9
ಧರ್ತಿನು ಅಜು಼ ಪರಲೋಕ್ನು ಆರಾದನೆ
1 ಪಹಿಲ ಒಪ್ಪಂದಾಮ ಆರಾದನೇನು ರೀತಿರಿವಾಜ್‌ ಅಖ್ಖುಥು ಅಜು಼ ಯೊ ಝ಼ಗೋ ಅಛ್ಛು಼ಥು.
2 ಏಕ್‌ ದೇವ್‌ನೊ ದರ್ಶನನೊ ಡೇರೊ ಭಾರ್‌ ಠೋಕೈರ‍್ಹಿನ್, ಇನ ಪಹಿಲ ಭಾಗ್‌ಮ, ಇನ ಪವಿತ್ರಝ಼ಗೊಕರಿ ಬೋಲ್ತುಥು. ಇನಾಮ ದೀವೊ, ಮೇಜ್ ಅಜು಼ ದೇವ್ನ ಸಮರ್ಪಣ್‌ಕರ‍್ಯೊ ಹುಯೊ ರೋಟೊ ಹಿಜ್ಜಾ಼ ರ‍್ಹೇತುಥು.
3 ಅಜು಼ ಬೇನು ಪಡ್ದಾನ ಪೀಠೆ ರ‍್ಹೇಸ್ತೆ ಕೋಣಾನ, ಘಣು ಪವಿತ್ರಝ಼ಗೊಕರಿ ಬೋಲ್ತುಥು.
4 ಇನಾಮ ಖ್ಹೊನ್ನಾನಿ ಖ್ಹಾಲರ‍್ಯಾನು ಢಾಕ್ಣಿಬಿ ಅಜು಼ ಖ್ಹೊನ್ನಾನು ತಗ್ಡು ಲಗಾಡ್ಯುಹುಯು ಒಪ್ಪಂದಾನು ಪಿಟಾರೊ ಥು. ಯೋ ಪಿಟಾರಾಮ ಮನ್ನ ನಖೈರ‍್ಹಯುಹುಯು ಖ್ಹೊನ್ನಾನಿ ಕಟೋರೊಬಿ, ಆರೋನನು ಚಿಗುರ್ ಮ್ಹೇಲ್ಯೊಹುಯೊ ಲಠ್ಠೊ ಅಜು಼ ದಖ್ಹ್‌ ಹುಕುಮ್ ಲಿಖಾಯುಹುಯು ಒಪ್ಪಂದಾನು ಬೇ ಬಂಡಾನು ಪಲ್ಗು ಥು.
5 ಯೊ ಪಿಟಾರನಪರ್ ದೇವ್ನು ಮಹಿಮೆನು ವತಾಳನು ಕೆರೂಬಿಕರಿ ಬೇ ಪರಿಯೇ ಫಾಕ್ಡಿ ಪಖ್ಹಾರಿನ್ ಯೊ ಝ಼ಗೊ ಅಖ್ಖು ಮೂಚಿರಾಖ್ಯುಥು. ಇನ ಹಮ್ಕೆ ಏಕೇಕ್‌ ಛೋ಼ಡಿಬೋಲಾನ ಕೊಹೊಯ್ನಿ.
6 ಅಮ್ ಆ ಅಖ್ಖು ತಯಾರ್ ಹುಯಿರ‍್ಹಿನ್ ಯಾಜಕಅಖ್ಖು ಯೊ ಡೇರಾನ ಪಹಿಲ ಭಾಗ್ನ ಜೈ಼ನ್, ಹರೇಕ್ ದನ್ ಹಿಜ್ಜಾ಼ ದೇವ್ನು ಸೇವೆನು ಕಾಮ್ ಕರ್ತುಥು.
