10
1 ಧರ್ಮಶಾಸ್ತ್ರ ಅಗಾಡಿ ಆವ್ಣುತೆ ಅಛ್ಛಿ ವಾತ್ನಿ ಛಾ಼ಯ ಪಣ್ಕಿ ಯೋ ಇನು ಖ್ಹಾಚು಼ ರೂಪ್‍ಕಾಹೆ. ಇನಖ್ಹಾಜೆ ಯೋ ಧರ್ಮಶಾಸ್ತ್ರ ಹರೇಕ್ ವರಖ್ಹ್‌ ಕದೇಬಿ ಎಕ್ಕಸ್ ಥರಾನು ಬಲಿನ ಛ಼ಡೈನ್ ದೇವ್‌ಕನ ಆವಾಳಾನ ಕದೇಬಿ ಭರ್‌ಪೂರ್‌ ಕರ್ಶೆ ಕೊಯ್ನಿ.
2 ಅದ್ಮಿಖ್ಹಾರು ಇವ್ಣು ಆರಾದನೆ ಕರಾಥಿ ಶುದ್ದಿಕರಣ್ ಹುಯುಹೊತ್ತೊ, ಇವ್ಣಮ ಪಾಪ್ನಿ ಗಲ್ತಿನಿ ಖ್ಹಯಾಲಸ್ ರ‍್ಹಿಯುಹೊತ್‍ಕೊಯ್ನಿ ಅಜು಼ ಅಖ್ಖು ಬಲಿದಾನ್‌ ದ್ಯವಾನು ಭೀರಿಗಯುಹೊತ್.
3 ಹಮ್ಕೆತೋಬಿ ಯೋ ಬಲೀಥಿ ಹರೇಕ್ ವರಖ್ಹ್‌ಬಿ ಪಾಪ್ನುಯಾದ್‍ ಹುವಾಸ್.
4 ಶನಕತೊ ಢಾಂಡಾವ್‌ನು ಅಜು಼ ಬೋಕ್‌ಡಾವ್‌ನು ಲ್ಹೋಯಿಥಿ ಪಾಪ್ನ ಪರಿಹಾರ್ ಕರಾನ ಕೊಹೊಯ್ನಿ.
5 ಇನಖ್ಹಾಜೆ ಕ್ರಿಸ್ತ ಜಗತ್ಮ ಆವಾನಿವಖ್ಹ್‌ತೆ ಇನೆ ಅಮ್ ಬೋಲ್ಯೊಕಿ, “ದೇವ್ ತುನ ಬಲಿ ಛ಼ಡಾವನು ಅಜು಼ ಕಾಣ್ಕೆ ದ್ಯವಾನು ಪಸಂದ್ ಕೋಥೂನಿ, ಕತೋಬಿ ಮನ ಏಕ್ ಶರೀರ್‌ನ ತಯಾರ್ ಕರೀನ್ ದೀರಾಖ್ಯೊಸ್.
6 ಜಾನ್ವರ್‌ನ ಬಾಳಥಿಬಿ, ಪಾಪ್ನ ಪರಿಹಾರ‍್ನ ಪೂರ ಶರೀರ್‌ನು ಬಲಿಥೀಬಿ ತುನ ಖುಷಿ ಹುವಾಕೊಯ್ನಿ.
7 ತದೆ ಮೆ ಹಂದೇಕ್‍ಲ ದೇವ್, ದಪ್ತರ್‌ನಿ ಪುಂಗ್‍ಳಿಮ ಮಾರಿ ಬಾರೇನು ಲೀಖೈರುತೆ ಪರಕ್ಮ ತಾರಿ ಖ್ಹೂಜ಼್‌ನ ಚ಼ಲಾವನಖ್ಹಾಜೆ ಐರ‍್ಹೋಸ್” ಕರಿ ಮೇ ಬೋಲ್ಯೊ.
