6
ಏಕ್‌ಥಿಏಕ್ ಭೋಜ಼್‌ ಝೇಲಾವಾಳ ರ‍್ಹವೊ
1 ಭೈಯೇ ಭೇನೆವೊ ತುಮಾರಮ ಕೋಣ್‌ತೋಬಿ ಖಿವುತೋಬಿ ಪಾಪ್‌ಮ ಖ್ಹಪ್ಡಿ ರ‍್ಹಯೂತೊ ಎಥ್ರಾನವಾಳನ ಆತ್ಮಥಿ ಭರೈರ‍್ಹಾವಳ ತುಮೆ ಧೀಮೆಥಿ ಬೋಲಿನ್ ಬರೋಬರ್ ಕರೊ. ತುಮೆತೋಬಿ ಶೋದನೆಮ ನಾಪಡ್ನುತೆ ಇಮ್‌ ತುಮಾರಿ ಬಾರೇಮ ಜ಼ತನ್ ರ‍್ಹವೊ.
2 ಏಕ್ಜ಼ಣೊ ಬಿಜೇಕ್ ಜ಼ಣಾನಿ ಭೋಜ಼್‌ನ ಝೇಲಾದೆ, ಅಮ್ ಕ್ರಿಸ್ತನು ನಿಯಮ್ನ ಪೂರಕರೊ.
3 ಶನಕತೊ ಮೆ ಶಾತ್ ನಾ ರ‍್ಹಿಯೋತೋಬಿ, ಇನು ಯೊ ಮೋಟೊಕರಿ ಲ್ಹಾಯೊತೊ ಯೊ ಧೋಕೊ ಖಾವಳೊ ಹುಯಿರ‍್ಹೊಸ್.
4 ಹರೇಕ್ ಜ಼ಣೊ ಯೋ ಕರಾತೆ ಕಾಮ್ನ ತರೀಪ್‌ಶ ಕರಿಲ್ಯಾವಾದೆ. ತದೆ ಯೊ ಇನಖ್ಹಾಜೇಥಿ ಊಚೊ಼ ಹುಯೆಜಾ಼ಯ್‌ ಪಣ್ಕಿ ಬಿಜೇಕ್ ಜ಼ಣಾನಿತರಾಸ್‌ ಮೇ ಬರೊಬರ್‌ ಬೋಲಿಲಾವನು ಹೋಣುಕೊಯ್ನಿ.
5 ಶನಕತೊ ಹರೇಕ್ ಜ಼ಣೊ ಇನೊ ಶೊಂತ್ ಭೋಜ಼್‌ನ ಯೋಸ್ ಪಾಡವಾಳೊ ಹುಯಿರ‍್ಹೇಣು.
6 ಕ್ರಿಸ್ತನು ಬೋಧನೆನ ಶಿಕವಾಳೊ ಇನ ಶಿಕಾಡವಾಳಮ ಛಾ಼ತೆ ಅಖ್ಖಾಸ್ ಅಛ್ಛಾ಼ಮಾಥು ವಾಟಪಾಡಿಲ್ಯವಾದೆ.
7 ತುಮಾರು ತುಮೆ ಧೋಕ ನಕೊಖಾವೊ, ದೇವ್ನ ನಕ್ಲೆನಿತರ ಲ್ಹಾವನ ಕೊಹುವ್ವಾನಿ. ಅದ್ಮಿ ಯೋ ಶಾತ್ ಬಿತ್‌ಕರಸ್ಕಿ ಇನಾಸ್ ವ್ಹಾಡ್ಣು.
8 ಇನು ಶರೀರ್‌ನು ಲಾಲಚ್‌ನಿ ತರಾನು ಬಿತ್ತವಾಳೊ ಯೋ ಯೊ ಖ್ಹಯಾಲ್‍ಥೀಸ್ ನಾಶನನ ವ್ಹಾಡವಾಳೊ ಹುಯಿರ‍್ಹೋಸ್. ಪವಿತ್ರಾತ್ಮನಿ ಬಾರೇಮ ಬಿತ್ತವಾಳೊ ಪವಿತ್ರಾತ್ಮಥಿ ಹಮೇಶಾನು ಜಾನ್ನ ಫಲ್ನ ವ್ಹಾಡ್‌ಶೆ.
9 ಅಛ್ಛಾ಼ನ ಕರಾಮ ವಳ್‍ಶಿ ನಕೊಕರಿಯೆ, ದಿಲ್ಮ ಢೀಲ ನಾಪಡ್ನುತೆ ರ‍್ಹಿಯೆ, ತದೆ ಬರೊಬ್ಬರ್‌ನಿ ವಖ್ಹತ್‌ಮ ಅನಾಜ಼್ ವ್ಹಾಡ್‌ಶು.
