ಎಫೆಸದವರಿಗೆ ಬರೆದ ಪತ್ರಿಕೆ
ಪೌಲನೆ ಎಫೆಸವಾಳನ ಲೀಖ್ಯೋತೆ ಚಿಟ್ಟಿ
ಮಾಲುಮ್‌ ಕರಾನು
ಎಫೆಸವಾಳನ ಲೀಖ್ಯೋತೆ ಚಿಟ್ಟಿ ಕ್ರಿಸ್ತನ ಪೈದಾಖ್ಹ್‌ನ ವಾರ್ ಘಣೇಥಿ ತೀನಿಖ್ಹ್‌ ವರಖ್ಹ್‌ನಿ ಉಂಬರ್‌ಮ ಲಿಖೈರ‍್ಹುಸ್. ಕೊಲೊಸ್ಸೆವಾಳಾನ ಲೀಖಾಯುತೆ ಚಿಟ್ಟಿಬಿ ಆ ವೇಳ್ಮ ಲೀಖೈರುಸ್. ಲೀಖಾಪಟ್ ಕರಾವಾಳೊ ಮೆ ಅಪೊಸ್ತಲ ಪೌಲಕರಿ ಪರಿಚಯ್ ಕರಸ್ 1:1 ಕೊಲೊಸ್ಸೆನು ಚಿಟ್ಟೀಮ ರ‍್ಹೆಯಿತೆ ತಿಮ್ ಶೊಂತ್ ಖ್ಹಲಾಮ್ನ ಎಫೆಸಮ ಲೀಖ್ಯೋತೆ ಚಿಟ್ಟೀಮ ದೆಖಾಯುನಾತೋಬಿ ಘಣೇಥಿ ಲೀಖಾಪಟ್ ಕರವಾಳು ಪೌಲನೆ ಲೀಖಿರಾಖ್ಯೊಸ್ ಕರಿ ಮಾನಿಲೇಸ್. ಆ ಕಾರಣ್‍ಥಿ ಆ ಚಿಟ್ಟಿ ಯೊ ತಬರ್‌ಖಾಮ ಕೈಯೇಕ್ ಸಬೆನ ಫೈಲಾಯು ಉಷೆ. ಪೌಲನೆ ಆ ಚಿಟ್ಟಿ ಲಿಖಾನಿವಖ್ಹ್‌ತೆ ಇನೆ ಖ್ಹಾರ್ಕೊಟ್‌ಮ ಛೂ಼ ಕರಿ ಪೌಲ ಬೋಲಸ್3:1, 4:1, 6:20 ಪೌಲನೆ ಆ ಚಿಟ್ಟಿ ಎಫೆಸನಿ ಸಬೆನ ತುಕಿಕನ ಭೇಟಿ ಕರಾನಿ ವೇಳ್ಮ ತುಕಿಕನ ಹಾತ್ಮ ದಿಮೋಕ್‍ಲ್ಯೊ. 6:21-22 ಎಫೆಸ ಖ್ಹಯೇರ್ ಏಕ್‌ ಮೋಟು ಖ್ಹಯೇರ್ ಹುಯು ಯೋ ರೋಮ್ ಸಾಮ್ರಾಜ್ಯನು ಏಷ್ಯಾನ ಮೈಹಿನ ತಬರ್‌ಖಾನು ರಾಜಧಾನಿ ಹುಯಿರೂಥು ಎಫೆಸ ಖ್ಹಯೇರ್ ಗ್ರೀಕ್ ದೇವ್‍ಥಿ ಹುಯಿರ‍್ಹಿಥೀತೆ ಆರ್ತೆಮೀಸ್‍ನು ದೇವಸ್ಥಾನ್‍ಥಿ ಎಫೆಸ ಪ್ರಸಿದ್ ಹುಯಿರ‍್ಹುಥು. ಅಪೊ 19:23-31 ಎಫೆಸನಿ ಸಬೆ ಶುರುವಾತ್ ಹುಯುತದೆ ಯೊ ಘಟ್‍ರ‍್ಹೀನ್, ಕತೋಬಿ ಇನಪಾರ್ ಯೊ ಭಂದೈನ್ ಖ್ಹರ್ತಿಹುವಾನಿ ಟಪ್ಪೊಹುಯಿರುಥು ಪ್ರಕಾಶಿತ್ 2:1-7 ಪೌಲನಿ ಲೀಖಾವನಿ ಆಧಿ ಚಿಟ್ಟಿಮಾಸ್ ದೇವ್ನೆ ಇನ ಅದ್ಮಿವೋನ ಕಿಮ್ ಚೂ಼ಣಿಲಿದೊ ಅಜು಼ ಯೇಸು ಕ್ರಿಸ್ತಥಿ ಇವ್ಣಿ ಪಾಪ್‌ಥಿ ಇನೆ ಕಿಮ್ ಛೋ಼ಡಾಯೊ ಕರಿ ಬಾರೇಮ ಬೋಲಸ್. ಯೊ ಸಬೆ ಕ್ರಿಸ್ತನು ಶರೀರ್ ಅಜು಼ ಕ್ರಿಸ್ತ ಇನು ಮುಡ್‌ಕ್ಯು ಹುಯಿರೊಸ್, ಅಜು಼ ಕ್ರಿಸ್ತ ಘರ್‌ನೊ ಮುಖ್ಯ ಕೋಣಾನೊ ಬಂಡೊ ಕರಿ ಬೋಲಾನು ಪರಕ್‍ಥಿ ಬೋಲಸ್. ಆ ಚಿಟ್ಟಿನ ಬಿಜ಼ ಆಧಾಭಾಗ್ಮ ಪೌಲನೆ ಕ್ರಿಸ್ತನಿ ಜಿವ್ಣಾಮ ಅಪ್ಣೆ ಕಿಮ್ ಜಿವ್ಣು ಕರ್ನುಕರಿ ಖ್ಹೂಜ಼್ ದೇಸ್.
