ಪೇತ್ರನು ಬರೆದ ಎರಡನೆಯ ಪತ್ರಿಕೆ
ಪೇತ್ರನೆ ಲೀಖ್ಯೋತೆ ಬೇನಿ ಚಿಟ್ಟಿ
ಮಾಲುಮ್ ಕರಾನು
ಪೇತ್ರನೆ ಲೀಖ್ಯೋತೆ ಬೇನು ಚಿಟ್ಟಿ ಪೇತ್ರನೆಸ್‌ ಲೀಖಿರಾಖ್ಯೊಸ್‌ಕರಿ ಆ ಚಿಟ್ಟಿ ವತಾಳಿದೇಸ್. ಕತೋಬಿ ಘಣೇಥಿ ಲೀಖಾಪಟ್‌ ಕರವಾಳು ಹಮ್ಕೇಬಿ ಜಿನು ಆಹೈರುತೆ ಖ್ಹಾಚು಼ಕರಿ ಮಾನಿಲೇಸ್ ಕೊಯ್ನಿ. ಪೇತ್ರ ಭಣಿಥುಬಿ ಕೋಣ್ಕಿ ಏಕ್‍ಜ಼ಣು ಆ ಚಿಟ್ಟಿನ ಲೀಖಿರಾಖನು ದೆಖಾವಸ್. ಲೀಖವಾಳನೆ ಯೇಸುನ ಜಿವ್ಣನ ಅಜು಼ ಬರೋಬರ್‌ಥಿ ಬದ್ಲಾವ್‌ ಹುವಾನ ಮೆ ಡೋಳೆಖ್ಹು ದೇಖಿನ್‌ ಸಾಕ್ಷಿ ಹುಯಿರ‍್ಹೊಸ್‌ಕರಿ ಬೋಲಸ್. 1:17-18 ಏಕ್‌ ವೇಳ್ಮ ಪೇತ್ರನೆ ಆ ಚಿಟ್ಟಿ ಲೀಖಿರಾಖಸ್ನು ಉಷೇತೊ ಇನೆ ರೋಮ್ ಖ್ಹಯೇರ್‌ಮ ರ‍್ಹೀನ್ ಲೀಖಿರಾಖ್ಯೊಸ್ ಅಜು಼ ಆ ಚಿಟ್ಟಿ ಕ್ರಿಸ್ತನ ಪೈದಾಖ್ಹ್‌ನ ವಾರ್‌ 65 ಥು 69 ನು ವರಖ್ಹ್‌ನ ಬೀಚ್ಮ ಲಿಖೈರ‍್ಹುಸ್. ಯೊ ಇನ ಮರಾನ ಪಹಿಲೆ ಪೇತ್ರ ಜಿನು ಆ ಮೇ ಲಿಖಾನು ಬೇನು ಚಿಟ್ಟಿಕರಿ ಬೋಲಸ್. 3:1 ಅಮ್ ಆ ಚಿಟ್ಟಿ ಲೀಖಿರಾಖ್ಯೊಸ್ತೆ ದನ್ನಿಗಣ್ತಿ ಪೇತ್ರನೆ ಲಿಖ್ಯೋತೆ ಪಹಿಲಿ ಚಿಟ್ಟಿನ ವಾರ್‌ ಮಳಾವಸ್‌. ಆ ಚಿಟ್ಟಿ ಇನೆ ಅಖ್ಖಾ ಕ್ರಿಸ್ತ ವಿಶ್ವಾಸಿವ್‌ನ ಮಳೈನ್‌ ಲೀಖಿರಾಖ್ಯೊಸ್.