10 ಇನಖ್ಹಾಜೆ ವಖ್ಹತ್ ರ‍್ಹವಾನಿಸ್ ವಖ್ಹ್‌ತೆ ಅಖ್ಖಾನ ಅಛ಼್ಛು ಕರಿಯೆ. ವಿಶೇಷ್‌ಥಿ ಎಕ್ಕಸ್ ಘರ್‌ವಾಳನಿತರ ವಿಶ್ವಾಸಿ ಭೈಯೇನ ಕರಿಯೆ.
ಖ್ಹರ್ತಿನಿ ಝೇತಾವ್ಣಿ ಅಜು಼ ಖ್ಹಲಾಮ್
11 ದೇಖೊ ಆ ಮೋಟ, ಮೋಟ ಲೀಖ್ಯಾನ ಮಾರ ಹಾತೇಖ್ಹುಸ್ ತುಮುನ ಲೀಖುಕರುಸ್!
12 ಕಂಡಿ ಛ಼ಡೈಲ್ಯವಾಳು ಶರೀರ್‌ಮ ಖ್ಹತ್ನ ಕರಾವೊಕರಿ ತುಮುನ ಜು಼ಲಮ್‌ ಕರಾಸ್, ಶನಕತೊ ಕ್ರಿಸ್ತನಿ ಶಿಲ್‌ಬೇನಖ್ಹಾಜೆ ಇವ್ಣುನ ಖ್ಹತಾಪ್ಣಿ ನಾಹೊಣುಕರಿ ಬೋಲಾನುಸ್ ಇವ್ಣು ಉದ್ದೇಶ್.
13 ಖ್ಹತ್ನ ಕರಾಯುಹುಯೂಸ್ ಧರ್ಮಶಾಸ್ತ್ರನ ಪಾಡಿನ್ ಚಾ಼ಲುಕರ ಕೊಯ್ನೀನಿ. ಇವ್ಣೆ ತುಮಾರಿ ಶರೀರ್‌ನಿ ಬಾರೇಮ ಊಚ಼ ಹುವಾನಖ್ಹಾಜೆ ಖ್ಹತ್ನ ಹೋಣುಕರಿ ಆಖ್ಹ್‌ಕರಾಸ್‌.
14 ಮನತೋಬಿ ಮಾರೊ ಪ್ರಭು ಯೇಸು ಕ್ರಿಸ್ತನಿ ಶಿಲ್‌ಬೇನಿ ಬಾರೇಮಸ್ ಪಣ್ಕಿ ಬಿಜು಼ ಖೆವಾಥೀಬಿ ಊಚು಼ ಹೋಣುಕೊಯ್ನಿ. ಇನೇಥಿ ಮೇ ಜಗತ್ನಖ್ಹಾಜೆ ಮರಿಗೊ; ಜಗತ್‌ ಮಾರಖ್ಹಾಜೆಬಿ ಶಿಲ್‌ಬೇಪರ್ ಮರಿಗಯುಥು.
15 ಶನಕತೊ ಖ್ಹತ್ನ ಹುಯುತೋಬಿ ನತರ್ ನಾಹುಯುತೋಬಿ ಯೋ ಮುಖ್ಯ ಕಾಹೆ. ಕತೋಬಿ ನವೇಥಿ ಪೈದಾಹುವಾನುಸ್ ಮುಖ್ಯ ಹುಯಿರ‍್ಹುಸ್.
16 ಆ ನಿಯಮ್ ಅಖ್ಖಾನ ಬರೊಬರ್‌ಥಿ ಚಾ಼ಲವಾಳ ಅಖ್ಖಾಸ್ನ ಅಜು಼ ಇಸ್ರಾಯೇಲ್‌ವಾಳ ದೇವ್ನ ಅದ್ಮಿವ್‌ನ ಸಮಾಧಾನ್‍ಬಿ ಗೋರ್‌ಬಿ ಮಳಾದೆ!
17 ಅನೇಥಿ ಪಾರ್ ಮನ ಕೋಣ್‌ಬಿ ಖ್ಹತಾವ್ಣುನಾ. ಮಾರ ಶರೀರ್‌ಮ ಯೇಸು ಕ್ರಿಸ್ತನು ಖ್ಹಣೇದ್ನ ನಖೈರಾಖ್ಯೊಸ್.
18 ಭೈಯೇ ಭೇನೆವೊ, ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ವಾರ್‌ಖ್ಹೊ ತುಮಾರ ಆತ್ಮನಿ ಜೋ಼ಡ್ಮ ರ‍್ಹವಾದೆ. ಆಮೆನ್.