ಕಾಡಿದೇಖೊ
1. ಪೌಲನೆ ಇನಿ ಪರಿಚಯ್ ಕರ್ತೊಹುಯಿನ್ ಎಫೆಸವಾಳನ ಖ್ಹಲಾಮ್ ಕರಸ್.1:1-2
2. ಇನಕೇಡೆಥು ಯೋ ಕ್ರಿಸ್ತಮ ಸಬೆಅಖ್ಖಾನಿ ಸಂಭಂದಾನಿ ಬಾರೇಮ ಬೋಲಾಸ್. 1:3—3:21
3. ಇನ ಕೇಡೆಥು ಪೌಲನೆ ವಿಶ್ವಾಸಿ ಖ್ಹಾರು ಕಿಮ್ ಜಿವ್ಣು ಕರ‍್ನು ಕರಿ ಬಾರೇಮ ಲಿಖಸ್. 4:1—6:2೦
4. ಖ್ಹರ್ತಿಮ ಪೌಲ ಥೋಡಿ ಕಡ್‌ಶೀನು ಖ್ಹೂಜ಼್ ದೇಸ್. 6:21-24
1
1 ದೇವ್ನಿ ಗಳ್‌ಜೋ಼ಡ್ಮ ಕ್ರಿಸ್ತ ಯೇಸುಮ ಅಪೊಸ್ತಲ ಹುಯಿರ‍್ಹೋಸ್ತೆ ಪೌಲ, ಎಫೆಸಮ ಛೇತೆ ದೇವ್ನ ಅದ್ಮಿನಾಬಿ, ವಿಶ್ವಾಸ್‌ವಾಳನಾಬಿ ಲಿಖಾನು ಶಾತ್ಕತೊ,
2 ಅಪ್ಣೊ ಬಾ ಹುಯಿರ‍್ಹೋತೆ ದೇವ್‌ಥಿಬಿ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿಬಿ ಮಳಾದೆ.
ಕ್ರಿಸ್ತಮ ಛಾ಼ತೆ ಆತ್ಮೀಕ್ ಆಶೀರ್ವಾದ್‌ಖ್ಹಾರು
3 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ದೇವ್‌ಬಿ ಅಜು಼ ಬಾ ಹುಯಿರ‍್ಹೋತೆ ಇನ ಧನ್ಯವಾದ್ ಹುವಾದೆ, ಕ್ರಿಸ್ತನಿ ಗಳ್‌ಜೋ಼ಡ್ಮ ಇನೆ ಪರಲೋಕ್ಮ ಛಾ಼ತೆ ಹರೇಕ್ ಆತ್ಮೀಕ್ ಆಶೀರ್ವಾದ್‌ಖ್ಹಾರು ಅಪ್ಣುನ ದಿರಾಖ್ಯೊಸ್.
4 ಜಗತ್‌ ಉಬ್‌ಜಾ಼ತಿ ಪಹಿಲೇಸ್ ಅಪ್ಣೆ ಇನಖ್ಹಾಮ್ಣೆ ಪರಿಶುದ್ಧಬಿ ದೋಷ್‌ಕೊಂತೇಬಿ ಹುಯಿರ‍್ಹೇಣು ಕರಿ ದೇವ್ನೆ ಕ್ರಿಸ್ತನಿ ಗಳ್‌ಜೋ಼ಡ್ಮ ಅಪ್ಣುನ ಚೂ಼ಣಿಲಿದೊ. ಶನಕತೊ ಆ ಇನಿ ಪ್ಯಾರ್ ಹುಯಿರ‍್ಹಿಸ್.