ಪೇತ್ರನೆ ವಿಶ್ವಾಸಿಯೇವ್ನ ಅಛ್ಛು಼ ಜಿವ್ಣು ಜಿವಾನ ಹುಮ್ಮಖ್ಹ್‌ ದ್ಯಾವನಖ್ಹಾಜೆ ಅಜು಼ ಇವ್ಣುನ ಝೂ಼ಟ ಬೋಧಕರ‍್ನ ಮಾರಗ್‍ಮ ನಾಚಾ಼ಲ್ನುಕರಿ ಝೇತಾವನಖ್ಹಾಜೆ ಆ ಚಿಟ್ಟಿ ಲೀಖ್ಯೊ 2 ನು ಅಧ್ಯಾಯ. ಇನೆ ಯೇಸು ಪಾಛು಼ ಆವಾನ ಜಾ಼ಖ್ಹತ್ ವಖ್ಹತ್ ಲೀರಾಖ್ಯೊಸ್ ಕರಿ ಬೋಲಸ್ತೆ ಅದ್ಮಿಭಣಿ ಧ್ಯಾನ್ ನಕೊದೆವೊ ಕರಿ ಇವ್ಣುನ ಹುಮ್ಮಖ್ಹ್‌ದಿದೊ. ಅನಬದಲ್ ದೇವ್ ಧೇರ್‌ಮ ಕೊಯ್ನಿ ಕತೋಬಿ ಹರೇಕ್ ಜ಼ಣು ಬಚ಼್‌ಣುಕರಿ ಬೋಲಾನುಸ್ ದೇವ್ನ ಹೋಣುತೆ ಕರಿ ವಿಚಾರ‍್ನಸ್ ಪಾಡಿ ಧರ‍್ಯೊ.2 ಪೇತ್ರ 3:8-9 ಅನಖ್ಹಾಜೆ ಏಕ್‌ ಅಛ್ಛು಼ ಜಿವ್ಣು ಜಿವ್ನುಪಡಾಸ್ 3:14
ಕಾಡಿದೇಖೊ
1. ಪೇತ್ರನೆ ಇನ ಮಾಲುಮ್ ಕರಾಯೊ ಅಜು಼ ಇನು ಪಢವಾಳು ಕೋಣ್‌ಕರಿ ವತಾಳಸ್‍. 1:1-2
2. ಇನಕೇಡೆಥು ಇನೆ ದೇವ್ನೆ ಅಪ್ಣುನ ದೀರಾಖ್ಯೋತೆ ಇಮ್‌ ಅಛ್ಛು಼ ಜಿವ್ಣಮ ಜಿವ್ಣುಕರಿ ಯಾದ್‌ಕರಾವಸ್. 1:3-21
3. ಇನಕೇಡೆಥು ಯೊ ಝೂ಼ಟ ಭೋದಕರ‍್ನಿ ಬಾರೇಮ ಝೇತಾವಸ್ ಅಜು಼ ಖ್ಹರ್ತಿಮ ಝೂ಼ಟ ಭೋದಕರ‍್ನ ಶಾತ್ ಉಷೆಕರಿ ಬೋಲಾನು ಬೋಲಸ್. 2:1-22
4. ಇನಕೇಡೆಥು ಯೊ ಯೇಸುನಿ ಬೇನು ಆವಾನಿ ತಯಾರಿನಖ್ಹಾಜೆ ವಿಶ್ವಾಸಿಖ್ಹಾರು ಅಛ್ಛು಼ ಜಿವ್ಣು ಜಿವ್ಣುಕರಿ ಹುಮ್ಮಖ್ಹ್‌ ದೇತೊಹುಯಿನ್ ಚಿಟ್ಟಿನ ಖ್ಹತಮ್ ಕರಸ್.3:1-17
1
ಖ್ಹಲಾಮ್ ಖ್ಹಾರು
1 ಯೇಸು ಕ್ರಿಸ್ತನೊ ಸೇವಕ್ ಅಜು಼ ಅಪೊಸ್ತಲ ಹುಯಿರ‍್ಹೋತೆ ಸೀಮೋನ್ ಪೇತ್ರ, ಅಪ್ಣೊ ದೇವ್ ಅಜು಼ ರಕ್ಷಕ್ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ನೀತಿಥಿ ಹಮಾರಿನಿತರಸ್ ಅಛ್ಛಿ ವಿಶ್ವಾಸ್ ಮಳಿರ‍್ಹೀಸ್ತೆ ಇವ್ಣುನ ಶಾತ್ ಲೀಖುಸ್‌ಕತೊ,
2 ದೇವ್ ತುಮುನ ಪರಿಶುದ್ ಕರಾನಖ್ಹಾಜೆ ಘಣಾದನ್ನ ಅಗ್ಗಳಸ್ ವಿಚಾರ್‌ ಕರಿರಾಖ್ಯೊಸ್. ದೇವ್ನಿ ಬಾರೇಮಾಬಿ ಅಜು಼ ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸುನಿ ಬಾರೇಮಾನಿ ಛಾ಼ತೆ ಗ್ಯಾನ್‌ಥಿ, ತುಮೂನ ವಾರ್‌ಖ್ಹೊ ಅಜು಼ ಶಾಂತಿ ಘಣೇಥಿ ಘಣು ಮಳಾದೆ.
