3
ಕ್ರಿಸ್ತವಾಳು ಚಾ಼ಲಿಲೇವ್ಣುತೆ ತರೀಕ
1 ಖಾನೂಲ್‌ ಚ಼ಲಾವವಾಳಾನಿ ಅಜು಼ ಅದಿಕಾರಿ ಖ್ಹಾರಾನಿ ವಾತೇನ ಖ್ಹಮಜ಼್‌ಣು ಕರಿ ಅಜು಼ ಖ್ಹಾರೂಸ್ ಅಛ಼್ಛುಕಾಮ್ ಕರಾನ ತೈಯಾರ್ ರ‍್ಹೇಣು ಕರಿ ತಾರ ಅದ್ಮಿ ಖ್ಹಾರಾನ ಯಾದ್ ದೆವಾಡ್.
2 ಇವ್ಣುನ ಬೋಲ್, ಇವ್ಣೆ ಕಿನಿ ಬಾರೇಮಾಬಿ ದೂಷಣೆ ನಾ ಬೋಲ್‌ನು, ಕತೋಬಿ ಕಿನ ಜೋ಼ಡೇಬಿ ಸಮಾಧಾನ್‌ಥಿ, ದೋಸ್ತಿಥಿ ಅಜು಼ ತಮಾಮ್‌ನ ಜೋ಼ಡೆ ಶೇದೇವ್‌ನಿ ಮತ್‌ರ‍್ಹೇಣು.
3 ಶನಕತೊ ಏಕ್‌ ಹಗಾಮ್‌ಥು ತದೆ ಅಪ್ಣೇಬಿ ಅಗಾಡಿ ಖ್ಹಯಾಲ್‌ಭರ‍್ಯಾ ಹುಯಿರ‍್ಹಾಥ, ಹುಕುಮ್‌ನ ತೋಡಾವಾಳ ಹುಯಿರ‍್ಹಾಥ ಅಜು಼ ಘುಂಜ್‌ಳಾವ್ಣಿಮ ಥಾ. ಖ್ಹಾರಿಸ್ ತರ‍್ಹಾನಿ ಲಾಲಚ್‌ಬಿ ಅಜು಼ ಭೋಗ್‌ನ ಗುಲಾಮ್ ಥಾ. ಅಪ್ಣ ಖರಾಬ್ ಖ್ಹಯಾಲ್ ಅಜು಼ ಗಲ್ತಿಕರಾಸ್ಮ ಅದ್ಮಿಖ್ಹಾರು ಅಪ್ಣುನ ದಾವೊ ಕರ್ತುಥು.ಅಪ್ಣೇಬಿ ಏಕ್‌ಥಿಏಕ್ ದಾವೊ ಕರ‍್ಯಾ.
4 ಕತೋಬಿ ಅಪ್ಣೊ ರಕ್ಷಕ್ ಹುಯಿರ‍್ಹೋತೆ ದೇವ್ನಿ ಗೋರ್‌ ಅಜು಼ ಪ್ಯಾರ್ ದೆಖೈತದೆ.
5 ಇನೆ ಅಪ್ಣುನ ಬಚಾ಼ಡ್ಯೊತೆ, ಅಪ್ಣೆ ಕರ‍್ಯಾತೆ ಅಛ್ಛು಼ ಕಾಮ್‍ಥಿ ಕಾಹೆ ಪಣ್ಕಿ ಇನಿ ಗೋರ್‌ಥೀಸ್. ಅಜು಼ ಪವಿತ್ರಾತ್ಮಾಥಿ ನವಿ ಜಿ಼ಂದ್‌ಗಿ ದಿದೊ. ಅಜು಼ ಇನೆ ಅಪ್ಣುನ ಧೊಯಿನ್ ನವೊ ಜಾನ್ನದಿದೊ.
6 ದೇವ್ನೆ ಅಪ್ಣೊ ರಕ್ಷಕ್ ಯೇಸು ಕ್ರಿಸ್ತಥಿ ಪವಿತ್ರಾತ್ಮನ ಅಪ್ಣಪರ್ ಭರ್‌ಪೂರ್‌ ರಂಚ್ಯೊ.
7 ಅನಖ್ಹಾಜೆ ದೇವ್ನೆ ಅಪ್ಣುನ ಇನಿ ವಾರ್‌ಖ್ಹೇಥಿ ಇಮಾನ್‌ದಾರ್ ಬಣೈರಾಖ್ಯೊಸ್. ಅನೇಥಿ ಅಪ್ಣೆ ಭರೋಖ್ಹೊ ಕರಿರಾಖ್ಯಾತೆ ಯೊ ಹಮೇಶಾನಿ ಜಿ಼ಂದ್‌ಗಿ ಮಳಾದೆ ಕರಿ ಆ ಖ್ಹಾಚಿವಾತೆ ಬೋಲೈರ‍್ಹೀಸ್.