5 ದೇವ್ ಫೈಲೆಥೊಸ್ ಯೇಸು ಕ್ರಿಸ್ತಥಿಸ್ ಅಪ್ಣುನ ಇನ ಲಡ್ಕಕರಿ ಬಣೈನ್ ಸ್ವೀಕಾರ್ ಕರಾನಖ್ಹಾಜೆ ಚೂ಼ಣಿಲಿದೊ. ಯೊ ಇನಿ ಖ್ಹೂಜ಼್ ಹುಯಿರ‍್ಹಿಥಿ ಇನಿ ಖ್ಹಯಾಲ್‍ಬಿ ಹುಯಿರ‍್ಹಿಥಿ.
6 ಅಜು಼ ಅಪ್ಣೆ ದೇವ್ನಿ ಮಹಿಮೆನಿ ವಾರ್‌ಖ್ಹಾನಖ್ಹಾಜೆ ಧನ್ಯವಾದ್ ಕರಿಯೆ. ಶನಕತೊ ಯೋ ಇನೊ ಪ್ಯಾರ‍್ನೊ ಛಿಯ್ಯಾನಖ್ಹಾಜೆ ಅಪ್ಣುನ ಫುಗಟ್ ವರದಾನ್ ದಿರಾಖ್ಯೊಸ್.
7 ಯೇಸು ಕ್ರಿಸ್ತನೆ ಅಪ್ಣಖ್ಹಾಜೆ ರಂಚ್ಯೊತೆ ಲ್ಹೋಯಿಥೀಸ್‍ ಛುಟ್ಕಾರ್‌ಹುಯು, ಕತೊ ದೇವ್ನಿ ಮಹಾ ವಾರ್‌ಖ್ಹೇಥಿಸ್ ಅಪ್ಣು ಪಾಪ್‌ಖ್ಹಾರು ಮಾಪಿ ಹುಯಿಗು.
8 ದೇವ್ನೆ ಇನಿ ಹರೇಕ್ ಗ್ಯಾನ್ ಅಜು಼ ಅಕ್ಕಲ್‍ಥಿ ಅಪ್ಣುನ ಯೊ ವಾರ್‌ಖ್ಹಾನ ಚೆಹೆಳ್‌ಥಿ ದಿರಾಖ್ಯೊಸ್.
9 ದೇವ್ ಇನೆ ಖ್ಹೂಜ಼್ ಕರ‍್ಯೊತೆ ಇನ ಕರ‍್ಯೊ, ಅಜು಼ ಕ್ರಿಸ್ತನ ಖ್ಹಾಜೇಥಿ ತದೇಸ್‌ ಪೂರಹುವನ ಖ್ಹಾಜೆ ತೀರ್ಮಾನ್ ಕರಿರಾಖ್ಯೊತೆ ಇನಿ ಗಪ್ಲತ್‌ನಿ ಖ್ಹೂಜ಼್‌ನ ಅಪ್ಣುನ ಮಾಲುಮ್‌ ಕರಾಯೊ.
10 ಆ ಖ್ಹೂಜ಼್‌ನ ಬರೊಬರ‍್ನಿ ವಖ್ಹತ್‌ಮ ಪೂರಕರಸ್‍. ಖ್ಹಾರಿ ಉಬ್‍ಜಾ಼ವ್ಣಿ ಧರ್ತಿಬಿ ಪರಲೋಕ್ಮ ಕ್ರಿಸ್ತನ ಮುಡ್‌ಕ್ಯು ಕರಿ ಬಣೈನ್ ಎಕ್ಟು ಕರ್ಶೆ.
11 ಖ್ಹಾರು ಕಾಮ್ ದೇವ್ನಿ ಮನ್ನಿ ತರಿಖಾಥಿ ಬಣೈಗಯು ಅಜು಼ ದೇವ್ ಅಪ್ಣುನ ಇನಿ ಶೊಂತ್ ಖ್ಹೂಜ಼್‌ನಿತರ ಪಹಿಲೇಸ್ ನೇಮಕ್‌ಹುಯಿರ‍್ಹಾತೆ ಅಪ್ಣುನ ಕ್ರಿಸ್ತನಿ ಘಳ್‍ಜೋಡ್ಮ ಇನ ಆದ್ಮಿ ಹುವಾನಖ್ಹಾಜೆ ಚೂ಼ಣಿಲಿದೊ.
12 ಅಮ್‌ರ‍್ಹವಾಪರ್ ಕ್ರಿಸ್ತನಖ್ಹಾಜೆ ಪಹಿಲೆ ವಿಶ್ವಾಸ್‌ನ ಹುಯಿರ‍್ಹಾತೆ ಅಪ್ಣೆ ಇನಿ ಮಹಿಮೆಮ ಧನ್ಯವಾದ್ ಕರಾವಾಳ ಹುಯಿರ‍್ಹೇವ್ಣು ಕರಿ ಅಮ್ ಕರ‍್ಯೊ!