ದೇವ್‍ಥಿ ಬುಲಾವ್ಣಿ ಅಜು಼ ಚು಼ನಾವ್ಣಿ
3 ಇನಿ ಮಹಿಮೆಮ ಅಜು಼ ಅಛ್ಛಿಪಣೈಮ ಭಾಗ್‍ಹುವಾನ ಬುಲೈರಾಖ್ಯೊತೆ ಇನೇಥಿ ದೇವ್ ಅಪ್ಣುನ ಜಿ಼ಂದ್‌ಗಿ ಚ಼ಲಾವನಬಿ ಅಜು಼ ಭಕ್ತಿಥಿ ರ‍್ಹವಾನ ಹೋಣುತೆ ಖ್ಹಾರೂಸ್ ದೇವ್ನೆ ಇನಿ ಶಕಥ್ಥಿ ತಾಖತ್ನ ದೀರಾಖ್ಯೊಸ್.
4 ತುಮೆ ಲೋಕ್‌ನಿ ಲಾಲಚ್‌ಥಿ ಆವಸ್ತೆ ಖರಾಬ್‌ಥಿ ಛು಼ಕಿನ್, ದೇವ್ನಿ ಚಾ಼ಲ್‌ಮ ಭಾಗ್‌ಲ್ಯವಾಳ ಹೋಣುಕರಿ ಬೋಲಿನಸ್ ದೇವ್ನೆ ಇನಿ ಮಹಾನ್ ಅಜು಼ ಅಮೂಲ್ಯ ಹುಯಿರ‍್ಹೀತೆ ವಾತೇನ ಅಪ್ಣುನ ದಿದೊ.
5 ಅನಖ್ಹಾಜೆಸ್ ತುಮೆ ತುಮಾರಿ ಪೂರ ಮನ್‌ಥಿ ವಿಶ್ವಾಸ್‌ನ ಜೋ಼ಡೆ ಅಛ್ಛಿ ಗುಣಾನ, ಅಛ್ಛಿ ಗುಣಾನ ಜೋ಼ಡೆ ಅಛ್ಛಿಗ್ಯಾನ್ನ ಮಳಾವೊ.
6 ಅಛ್ಛಿ ಗ್ಯಾನ್ನ ಜೋ಼ಡೆ ಖ್ಹುದ್‌ನ ಖ್ಹಮಾಳಿಲ್ಯವಾಮ, ಖ್ಹಮಾಳನ ಜೋ಼ಡೆ, ಭಾಲ್ನ, ಭಾಲ್ನ ಜೋ಼ಡೆ ಅಛ್ಛಿ ಭಕ್ತಿನ, ಮಳಾವೊ.
7 ಭಕ್ತಿನ ಜೋ಼ಡೆ ಭೈಯೆ-ಭೇನೇನ ಗಳ್‌ಜೋ಼ಡ್ಮ, ಭೈಯೆ-ಭೇನೇನ ಗಳ್‌ಜೋ಼ಡೆ ಪ್ಯಾರ್‌ನ ಮಳೈಲೆವೊ.
8 ಆ ಖ್ಹಾರು ತುಮಾರಾಮ ರ‍್ಹೀನ್, ಭಡ್ತು ಆಯುತೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಗ್ಯಾನ್‌ಮ, ತುಮೆ ಚಾ಼ತುರ್ ಹುವಾನಿ ಬಾರೇಮ ಕಾಮ್ನ ಕೊಯ್ನಿತೇಬಿ, ಫಾಯಿದೊಕೊಂತೆ ತಿಮ್ ನಾಹುಯಿರ‍್ಹವಾನಿ ಘೋಣಿ ಕರಸ್.