8 ಪಹಿಲೆ ಇನೆ ಬೋಲ್ಯೊತೆ ಧರ್ಮಶಾಸ್ತ್ರನಿ ಪರಕ್ಮ ಅರ್ಪಣ್‍ ಹುಯುತೆ ಬಲಿಥೀಬಿ ಜಾನ್ವರ್‌ನ ಬಾಳಥಿಬಿ ಅಜು಼ ಪಾಪ್ ಪರಿಹಾರ‍್ನು ಬಲಿಥೀಬಿ ತುನ ಪಸಂದ್ ಕೋಥೂನಿ. ತು ಯೋ ಅಖ್ಖಾಮ ಖುಷಿ ಕರಾಕೊಯ್ನಿ.
9 ಅನವಾರ್, “ಹಂದೇಕ್‍ಲ ದೇವ್ ತಾರಿ ಖ್ಹೂಜ಼್‌ನ ಚ಼ಲಾವನ ಮೇ ಐರ‍್ಹೋಸ್!” ಕರಿ ಬೋಲಿರಾಖ್ಯೊಸ್. ಅಮ್ ದೇವ್ನೆ ಜೂ಼ನು ಬಲಿದಾನ್‌ ಕಾಡಿನಾಖನಖ್ಹಾಜೆ ಕ್ರಿಸ್ತನು ಬಲಿದಾನ್‌ ಯೊ ಝ಼ಗೋಮ ಮ್ಹೇಲ್ಯೊ.
10 ಶನಕತೊ ಕ್ರಿಸ್ತಯೇಸು ಎಕ್ಕಸ್ ಬಾರ್ ಅಖ್ಖಾನಖ್ಹಾಜೆ ಇನ ಶರೀರ್‌ನ ಸಮರ್ಪಣ್‌ ಕರಿನ್ ದೇವ್ನಿಖ್ಹೂಜ಼್ನ ಚ಼ಲಾಯೊತೆ ಇನಖ್ಹಾಜೆ ಅಪ್ಣೆ ಅಖ್ಖಾ ಪಾಪ್‌ಥಿ ಪಾಕ್‌ಹುಯಿಗ.
11 ಹರೇಕ್ ಯಾಜಕ್‍ಬಿ ದನ್‍ಪರೋಜ಼್ ಚಾ಼ಚ಼ರ್‌ನು ಸೇವೆಕರ್ತೊಥೊ. ಇಮ್ಮಸ್ ಕೈಯೆಕ್‌ಹಲ್ಲ ಬಲಿದಾನ್‌ ಕರ್ತೊಥೊ ಕತೋಬಿ ಅನೇಥಿ ಪಾಪ್ನ ಕಾಡಿನಾಖನ ಕೊಹುಯುನಿ.
12 ಕತೋಬಿ ಕ್ರಿಸ್ತ ಪಾಪ್ನಖ್ಹಾಜೆ ಅಖ್ಖಾ ಹಗಾಮ್ಮ ಎಕ್ಕಸ್‍ಬಲಿನ ಸಮರ್ಪಣ್‍ಕರೀನ್, ದೇವ್ನ ಖಾವಿಬಾಜು಼ ಬೇಶಿಗಯೊ.
13 ತಪ್‌ಥೊ ಇನ ವಹೇರ‍್ಯಾನ ಇನ ಗೋಡಾನಿ ರಚ್ಚೊ಼ ಬಣಾವಲಗೂಬಿ ಯೋ ಟಿವೈರ‍್ಹೋಸ್.
14 ಇನಿ ಎಕ್ಕಸ್ ಬಲಿಥಿ ಪಾಪ್ನ ಪಾಕ್‌ಕರಿನ್ ಪೂರಕರಿರಾಖ್ಯೊಸ್.
15 ಪವಿತ್ರಾತ್ಮ ಜಿನುಬಿ ಅಪ್ಣುನ ಸಾಕ್ಷಿ ದ್ಯವಾಳೊಹುಯಿನ್, ಪಹಿಲೇಥು ಯೊ ಅಮ್ ಬೋಲಸ್.
16 “ಯೋ ದನ್ ಅವಾದಿನ್ ಮೇ ಇವ್ಣಜೋ಼ಡ್ಮ ಕರಿಲ್ಯಾವನು ಒಪ್ಪಂದ ಅಮ್‍ರ‍್ಹಿಶೆ, ಮಾರಿ ನಿಯಮ್ನ ಇವ್ಣ ದಿಲ್ಮ ಮ್ಹೇಲಿಶ್ ಇವ್ಣ ದಿಮಾಕ್ಮ ಯೋ ಅಖ್ಖು ಲೀಖಿಶ್”. ಕರಿ ಪ್ರಭು ಬೋಲಸ್.
