5
ದೇವ್ನ ಮೇಂಢಾನ ಕಾವ್ಲಿಕರಾನು
1 ಸಭೆನ ಶಾಣವೊ, ಜೋಡ್ಮಶಾಣೊ ಹುಯಿರ‍್ಹೋತೆ ಮೇ ಕ್ರಿಸ್ತನು ಖ್ಹತಾಪ್ಣಿ ಡೋಳೇಥಿ ದೇಖೆಹುಯೊ. ಅಜು಼ ಆವ್‌ಶೇತೆ ಮಹಿಮೆಮ ಭಾಗ್‌ವಾಳೊ ಹುಯಿನ್ ತುಮುನ ಹುಮ್ಮಖ್ಹ್‌ದೀನ್ ಶಾತ್‌ ಬೋಲಿಲೆವುಸ್‌ಕತೊ,
2 ತುಮುನ ದೆವೈರ‍್ಹೂಸ್ತೆ ದೇವ್ನ ಮಂಧಾನ ಕಾವ್ಲಿಕರೊ. ಜು಼ಲಮ್‌ಥಿ ಕಾಹೆ ದೇವ್ನಿ ಮರ್ಜಿನಿತರ ಪಸಂದ್‍ನಿ ಘೋಣಿ, ರಪ್ಯಾನಿ ಖರಾಬ್ ಆಖ್ಹ್‌ಥಿ ಕಾಹೆ ಖ್ಹಾಚ ದಿಲ್‌ಥಿ ಕಾವ್ಲಿಕರೊ.
3 ತುಮಾರಿ ಚ಼ಪ್ಪಣ್‌ಮ ದೆವೈರ‍್ಹೂಸ್ತೆ ಇವ್ಣಪರ್ ರಾಜ಼್‌ಭಾರ್ ನಾಚ಼ಲಾವ್ಣುತೆ ಮಂಧಾನ ಜೋ಼ಡೆ ಉದಾಹರಣೆ ಹುಯಿನ್ ಚಾ಼ಲಿಲೆವೊ.
4 ಮೋಟೊ ಕುರುಬ ದೆಖಾವನಿ ವಖ್ಹ್‌ತೆ ತುಮೆ ಕದೇಬಿ ಮಹಿಮೆನಿ ಕಿರೀಟ್ನ ಲೀಲಿಶು.
5 ಇಮ್ಮಸ್ ಜಾ಼ನ್ಜ಼ಮಾನ್ ಅದ್ಮಿವೊ, ತುಮೆ ಶಾಣಾಥಿ ಹೇಟುಹುಯಿನ್ ಚಾ಼ಲಿಲೆವೊ ತುಮೆ ಅಖ್ಖೂಬಿ ಶೇದೇವ್ ದಿಲ್ನ ಲೀಲ್ಯಾವಾಳ ಹುಯಿನ್ ಏಕ್‌ಥಿಏಕ್ ಚಾ಼ಕ್ರಿಕರೊ. ಶನಕತೊ ದೇವ್ “ಹಂಕಾರಿನ ವಿರೋದ್‌ಕರಾಸ್. ಗೋರ್‌ ಗರಿಬ್‍ನತೋಬಿ ವಾರ್‌ಖ್ಹೊ ದ್ಯವಾಳೊ ಹುಯಿರ‍್ಹೊಸ್”.
6 ಅಮ್ ರ‍್ಹವಾಪರ್ ದೇವ್ನ ತಾಖತ್ನ ಹಾತ್‍ಹೇಟ್ ತುಮುನ ಝು಼ಕೈಲೆವೊ. ಯೋ ಬರೋಬರ‍್ನಿ ವಖ್ಹತ್‌ಮ ತುಮುನ ಉಪ್ಪರ್ ಪಾಡ್‍ಶೆ.
7 ತುಮಾರಿ ವೇಚ಼್‌ಣೆ ವಿಚಾರ‍್ನ ಇನಾಪರ್ ನಾಖೊ. ಯೋ ತುಮೂನ ಜ಼ತನ್ ಕರ್ಶೆ.