8 ಮೇ ಹರ್‌ಖ್ಹುಸ್ಕಿ ತು ಆ ವಾತೆನಪರ್ ಜಾ಼ಖ್ಹತ್ ಧ್ಯಾನ್ ರಾಕ್ಣು. ಅನೇಥಿ ದೇವ್‌ಮ ವಿಶ್ವಾಸ್ ಕರಾಸ್ಕಿ ಇವ್ಣೆ ಅಛ್ಛು಼ ಕಾಮ್ ಕರಾಮ ಯೊ ವಾತೆ ಹರೇಕ್‌ನ ಅಛ್ಛು಼ ಅಜು಼ ಫಾಯಿದಾನು ಹುಯಿರ‍್ಹೂಸ್.
9 ಖಾನ್‌ದಾನ್ನಿ ಬಾರೇಮ ವಿವಾದ್ ಕರಾನು ಶಾತ್ ಛಾ಼. ಮೋಶೇನ ನಿಯಮ್‌ನಿ ಬಾರೇಮ ಲಡೈ, ಅಬ್ಬಾಜ಼ಬ್ಬಿನಿ ವಾತೆ ಅಜು಼ ಮೂರ್ಖ್‌ ಬುದ್ದೀನಿ ಬಾರೇಮ ದೂರ್ ರ‍್ಹೇ. ಶನಕತೊ ಅನೇಥಿ ಶನು ಫಾಯಿದೊಕೊಯ್ನಿ ಯೋ ಜ್ಹೂ಼ಟು ಹುಯಿರ‍್ಹುಸ್.
10 ಖಿವು ಏಕ್‍ಜ಼ಣೊ ಸಬೇನು ಅದ್ಮಿಮ ಭೇ ಭಾಗ್‌ ಕರ‍್ನು ಕರಿ ದೇಖಾಸ್ಕಿ ಇನ ಏಕ್‌ಹಲ್ಲ ನತರ್ ಬೇಹಲ್ಲ ಝೇತಾವ್, ಖ್ಹಮ್‌ಜೊನಾತೊ ಇನೇಥಿ ದೂರ್ ರ‍್ಹೇ.
11 ಇಮ್ನು ಅದ್ಮಿಖ್ಹಾರು ವಾಟ್‌ ಛು಼ಕಿಜಾ಼ವಳು ಹುಯಿರ‍್ಹುಸ್ ಅಜು಼ ಇವ್ಣು ಪಾಪಸ್ ಇವ್ಣುನ ಗಲತ್‌ ವತಾಳಸ್.
ಖ್ಹರ್ತಿನಿ ವಾತೆ
12 ಠಣ್ಣಾ ದನ್ಮ ಮೇ ನಿಕೋಪೊಲಿಮ ಠಣ್ಣಾ ಹಗಾಮ್ನ ಕಾಡ್ನುಕರಿ ಖ್ಹೂಜ಼್‌ಕರಿ ರಾಖ್ಯೋತೆ ಇನಖ್ಹಾಜೆ, ಅರ್ತೆಮನ್ನ ರ‍್ಹವೊ ತುಖಿಕನ ರ‍್ಹವೊ ತಾರಕನ ಮೋಕಲ್‌ತಾಸ್‌ ತೂ ಮಾರಕನ ಆವಾನ ದೇಕ್‌ಜೊ.
13 ವಕಿಲ್ ಹುಯಿರ‍್ಹೋತೆ ಜೆನಸ್ ಅಜು಼ ಅಪೊಲ್ಲೋಸನ ಜ಼ತನ್‌ಥಿ ಮೋಕಲ್. ಇವ್ಣುನ ಶಾತ್ಬಿ ಕಮ್ ನಾಹೊಣುತೆ ಇಮ್‌ ದೇಖಿಲೆ.
14 ಅಪ್ಣು ಅದ್ಮಿಖ್ಹಾರು ಚು಼ಪ್‌ಕೆಸ್ ನಾರ‍್ಹೇವ್ಣುತೆ, ಅಛ್ಛು಼ ಕಾಮ್ ಕರಾನ ಶಿಕಿನ್, ಇವ್ಣ ಜ಼ರೂರತ್‌ನ ಪರ್ಖಿನ್ ದ್ಯವವಾಳು ಹುಯಿರ‍್ಹಾವದೆ.
15 ಹಜ್ಜಾ಼ ಮಾರ ಜೋ಼ಡ್ಮ ರ‍್ಹವವಾಳು ಖ್ಹಾರೂಸ್ ತುನ ತೋಬ ಕರುಕರಸ್. ಕ್ರಿಸ್ತಮ ವಿಶ್ವಾಸ್ ಮ್ಹೇಲಿರಾಖ್ಯಾತೆ ಹಮೂನ ಪ್ಯಾರ್ ಕರಾವಾಳ ಖ್ಹಾರಾನ, ಹಮೆ ತೋಬಕರಿ ಬೋಲ್ಯ ಕರಿ ಬೋಲ್. ದೇವ್ನಿ ಕೃಪೆ ತುಮಾರ ಖ್ಹಾರಾನ ಜೋ಼ಡೆ ರ‍್ಹವಾದೆ.