17 ಅಜು಼ ಯೋ ಅಮ್ ಬೋಲಸ್, “ಇವ್ಣ ಪಾಪ್ ಅಖ್ಖಾನಾಬಿ ಅಜು಼ ಇವ್ಣ ಖರಾಬ್ ಕಾಮ್ನಾಬಿ ಬಿಜು಼ ಕದೇಬಿ ಮೇ ಯಾದ್ಮ ಕೋಲೈಶ್‌ನಿ”.
18 ಹಮ್ಕೆ ಪಾಪ್‌ಖ್ಹಾರು ಮಾಪ್‌ ಹುವಾನಬಾದ್ಮ ಪಾಪ್‍ಪರಿಹಾರ‍್ನು ಬಲಿದ್ಯವಾನು ಜ಼ರೂರತ್ ಕೊಯ್ನಿ.
ಅಪ್ಣೆ ದೇವ್ನ ಖನ್ನೆ ಅಯ್ಯೆ
19 ಇನಖ್ಹಾಜೆ ಭೇನೆ ಭೈಯೇವೊ, ಯೇಸುನ ಲ್ಹೋಯಿಥಿ ಘಣಿ ಪವಿತ್ರಝ಼ಗೋಮ ಜಾ಼ವಾನ ಅಖ್ಖಿ ಛುಟ್ಕಾರ್ ಛಾ಼.
20 ಅಪ್ಣಖ್ಹಾಜೆ ಇನಿ ಶರೀರ್‌ಕರಿ ಬೋಲಾನು ಯೊ ಪಡ್ದಾನ ಮಹಿತೊ ಜಾ಼ವನ ನವ ಜಾನ್ನೊ ಮಾರಗ್‌ನ ಕಾಡಿರಾಖ್ಯೊಸ್.
21 ಅಜು಼ ದೇವ್ನ ಘರ್‌ಪರ್ ಅಧಿಕಾರ್‌ ರ‍್ಹವಾಳೊ ಮಹಾನ್ ಯಾಜಕ್ ಅಪ್ಣುನ ಛಾ಼.
22 ಇನಖ್ಹಾಜೆ ಖರಾಬ್ ದಿಲ್ನಿಸಾಕ್ಷಿನ ಮ್ಹೆಲ್ಯಹುಯ ದಿಲ್‌ಥೀಬಿ ನೀರ್ಛೊ಼ಳ್‍ ಪಾಣಿಥಿ ಪಾಕ್‌ಹುಯ ಶರೀರ್‌ಥೀಬಿ ಖ್ಹಾಚಆತ್ಮಥಿ ಪೂರ ವಿಶ್ವಾಸ್‍ಥಿ ದೇವ್‌ಕನ ಅಯ್ಯೆ.
23 ದಿದೋತೆ ವಾಗ್ದಾನ್ನ ಚ಼ಲಾವವಾಳೊ ದೇವ್. ಇನಖ್ಹಾಜೆ ಅಪ್ಣೆ ವಿಶ್ವಾಸ್‌ನಿ ಬಾರೇಮ ಘಟ್‍ಥಿ ಧರಿರಾಖೆ.
24 ಅಪ್ಣೆ ಏಕ್‌ಥಿ ಏಕ್ ಪ್ಯಾರ್‌ವತಾಳನ ಖ್ಹಾಜೇಬಿ ಅಛ್ಛು಼ಕಾಮ್ ಕರಾನ ಖ್ಹಾಜೇಬಿ ಹುಮ್ಮಖ್ಹ್‌ ದೇವ್ಣುಕರಿ ಮಾಲುಮ್ ಕರಿಲಿಯೆ.
