhaza wa heni na kuwakopola wanage, wanhu makumi saba mchanya mwa iganga limwe. Namumuwika Abimeleki, yawele mwana wa mpogozi mdala wa heye, yawe chilongozi wa wakulu wa Shekemu kwa vila heye ka mng'holozenu.
19 Lelo wone namumditila Yelubaali na walelwa wa heye kwa kunuwila kunojile na kwa kulolela goya, lelo msangalale kwa chiwalo cha heye yuye Abimeleki, naye yasangalale kwa chiwalo cha hemwe.
20 Ila wone haiwele ahyo, chiluli chilawe kwa Abimeleki na kuwalakaza wakulu wa Shekemu na wa Beti-milo na kahi chilawe kwa wakulu wa Shekemu na Beti-milo na kumlakaza Abimeleki.”
21 Hamba Yotamu nakoka kwa kubilima, nakaluta Beeli na kikala ako kwa chiwalo cha kumdumba mng'holoze Abimeleki.
Kugwa kwa ulongozi wa Abimeleki
22 Lelo Abimeleki nakailongoza isi ya Isilaeli kwa mhela wa miyaka jidatu.
23 Hamba Nguluwi nakamlajiza muhe mwihe hali Abimeleki na wakulu wa Shekemu. Wakulu wa Shekemu nawambelenhuka Abimeleki
24 leka wula wihe wowaditilwe wala wana makumi saba wa Yelubaali uhiluswe kwa Abimeleki yagazigwe hamwe na wakulu wa Shekemu kwa chiwalo cha kumtanza kuwakopola wala wang'holoze.
25 Lelo wakulu wa Shekemu nawawawika wanhu leka wawabeteze mchanya mwa vila vinhembenhembe vya vidunda, wanhu wawele nawahola vinhu vya wanhu weng'ha wowakolile nzila yila, na heye Abimeleki nakapegwa mbuli ayo.
26 Hamba Gaali, mwana mlume wa Ebedi, nakaluta hamwe na wang'holoze. Nawaluta mbaka Shekemu, wakulu wa Shekemu nawamkunda heye Gaali.
27 Wakulu wa Shekemu nawaluta kuli migunda ja hewo ja mizabibu, nawabena zabibu na kuzikama zabibu azo na kudita mnvina. Hamba nawenjila kuli ng'handa ya mlungu wa hewo nawalya na kunwa leka kumbeza ayo Abimeleki.
28 Gaali mwana mlume wa Ebedi nakalonga, “Abimeleki ndo whaani na hetwe wakulu wa Shekemu ndo wanhu wachi mbaka tumkolele mijito heye? Abimeleki ndo mwana wa Yelubaali na mkolamijito wa heye mng'hangala ndo Sebuli. Muwakolele mijito wana wa Hamoli yawele mhaza wa Shekemu. Ila lekachoni tumkolele mijito Abimeleki?
29 Wone wanhu wano wa hali ulongozi wa heni, lelo heni ndahamusile ayo Abimeleki. Hamba ndahamlonjele Abimeleki, ‘Lelo wonjeze wamizi wa hegwe, uye titowe.’ ”
30 Aho lelo, Sebuli nayawele mkulu wa muji, loyahuliche ulonzi kulawa kwa Gaali, mwana mlume wa Ebedi, nakazudila lukami.
31 Naye nakalajiza wasenga kwa chinyele walute kwa Abimeleki, nakalonga, “Lole, Gaali, mwana mlume wa Ebedi na wang'holoze nawoya Shekemu kwambuza wanhu wa muji awu kukubelenhuka hegwe.
32 Lelo winuche nechilo, hegwe na wanhu wawele hamwe na hegwe, mumbeteze hali migunda kumvaba.
33 Hamba, hala du isanya holilawa, wime na kuutowa muji awo. Gaali na wanhu wa heye lowolawa kitowa na hegwe, aho ndo houwaditila kota vyouweza hegwe.”
34 Lelo Abimeleki na wanhu weng'ha wawele hamwe na heye nawalawa nechilo kuluta kubeteza kuutowa muji wa Shekemu kwa vilundo vine.
35 Ayo Gaali, mwana mlume wa Ebedi nakalawa, nakema kunze hali lwizi lwa muji. Abimeleki na wanhu wa heye wawele hamwe na heye nawema kuli hala honhu howawele wobeteza.
36 Lelo Gaali loyawawene wala wanhu, nakamlonjela Sebuli, “Lole, wanhu wangudulika kulawa kuli vinhembenhembe vya vidunda.” Sebuli nakamlonjela, “Alyo ndo isisila lya vidunda ndo wangona kota wanhu.”