9 ಕತೋಬಿ ಆ ಖ್ಹಾರಿ ಗುಣ್‌ಕೊಂತೆ ಅದ್ಮಿ ಅಂಧು ಹುಯಿರ‍್ಹುಸ್‍, ಅಜು಼ ಇನ ದೂರ್‌ಲಿ ಜೋ಼ತ್‌ಕೊಂತೆ, ಇನು ಅಗ್‌ಲ್ಯು ಪಾಪ್‌ಖ್ಹಾರು ಮಾಪ್‌ ಹುಯಿಜೈ಼ನ್‌, ಯೋ ಶುದ್ದಿ ಹುಯಿಗಯು ಕರಿ ಯೋ ಭೈಕಿಗಯೊ.
10 ಇನಖ್ಹಾಜೇಸ್ ಮಾರ ಭೈಯೆ, ಭೇನೆವೊ ದೇವ್ನೆ ತುಮೂನ ಬುಲಾಯೋತೆ ಅಜು಼ ಚೂ಼ಣಿಲಿದೊತೊ ಖ್ಹಾಚ ಕರಿ ವತಾಳನಖ್ಹಾಜೆ ಬಿಜೂ಼ಬಿ ಜಾ಼ಖ್ಹತ್ ಮ್ಹಿನತ್‌ಕರೊ, ತುಮೆ ಅಮ್‌ಕರ‍್ಯಾತೊ, ಕದೇಬಿ ಠೋಕರ್‌ಖೈನ್‌ ರಡಕ್‌ಶು ಕೊಯ್ನಿ.
11 ಅನೇಥಿ ಅಪ್ಣೊ ಪ್ರಭು ಅಜು಼ ರಕ್ಷಕ್ ಹುಯಿರ‍್ಹೋತೆ, ಯೇಸು ಕ್ರಿಸ್ತನಿ ಹಮೇಶಾನ ರಾಜ್ಯಮ ಜಾ಼ವಾನಿಮತ್‌, ತುಮುನ ಅರಾಮ್‌ಥಿ ಜಾ಼ವಖ್ಹರ್ಕು ಉಷೆ.
12 ಇನಖ್ಹಾಜೇಸ್, ತುಮೆ ಆ ಖ್ಹಾರಿ ಬಾರೇಮ ಮಾಲುಮ್ ಕರಿಲೀನ್, ತುಮೂನ ಮಳಿರ‍್ಹೀತೆ ಖ್ಹಾಚಿಮ ಘಟ್ ರ‍್ಹಯಾತೋಬಿ, ಮೇ ಯೋ ಖ್ಹಾರಾನ ತುಮೂನ ಹಮೇಶ ಕದೇಬಿ ಯಾದ್ ದೆವಾಡ್ತೊ ರ‍್ಹೀಶ್.
13 ಮೇ ಮಾರ ಶರೀರ್‌ಕರಿ ಘರ್‌ಮ ರ‍್ಹವಲಗೂಬಿ ತುಮುನ ಯಾದ್‌ದ್ಯವಾಡಿನ್ ಹುಮ್ಮಖ್ಹ್‌ ಕರಾವನು ನ್ಯಾವ್ನು ಕಾಮ್‌ಕರಿ ಮೇ ಸೋಚಿರಾಖ್ಯೊಸ್.
14 ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತನೆ ಮನ ಬೋಲ್ಯೋತೆ ಇಮ್ಮಸ್, ಮೇ ಆ ಘರ್‌ನ ಮ್ಹೇಲಿಜಾ಼ವಾನು ಹಗಾಮ್‌ ಖನ್ನೆಸ್‌ ಛಾ಼ಕರಿ ಮನ ಮಾಲುಮ್.
15 ಮೇ ಮರಾನ ಬಾದ್ಮ ತುಮೆ ಆ ಖ್ಹಾರಾನ ಕದೇಬಿ ಯಾದ್ ಕರಿಲ್ಯವಾನಖ್ಹಾಜೆ ಮಾರೊ ಹಾತ್‌ ಹುವ್ವಾಯೆತ್ರೆ ಮೇ ಕೋಶಿಶ್‌ಕರುಸ್.