25 ಸಬೆ ಮಳಾನು ಆದತ್‌ನ ಥೋಡುಜ಼ಣು ಮ್ಹೆಲಿದಿದೂತೆ ತಿಮ್ ಅಪ್ಣೆ ಮ್ಹೇಲಿನಾದೆವ್ಣುತೆ, ಅಪ್ಣುನ ಮಾಲುಮ್ ಛಾ಼ತೆ ಪರಕ್ಮ ಪ್ರಭು ಆವಾನದನ್‍ ಖನ್ನೆ ಐಗಾತೆ ಇನಖ್ಹಾಜೆ ಬಿಜೂ಼ಬಿ ಘಣು ಏಕ್‌ಥಿಏಕ್ ಹುಮ್ಮಖ್ಹ್‌ ದಿಯೇ.
26 ಅಪ್ಣೆ ಖ್ಹಾಚ಼ನ ಅಕ್ಕಲ್‌ನಿ ಬಾದ್ಮಬಿ ಪಾಪ್ ಕರ‍್ತಸ್ ರ‍್ಹಯಾತೊ ಪಾಪ್ ಪರಿಹಾರ‍್ನಖ್ಹಾಜೆ ಬಿಜು಼ ಖಿವೂಬಿ ಬಲಿದ್ಯವಾನು ಕೋಉಷೇನಿ.
27 ಇನಬದಲ್, ಅಖ್ಖೇಥಿ ಡರ್‌ಥಿ ಭರೈರ‍್ಹುತೆ ನ್ಯಾವ್‌ನು ತೀರ್ಪ್‌ನಖ್ಹಾಜೆ ಟಿವೈರ‍್ಹವಾನು ಅಜು಼ ದೇವ್ನ ವಹೇರ‍್ಯಾವ್ನ ಬಳಾನಿ ಇರಾದನಿ ಝ಼ಲ್‌ಪಟ್‌ ಖಲಿ ರ‍್ಹಿಶೆ.
28 ಮೋಶೇನು ಧರ್ಮಶಾಸ್ತ್ರನ ಝಿಟ್ಕಾರ‍್ಯ ಹುಯಾನ ಬೇಜ಼ಣು ನತರ್ ತೀನ್ ಜ಼ಣಾನಿ ಸಾಕ್ಷಿನಿ ಆಧಾರ್‌ಪರ್ ಗೋರ್‌ಕೊಂತೆ ಮರಣ್ಣಿ ದಂಡನೆ ದೇತೂಥು.
29 ಅಮ್‍ರ‍್ಹವಾಪರ್ ದೇವ್ನ ಛಿಯ್ಯಾನ ಖುಂದ್ಲೀನ್, ಇನ ಪಾಕ್‌ಕರಿಲಿದೂತೆ ಒಪ್ಪಂದಾನು ಲ್ಹೋಯಿನ ಅಶುದ್ದಕರಿ ಜಾ಼ಣಿಲೀನ್ ದೇವ್ನಿ ವಾರ್‌ಖ್ಹಾನಿ ವರಾನ ಆತ್ಮಾನ ಝಿಟ್ಕಾರವಾಳೊ ಉಶೆ, ಬಿಜು಼ ಕೆಥ್ರಾನು ಕಠೋರ್ ನಿಶತ್ನ ಯೋ ಖ್ಹಣೇದ್ ಹುಯೆಜಾ಼ಯ್‍ಕರಿ ತುಮೇಸ್ ಸೋಚಿದೇಖೊ.
30 ಬದಲ್‌ನ ಬದಲ್ ಕಾಡಾನು ಮಾರುಕಾಮ್; ಮೇಸ್ ದೀಶ್‍ಕರಿ ಬೋಲ್ಯೊಹುಯೊ ಅಪ್ಣುನ ಮಾಲುಮ್ ಛ಼. ಶನಕತೊ ಬಿಜೇಕ್‌ ಹಲ್ಲ ಪ್ರಭು ಇನ ಅದ್ಮಿನ ನ್ಯಾವ್‌ನು ತೀರ್ಪ್ ಕರ್ಶೆ.
31 ಜಿವ್ತಜಾನ್‌ವಾಳೊ ದೇವ್ನಹಾತ್ಮ ಖ್ಹಪ್‍ಡಾನು ಘಣು ಭಯಂಕರ್ ಹುಯಿರ‍್ಹುಸ್.