8 ಅಛ್ಛಿಖ್ಹೂಜ಼್‌ವಾಳನ ಹುಯಿ‍ರ‍್ಹೆವೊ ಅಜು಼ ಜ಼ತನ್‌ಥಿ ರ‍್ಹವೊ. ತುಮಾರೊ ವಿರೋದಿ ಹುಯಿರ‍್ಹೋತೆ ಶೈತಾನ್, ಘಲಾರತೆ ಶುಂಭಾನಿತರ ಕಿನ ಚೀರಿಖಾವ್ಣು ಕರಿ ಢೂಂಡ್ತೊ ಚಾ಼ಲ್ಯೊಫಂಡಾಸ್.
9 ತುಮೆ ವಿಶ್ವಾಸ್‌ಮ ಘಟ್‍ರ‍್ಹೀನ್ ಶೈತಾನ್ನ ಡರಾವೊ. ಜಗತ್‌ಮ ಛಾ಼ತೆ ತುಮಾರ ವಿಶ್ವಾಸಿಖ್ಹಾರು ಇಮ್ನು ಖ್ಹತಾಪ್ಣಿ ಪಡುಕರಸ್ಕರಿ ತುಮುನ ಮಾಲುಮ್ ಛಾ಼.
10 ಕ್ರಿಸ್ತ ಯೇಸುಮ ತುಮುನ ಹಮೇಶಾನಿ ಮಹಿಮೆನ ಬುಲಾಯೋತೆ ಭರ್‌ಪೂರ್‌ ವಾರ್‌ಖ್ಹಾನೊ ದೇವಸ್, ತುಮೆ ಥೋಡುವಖ್ಹತ್ ಖ್ಹತಾನ ಬಾದ್ಮ ತುಮುನ ಅಛ್ಛಿರ‍್ಹಾಮ ಲೀಅಯಿನ್ ತಳ್‌ಗಠೈನ್‌ ತಾಖತ್‍ದಿಷೆ.
11 ಯೋ ರಾಜ಼್‌ಭಾರ್ ಚ಼ಲಾವನು ಜ಼ಗ್‌ಜ಼ಮಾನಮಾಬಿ ರ‍್ಹವಾದೆ. ಆಮೆನ್.
ಖ್ಹರ್ತಿನಿ ಖ್ಹಲಾಮ್
12 ಮೇ ತುಮೂನ ಹುಮ್ಮಖ್ಹ್ ದೆವಾನಾಬಿ ಅಜು಼ ದೇವ್ನಿ ಖ್ಹಾಚಿಕೃಪೆ ಕರಿ ಸಾಕ್ಷಿ ಬೋಲಾನಾಬಿ ಮೇ ನ್ಹಾನೇಥಿ ಚಿಟ್ಟಿ ಲೀಖಿನ್, ವಿಶ್ವಾಸ್‌ನೊ ಭೈಕರಿ ಗಣ್ತಿಕರಿರಾಖ್ಯೊತೆ ಸಿಲ್ವಾನನ ಹಾತ್‌ಮ ಮೋಕ್ಲಿರಾಖ್ಯೊಸ್. ಆ ಖ್ಹಾಚಿ ಕೃಪೆಥಿ ಭೀರೆವೊ.
13 ದೇವ್ ತುಮಾರ ಜೋ಼ಡೆ ಚೂ಼ಣೈರ‍್ಹೊಥೋತೆ ಬ್ಯಾಬಿಲೋನ್ಮ ಛಾ಼ತೆ ಸಬೆವಾಳು ತುಮುನ ಖ್ಹಲಾಮ್‍ಕರಸ್. ಅಜು಼ ಮಾರ ಛಿಯ್ಯಾನಿಘೋಣಿ ಹುಯಿರ‍್ಹೋತೆ ಮಾರ್ಕಬಿ ತುಮುನ ಖ್ಹಲಾಮ್ ಬೋಲಾಸ್.
14 ಪ್ಯಾರ್‌ಥಿ ಏಕ್‌ಥಿ ಏಕ್‌ ಹಾತ್‍ದೀನ್‍ ಖ್ಹಲಾಮ್‍ಬೋಲೊ. ಕ್ರಿಸ್ತಮ ಛಾ಼ತೆ ತುಮುನ ಖ್ಹಾರಸ್ನ ಸಮಾಧಾನ್ ಹುವಾದೆ.