7 ಕತೋಬಿ ಬೇನ ಕೋಣಾಮ ಮಹಾಯಾಜಕ್ ಎಕ್ಕಸ್ ಜ಼ಣೊ ವರಖ್ಹ್‌ನ ಏಕ್‌ ವಖ್ಹತ್ ಜಾ಼ತೊಥೊ. ಅಜು಼ ಇನಿ ಜೋ಼ಡ್ಮ ಬಲಿನು ಲ್ಹೋಯಿನ ಲೀನ್ ಜಾ಼ತೊಥೊ. ಯೊ ಲ್ಹೊಯಿನ ಇನಖ್ಹಾಜೇಬಿ ಅಜು಼ ಇನ ಅದ್ಮಿವ್‍ನು ಅಜ್ಞಾನ್‌ಥಿ ಕರ‍್ಯುಹುಯು ಪಾಪ್ನಖ್ಹಾಜೆಬಿ ಸಮರ್ಪಣ್‌ ಕರ್ನುಪಡ್ಯುಥು.
8 ಆ ಡೇರಾನು ಪಹಿಲು ಭಾಗ್‌ ಅಜೂ಼ಬಿ ರ‍್ಹಾವಾಲಗು ಘಣು ಪರಿಶುಧ್ ಝ಼ಗೊನ ಜಾ಼ವನು ಮಾರಗ್ ಹಮ್ಕೆಲಗು ದೆಖಾಯುಕೊಯ್ನಿ. ಕರಿಬೋಲಾನು ಪವಿತ್ರಾತ್ಮ ಬೋಲಿವತಾಳಸ್.
9 ಆ ಹಮ್ಕೇನ ಹಗಾಮ್ನ ವತಾಳನು ಹುಯಿರ‍್ಹುಸ್. ಯೋ ಶಾತ್ಕತೊ ಕಾಣ್ಕೆಬಿ ಅಜು಼ ಬಲಿದ್ಯವಾಥಿ ಆರಾದನೆ ಕರಾವಾಳು ಇವ್ಣ ಮನ್ನಿಸಾಕ್ಷಿ ಪೂರ ಕರಾನ ಕೊಹುವಾನಿ.
10 ಹಮ್ಕೆಲಗು ಇವ್ಣೆಖ್ಹಾರು ಖಲಿ ಖಾಣಪಾಣಿಬಿ ಅಶ್ನಾನ್‌ಧಾನ್ನಿ ಪದತ್ತಿ ಹುಯಿರ‍್ಹುತೆಖ್ಹಾಜೆ ಆಖಲಿ ಭಾರ್‌ಲ್ಯು ಕಾಮ್. ದೇವ್ ಇನ ನವ ನಿಯಮ್‌ನು ಹಗಾಮ್ ಆವಲಗುಬಿ ಇಮ್ಮಸ್ ರ‍್ಹಿಶೆ.
11 ಕತೋಬಿ ಕ್ರಿಸ್ತ ಯೇಸು ತದೇಸ್‌ ಮಹಾಯಾಜಕ್ ಹುಯಿನ್ ಐರ‍್ಹೋಸ್. ಯೋ ದ್ಯವಾನು ಅಛ಼್ಛು ಫಲ್ ಖ್ಹಾರು ತದ್‌ನು ತದೇಸ್‌ ಅಪ್ಣುನ ಛ಼. ಯೊ ಸೇವೆ ಕರುಕರಸ್ತೆ ಡೇರಾನ ಘರ್‌ಮ ಅಗ್ಗಳ್‌ಥಿಬಿ ಜಾ಼ಖ್ಹತ್ ಮಹಾನ್ ಅಜು಼ ಭರ್‌ಪೂರ್‌ ಹುಯಿರ‍್ಹುಸ್. ಆ ಅದ್ಮಿನ ಹಾತೇಥಿ ಭಾಂದಿಹುಯು ಕಾಹೆ. ಆ ಲೋಕ್‌ನು ಉಬ್‍ಜಾ಼ವ್ಣಿನ ಕಾಹೆ.