32 ಅಮ್ ರ‍್ಹವಾಪರ್ ತುಮೆ ಗ್ಯಾನ್ನು ಉಜಾ಼ಖ್ಹ್‌ ಲೀರಾಖಪರ್‌ ತದೆ ದೇವ್ನಿ ಉಜಾ಼ಖ್ಹ್‌ ತುಮಾರಪರ್ ಥು. ರ‍್ಹಯುತೋಬಿ ತುಮೆ ಕೈಯೇಕ್ ವದೆಖ್ಹ್‌ಮ ತುಮೆ ಖ್ಹಮಾಳ್ಯಾತೆ ದನ್ನ ಯಾದ್ ಕರಿಲೆವೊ;
33 ಥೋಡಿ ವಖ್ಹತ್ ತುಮೆ ಚಿ಼ಂಗಾವ್ಣಿನಾಬಿ,ಅಜು಼ ಥೋಡಿ ವಖ್ಹತ್ ಖ್ಹತಾಪ್ಣಿನಾಬಿ ಖ್ಹಮಾಳಿನ್ ಚಾ಼ವ್‌ಣ್ಯ ಕಡೈಲಿದ. ಅಜು಼ ಥೋಡಿ ವಖ್ಹತ್ ವದೇಖ್ಹ್‌ ಪಡಾವಾಳನಿ ಜೋ಼ಡ್ಮ ಮಳಿನ್ ಖ್ಹಮಾಳಿಲಿದ.
34 ತುಮೆ ಜೇಲ್‌ಮ ರ‍್ಹವಾಳನ ಆರ್‌ಗೋರ್‌ ಒತಾಳ್ಯ. ಅನೇಥಿ ಊಚು಼ ಹುಯಿರ‍್ಹುತೆ ಹಮೇಶಾನಿ ಆಸ್ತಿ ಛಾ಼ಕರಿ ಮಾಲುಮ್ ಕರಿಲಿದ ತುಮಾರಿ ಶೊತ್ನ ಛಿನೈಲ್ಯವಾಳಾನ ಶಂತೋಖ್ಹ್‌ಥಿ ಮ್ಹೇಲಿರಾಖ್ಯಸ್.
35 ಇನಖ್ಹಾಜೆ ತುಮಾರಿ ಕಿಮ್ಮತ್ನ ನಕೊ ಮ್ಹೇಲಿದೆವೊ. ಇನ ಘಣಿ ಮೋಟಿ ಪ್ರತಿಫಲ್ ಛಾ಼.
36 ತುಮೆ ದೇವ್ನಿ ಮರ್ಜಿನ ಚ಼ಲೈಹುಯಿಗುತೆ ತದೆ ವಾಗ್ದಾನ್ನ ಲೀಲೇವ್ಣುಕತೊ ತುಮೆ ಖ್ಹಮಾಳಿನ್ ರ‍್ಹೇವ್ಣು.
37 ಶನಕತೊ ಪವಿತ್ರಶಾಸ್ತ್ರ ಬೋಲಸ್, “ಆವಾಳೊ ಬಿಜು಼ ಥೋಡ ದನ್ಮಾಸ್ ಆವ್‌ಶೆ ಯೊ ದೇರ್‌ ಕರ್ಶೆಕೊಯ್ನಿ.
38 ಇನಖ್ಹಾಜೆ ಮಾರು ನೀತಿವಾಳೊ ವಿಶ್ವಾಸ್‌ಥೀಸ್ ಜಿವ್‌ಶೆ, ಕತೋಬಿ ಇನೇಥಿ ಕೋಣ್‌ತೋಬಿ ಪೀಠೆ ಧಕ್ಯೋತೊ ಯೊ ಮನ ಪಸಂದ್ ಕೊರ‍್ಹಿಶೇನಿ.
39 ಅಪ್ಣೆತೋಬಿ ಪೀಠೆ ಹಟವಾಳಹುಯಿನ್ ನಾಶ್‍ಹುವಾಳ ಅದ್ಮಿಕಾಹೆ. ಅನಬದಲ್ ವಿಶ್ವಾಸ್‌ ಕರಾವಳಹುಯಿನ್ ರಕ್ಷಣೆ ಲೀಲಾವಳ ಹುಯಿರ‍್ಹಾಸ್.