ಕ್ರಿಸ್ತನಿ ಮಹಿಮೆ ಅಜು಼ ಪ್ರವಾದನೆ
16 ಅಪ್ಣೊ ಪ್ರಭು ಯೇಸು ಕ್ರಿಸ್ತನಿ ಶಕತ್ನಿ ಬಾರೇಮ ಅಜು಼ ಯೋ ಆವ್‌ಶೇತೆ ಬಾರೇಮ ತುಮೂನ ಬೋಲಿವತಾಳಿ ರಾಖ್ಯಸ್‌. ಯೋ ಅದ್ಮಿಥಿ ಬೋಲೈಹುಯಿ ಖೇಣಿಯೇನಿ ಆಧಾರ್‌ಪರ್ ಬೋಲಿವತಾಳ್ಯಾತೆ ಕಾಹೆ ಯೋ ಕೆತ್ರ ಮಹಾನ್ ಕರಿ ಹಮೆ ಖ್ಹುದ್ ಹಮಾರ ಡೋಳೆಖ್ಹು ದೇಖಿರಾಖ್ಯಸ್.
17 “ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನ ಮೆ ಪಸಂದ್ ಕರಿರಾಖ್ಯೊಸ್” ಕರಿ ಅವಾಜ಼್ ಮೋಟಿ ಮಹಿಮೇಥಿ ಇನ ಆಯೂತೆ ತದೆ, ಬಾ ದೇವ್‍ಥಿ ಇನ ಇಜ಼್ಜತ್ ಅಜು಼ ಮಹಿಮೆ ಮಳಿಗೈ.
18 ಹಮೆ ಪವಿತ್ರ್‌ ಪಹಾಡ್‌ಪರ್ ಇನ ಜೋ಼ಡೆಥಾತೆ ತದೆ, ಪರಲೋಕ್‌ಥು ಆಯೂತೆ ಯೋ ಅವಾಜ಼್‌ನ ಹಮೆ ಖ್ಹಮ್‌ಜ್ಯ.
19 ಅತ್ರೇಸ್ ಕಾಹೆತೆ, ಪ್ರವಾದ್‌ನೆನಿ ವಚನ್ ಬೋಲಿರಾಖ್ಯತೆ ವಾತೆ ಅಪ್ಣುನಖ್ಹಾರು ಖ್ಹಾಚ ಕರಿ ಬಿಜೂ಼ಬಿ ಘಟ್‍ಥಿ ಮಳಿರ‍್ಹೂಸ್‌. ಶನಕತೊ ಇವ್ಣೆ ಬೋಲಿರಾಖ್ಯುತೆ ವಾತೆ ಅಂಧಾರಾಮ ಉಜಾ಼ಖ್ಹ್‌ ದ್ಯವಾನು ದೀವೊ ಹುಯಿರ‍್ಹುಸ್‍ ತುಮಾರ ದಿಲ್ಮ ಖ್ಹಾರು ವ್ಹಾಣು ಹುವ್ವಾತೋಡಿ ಅಜು಼ ವ್ಹಾಣೆ ವೇಳಿನೊ ಶುಕ್ಕರ್ ನಿಕ್ಳಾತೋಡಿ ಯೋ ಉಜಾ಼ಳು ಝ಼ಮ್‌ಕವಾಳು ಹುಯಿರ‍್ಹುಸ್‍.
20 ಖಿವು ಪ್ರವಾದನೆನು ವಚನ್‍ಬಿ ಖಲಿ ಶೊಂತ್‍ ಅದ್ಮಿನಿ ಬುದ್ದಿಥಿ ಬೋಲಿವತಾಳಖ್ಹರ್ಕು ಕಾಹೆ ಕರಿ ಬೋಲಾನು ಮುಖ್ಯಾಥಿ ಪಹಿಲೆ ಮಾಲುಮ್‌ಕರಿಲೆವೊ.
21 ಶನಕತೊ ಖೆವಿ ಪ್ರವಾದ್‌ನೇಬಿ ಕದೇಬಿ ಅದ್ಮಿನಿ ಮರ್ಜಿಥಿ ಆಯೂತೆ ಕಾಹೆ, ಕತೋಬಿ ಅದ್ಮಿಖ್ಹಾರು ಪವಿತ್ರಾತ್ಮಥಿ ಭರೈನ್, ದೇವ್‍ಥಿ ಲೀಲಿದೂತೆ ವಾತೇನಸ್‌ ಬೋಲ್ಯು.