37 Hamba Gaali nakalonga lwa keli, “Lole, wanhu wangudulika kuli isi na chilundo chimwe changuya kwa kukolela nzila ya Mwaloni wa Walaguzi.”
38 Aho ndo Sebuli nakamlonjela, “Ndaze, mlomo wa hegwe sambi wakohi mbaka nakulonga, ‘Ayo Abimeleki ka whaani mbaka kumkolela mijito heye? Ndaze, wano hawawele wamizi wouwabezile hegwe? Ulawe lelo na witowe na hewo.’ ”
39 Lelo Gaali nakalawa kitowa na wakulu wa Shekemu na Abimeleki.
40 Gaali nakalemwela na kubilima hali Abimeleki. Wanhu wenji nawalumila na kugwa mbaka habehi na lwizi lwa muji.
41 Lelo Abimeleki nakekala Aluma, ila heye Sebuli nakamuwinga Gaali na wang'holoze leka waleche kikala ako Shekemu.
42 Zuwa lya keli, wanhu nawalawa leka walute kuli migunda ja hewo, Abimeleki nakahulika mbuli ayo.
43 Abimeleki nakawahola wanhu wa heye na kuwagawa kuli vilundo vidatu, leka walute kubeteza kuli migunda. Loyawawene wanhu wangulawa kuli muji, nakawatowa na kuwakopola.
44 Lelo Abimeleki na chila chilundo chiwele hamwe na heye, nawaluta kwima hali lwizi lwa muji, vila vilundo vili naviwatowa wala wanhu wawele kuli migunda na kuwakopola weng'ha.
45 Abimeleki naketowa na wanhu wa muji awo nemisi yeng'ha. Nakawakopola wanhu wawele wochikala amo na kuuhola muji awo na kuubomola na kuuwika mwino.
46 Hamba wakulu weng'ha wawele wochikala kuli lila ilingo lya Shekemu, lowahuliche mbuli yila, nawenjila mgati mwa ngome ya ng'handa ya Eli-beliti.
47 Abimeleki nakahulika kota wakulu weng'ha wa lila ilingo lya Shekemu naweting'hana hamwe.
48 Lelo Abimeleki na wanhu weng'ha wawele hamwe na heye, nawakwina kuluta kuli chidunda cha Salimoni. Abimeleki nakebata iwago mmoko mwa heye na kudumula nhagala imwe kuli igodi, nakebata na kulipika hali mayega ga heye na kuwalonjela wala wanhu wawele hamwe na heye, “Lelo chila chomlinguchona heni ndita, namwe mdite hihyo himahima.”
49 Lelo chila munhu nakatema nhagala ya heye, nawamuwinza Abimeleki na nhagala azo nawaziwika hala hali ngome na kuilakaza ngome ayo kwa chiluli. Hino ndo wanhu weng'ha wa ilingo lya Shekemu vyowabagame, wanhu elufu imwe, walume na wadala.
50 Ahyo Abimeleki nakaluta muji wa Tebesi, nakauzunguluta na kuuhola muji awo.
51 Ila mgati mwa muji awo nakwali na ilingo liwele na mong'ho. Wanhu weng'ha, wakulu na walume na wadala nawabilimila ako, wanhu weng'ha wa muji awo nawehindila mgati na kukwina kuli chinduwiko cha ilingo.
52 Abimeleki nakaluta mbaka hala hawele na ilingo alyo na kitowa na wala wanhu, nakahejela mbaka hali lwizi lwa ilingo alyo leka yalilakaze kwa chiluli.
53 Mdala yumwe nakatoza iganga lya lwala lya kuchanya, iganga alyo nalimtowa Abimeleki kumutwi.
54 Abimeleki nakamchema himahima msongolo yawele yopapa vinhu vya heye vya kitowa ngondo na kumlonjela, “Ubaguse ipanga lya hegwe ung'hopole heni, leka wanhu waleche kulonga kota ng'hopoligwa na mdala.” Yula msongolo nakahola ipanga lya heye na kumhoma, naye Abimeleki nakabagama.
55 Wanhu wa Isilaeli lowawene kota Abimeleki nakabagama, nawaluta chila munhu hali haluga hake.
56 Lelo Nguluwi nakahilusa chibida kwa kumdita Abimeleki yakopoligwe na wang'holoze, wanhu makumi saba.
57 Hihyo du Nguluwi nakawadita wanhu wa Shekemu wagazigwe kwa chiwalo cha wihe wa hewo wowauditile. Ahyo kupanjilwa kwa Yotamu, mwana mlume wa Yelubaali nakuwafika hewo.