12 ಖ್ಹಾರಸ್‌ನಖ್ಹಾಜೆ ಮಹಾ ಪರಿಶುದ್ ಝ಼ಗೋಮ ಪ್ರವೇಶ್‌ ಕರ‍್ಯೊಕೊಯ್ನಿ. ಕೆಲ್ಡೊ ಬೋಕ್‌ಡಾನ ಲ್ಹೊಯಿಥಿ ಕಾಹೆ ಅಪ್ಣುನ ಕ್ರಿಸ್ತನೆ ಎಕ್ಕಸ್ ಬಾರ್ ಇನ ಶೊಂತ್ ಲ್ಹೋಯಿಥಿ ಹಮೇಶಾನಿ ರಕ್ಷಣೆಮ ಗಯೊ.
13 ಬೋಕ್‌ಡ ಅಜು಼ ಢಾಂಡಾನ ಲ್ಹೋಯಿಬಿ ಬಲಿನು ಜಾನ್ವರ್‌ನು ರಾಕ್‌ನಾಬಿ ಮೈಲುರ‍್ಹಾವಾಳಪರ್ ಛಿಡ್‍ಕಾಥಿ ಶರೀರ್‌ನ ಮೈಲಾನ ಪಾಕ್‌ ಕರೆಜಾ಼ಯ್.
14 ಅಜು಼ ಆ ಖ್ಹಾಚು಼ಕರಿ ಬೋಲಾನು ರ‍್ಹಯೂತೊ ಹಮೇಶಾನ ಆತ್ಮಥಿ ಇನುಯೋಸ್ ದೇವ್ನ ಕಳಂಕ್‌ಕೊಂತೆ ಬಲಿಹುಯಿನ್ ಸಮರ್ಪಣ್‌ ಕರಿಲಿದೊತೆ ಕ್ರಿಸ್ತನು ಲ್ಹೋಯಿ ಕೆತ್ರೇಕ್ಕಿ ಅಪ್ಣುನ ಜಾನ್‍ಕೊಂತೆ ಕಾಮ್‍ಥಿ ಛೋ಼ಡೈನ್, ಅಪ್ಣೆ ಜಿವ್ತೊಜಾನ್ನೊ ದೇವ್ನ ಆರಾದನೆ ಕರ್‌ಯೇತೆ ತಿಮ್ ಅಪ್ಣೆ ಮನ್ನಿಸಾಕ್ಷಿನ ಪಾಕ್‌ ಕರ‍್ಯಕೊಯ್ನಿಕಿಶು?
15 ಅನಖ್ಹಾಜೇಥಿ ದೇವ್‍ಥಿ ಬುಲಾಯೂತೆ ಅದ್ಮಿ ದೇವ್ನಿ ವಾಗ್ದಾನ್ ಹುಯಿರ‍್ಹುತೆ ಹಮೇಶಾನು ವಾರ್‌ಖ್ಹೊ ಲೀಲೆವ್ಣುಕರಿ ಕ್ರಿಸ್ತನೆ ಆ ನವ ಒಪ್ಪಂದನ ಮಳಾವವಾಳೊ ಹುಯಿರ‍್ಹೊಸ್. ಶನಕತೊ ಪಹಿಲಿ ಒಪ್ಪಂದನ ಹಗಾಮ್ಮ ಕರ‍್ಯುತೆ ಗಲ್ತಿನಖ್ಹಾಜೆ ಇವ್ಣುನ ಛುಟ್ಕಾರ್ ಕರಾನಖ್ಹಾಜೆ ಕ್ರಿಸ್ತ ಮರಣ್ ಲಿದೊ.
16 ಏಕ್‌ ಮರಣ್ಣಿ ಚಿಟ್ಟಿ ಲೀಖಿರಾಖನು ರ‍್ಹಯೂತೊ ಯೊ ಮರಿರ‍್ಹೋಸ್ ಸಾಬಿತ್‌ಕರಾನು ಜ಼ರೂರತ್ ಛಾ಼.
17 ಅನಿ ಮತ್ಲಬ್‌ ಶಾತ್ಕತೊ, ಯೊ ಮರ‍್ಯೊತೆ ತದೇಸ್‌ ಯೊ ನಿಯಮ್‌ ಕಾಮ್ನ ಆವಸ್ ಪಣ್ಕಿ ಲೀಖ್ಯೊಹುಯೊ ಜಿವ್ತೊ ರ‍್ಹವಲಗೂಬಿ ಯೋ ಕಾಮ್ನ ಕೋಆವಾನಿ.
18 ಅಮ್ ರ‍್ಹಾವಪರ್ ಪಹಿಲು ಒಪ್ಪಂದ ಜಿನುಬಿ ಲ್ಹೋಯಿಕೊಂತೆ ಘಟ್ ಭೀರ‍್ಯುಕೊಯ್ನಿ.
19 ಮೋಶೆ ಧರ್ಮಶಾಸ್ತ್ರನಿ ಹುಕುಮ್‌ನ ಖ್ಹಾರ ಅದ್ಮಿವ್‌ನ ಖ್ಹಮ್‍ಜಾ಼ಡ್ತೊ ಹುಯಿನ್ ತದೆ ಇನೆ ಢಾಂಡನಕೆಲ್ಡಾನ ಬೋಕ್‌ಡಾನ ಲ್ಹೋಯಿನ ಪಾಣಿಮ ಮಳೈನ್‌ ಅಜು಼ ಇನ ಧರ್ಮಶಾಸ್ತ್ರ ಲೀಖಿಹುಯು ಪುಂಗ್‌ಳಿನ ಉಪ್ಪರ್‌ಬಿ ಅಖ್ಖಾ ಅದ್ಮೆವ್‍ಪರ್‌ಬಿ ಹಿಸ್ಸೋಪ್‍ನ ಡೀರೆಥೇಬಿ ಲಾಲ್‌ರು಼ಯಿಥೀಬಿ ಛಿಡ್‌ಕ್ಯೊ.
20 ಆ ದೇವ್ನೆ ತುಮಾರಖ್ಹಾಜೆ ಹುಕುಮ್ ಕರಿರಾಖ್ಯೊತೆ ಒಪ್ಪಂದಾನು ಲ್ಹೋಯಿ ಆ ಹುಯಿರ‍್ಹುಸ್ ಕರಿಬೋಲ್ಯೊ.
21 ಇಮ್ಮಸ್ ಡೇರಾಪರ್‌ಬಿ ದೇವ್ನ ಸೇವೆನ ಹೋಣುತೆ ಅಖ್ಖಾಸ್ ಜಿನಖ್ಹ್‌ಪರ್‌ಬಿ ಅಮ್ನಿಸ್ ಪರಕ್ಮ ಲ್ಹೋಯಿನ ಛಿಡ್‌ಕ್ಯೊ.
22 ಇಮ್ಮಸ್ ಧರ್ಮಶಾಸ್ತ್ರನಿ ಪರಕ್ಮ ಬೋಲ್ನುಕತೊ ಖ್ಹಾರೂಸ್ ರಾಛು಼ ಲ್ಹೋಯಿಥೀಸ್‍ ಶುದ್ದಿಹೋತುಥು. ಅಜು಼ ಲ್ಹೋಯಿ ರಂಚಾ಼ವಥಿ ಕಾಹೆತೆ ಪಾಪ್ ಕ್ಷಮಾಪಣ್ ಕೊಹೊಯ್ನಿ.
ಕ್ರಿಸ್ತನು ಬಲಿಥೀಸ್ ಪಾಪ್ನ ಪರಿಹಾರ್
23 ಇನಾಖ್ಹಾಜೆ ಸೊರ್ಗಾನು ಜಿನಖ್ಹ್‌ನ ಛಾ಼ಳಿನಿಘೊಣಿನು ಜಿನಖ್ಹ್‌ನ ಶುದ್ದಿಕರಣನಖ್ಹಾಜೆ ಅಥ್ರಾನು ಬಲಿಖ್ಹಾರು ಹೋಣುಕತೊ, ಖ್ಹಾಚಮಾಬಿ ಸೊರ್ಗಮ ಶುದ್ದಿಕರಾನ ಮಹಾನ್ ಬಲಿನು ಜ಼ರೂರತ್ ಛ಼.
24 ಶನಕತೊ ಕ್ರಿಸ್ತ ಖ್ಹಾಚ ಮಂದಿರ್‌ ಘೋಣಿನಿತರಾನು ಹಾತೇಖ್ಹು ಭಾಂದ್ಯುಹುಯಿ ಪವಿತ್ರ ಝ಼ಗೋಮ ರ‍್ಹಿಯೊಕೊಂತೆ ಅಪ್ಣಭಣಿಥು ದೇವ್ನಖ್ಹಾಮ್ಣೆ ಹಮ್ಕೆ ದೆಖೈಲ್ಯವಾನಖ್ಹಾಜೆ ಸೊರ್ಗಾಮ ಪ್ರವೇಶ್‌ ಕರ‍್ಯೊ.
25 ಆನಾಹುಯಿನ್ ಮಹಾಯಾಜಕ್ ವರಖ್ಹ್‌ ವರಖ್ಹ್‌ನಾಬಿ ಜಾನ್ವರ್‌ನ ಲ್ಹೋಯಿನ ಲೀನ್ ಘಣು ಪರಿಶುದ್ ಝ಼ಗೋಮ ಜಾ಼ತೋಥೊ. ಕತೋಬಿ ಕ್ರಿಸ್ತ ಇನುಯೋಸ್ ಕೈಯೇಕ್ ವಖ್ಹತ್ ಸಮರ್ಪಣ್‌ಕರಾನ ಪರಲೋಕ್‍ಮ ಗಯೊಕೊಯ್ನಿ.
26 ಇಮ್‌ ಸಮರ್ಪಣ್‌ ಕರಾನು ರ‍್ಹಯು ಹೋತ್ತೊ, ಜಗತ್‌ ಉಬ್‍ಜಾ಼ವ್ಣಿಥುಬಿ ಕೈಯೇಕ್ ವಖ್ಹತ್ ಖ್ಹತಾಪ್ಣಿಲೇವ್ಣು ಪಡ್ಯುಥು. ಕತೋಬಿ ಖ್ಹಾರನಖ್ಹಾಜೆ ಎಕ್ಕಸ್ ಹಲ್ಲ ಜ಼ಗ್‍ಜ಼ಮಾನನಿ ಖ್ಹರ್ತಿಲಗೂಬಿ, ಯೋ ಪಾಪ್ನ ಕಾಡಿನಾಖನಿ ಉದ್ದೇಶ್‌ಥಿ ಇನುಯೋಸ್ ಬಲಿದಾನ್‌ ಹುವಾನ ದೆಖೈಲಿದೊ.
27 ಎಕ್ಕಸ್ ವಖ್ಹತ್ ಮರಾನುಬಿ ಅಜು಼ ಇನಕೇಡೆಥು ದೇವ್‍ಥಿ ತೀರ್ಪ್ ಲೀಲ್ಯಾವಾನು ಹುಯಿರ‍್ಹುಸ್.
28 ಇಮ್ಮಸ್ ಕ್ರಿಸ್ತ ಜಿನುಬಿ ಕೈಯೆಕ್ಕಿ ಅದ್ಮಿನು ಪಾಪ್ ಕಾಡಾನಖ್ಹಾಜೆ ಎಕ್ಕಸ್ ವಖ್ಹತ್ ಸಮರ್ಪಣ್‌ ಹುಯೊ. ಯೋ ಬೇನೆ ಹಲ್ಲ ದೆಖಾವ್‌ಶೆತೆ ಪಾಪ್ನ ಕಾಡನ ಕಾಹೆಕತೊ ಕೋಣ್ ಟಿವೈರ‍್ಹುಸ್ಕಿ ಇನ ಬಚಾ಼ನಖ್ಹಾಜೆ ಆವ್‌ಶೇತೆ.