13 ಸುವಾರ್ತೆನಿ ಖ್ಹಾಚಿ ಸಂದೇಶ್ನ ಖ್ಹಮ್‍ಜಾ಼ನಿ ವಖ್ಹ್‌ತೆ, ತುಮೇಬಿ ಜಿನು ದೇವ್ನ ಅದ್ಮಿ ಹುಯಿರ‍್ಹಾಥ. ಸುವಾರ್ತೆ ತುಮುನ ಛುಟ್ಕಾರ್ ದಿದು. ತುಮೆ ಕ್ರಿಸ್ತಮ ವಿಶ್ವಾಸ್ ಕರಿರಾಖ್ಯಾಸ್ ಅಜು಼ ದೇವ್ ಯೋ ವಾಗ್ದಾನ್ ಕರ‍್ಯೊತೆ ಪವಿತ್ರಾತ್ಮನ ತುಮುನ ದ್ಯಾವಥಿ ಇನೊ ಮುದ್ರೊನಾಖಿನ್ ಖ್ಹಣೇದ್ ಕರಿರಾಖ್ಯೋಸ್.
14 ದೇವ್ನೆ ಇನ ಶೊಂತ್ ಅದ್ಮಿನ ಛುಟ್ಕಾರ್ ಉಷೆಕರಿ ಬೋಲಾನ ಪವಿತ್ರಾತ್ಮಸ್ ಅಪ್ಣುನ ಖ್ಹಂಜ಼್‌ಕಾರ್‌ ಹುಯಿರ‍್ಹೊಸ್, ಅನಖ್ಹಾಜೆ ದೇವ್ನ ಮಹಿಮೆ ಕರಿಯೆ.
ಪೌಲನಿ ಪ್ರಾರ್ಥನೆ
15 ಅನಾಖ್ಹಾಜೆಥಿ ಕೆದೆ ಮೇ ಪ್ರಭು ಯೇಸುಮ ತುಮೆ ರಾಖಿರಾಖ್ಯತೆ ವಿಶ್ವಾಸ್ ಅಜು಼ ಖ್ಹಾರಸ್ ದೇವ್ನ ಅದ್ಮಿವ್‌ಪರ್ ತುಮೆ ದೆಖಾಡನಿ ಪ್ಯಾರ್‌ನಿ ಬಾರೇಮ ಖ್ಹಮ್‌ಜಿನ್‌,
16 ಮೆ ತುಮಾರಖ್ಹಾಜೆ ಮಾರಿ ಪ್ರಾರ್ಥನೆಮ ಬಿಂತಿಕರಾನಿ ವಖ್ಹ್‌ತೆ ದೇವ್ನ ಲಗತ್ತರ್ ಧನ್ಯವಾದ್ ಕರುಸ್.
17 ಅಪ್ಣೊ ಪ್ರಭು ಯೇಸು ಕ್ರಿಸ್ತನೊ ದೇವ್‌ಬಿ ಮಹಿಮೆನೊ ಬಾಬಿ ಇನಿ ಇನಿ ಬಾರೇಮ ಪೂರ ಅಕ್ಕಲ್‍ನ ತುಮುನ ದೀನ್ ದರ್ಶನಾನು ಆತ್ಮನ ದ್ಯವಾದೆಕರಿ ಪ್ರಾರ್ಥನೆ ಕರುಸ್.
18 ಮೇ ಬೋಲಿಲಾವನು ಶಾತ್ಕತೊ ತುಮಾರ ದಿಲ್ನ ಡೋಳಾನ ಉಜಾ಼ಖ್ಹ್‌ ಕರೀನ್, ಇನಿ ಬುಲಾವ್ಣಿನ ಭರೋಖ್ಹೊ ಕೆಥ್ರಾನು ಕರೀಬಿ ಅಜು಼ ದೇವ್ನ ಅದ್ಮಿವೋಮ ಛಾ಼ತೆ ಶೊತ್ನಿ ಮಹಿಮೆ ಕೆಥ್ರಾನು ಛಾ಼ ಕರಿ
19 ಅಜು಼ ವಿಶ್ವಾಸ್‌ಕರವಾಳ ಅಪ್ಣುನ ಇನಿ ತಾಖತ್ ಕೆತ್ರೆ ಊಚು಼ ಹುಯಿರ‍್ಹುಸ್, ಯೋ ಅಪ್ಣಾಮ ಕಾಮ್ ಕರಸ್. ಆ ಶಕತ್ ಅಪ್ಣಾಮ ಮೋಟಿ ಶಕತ್ನುಬಿ, ಕಾಮ್ ಕರಾನುಬಿ ಹುಯಿರ‍್ಹುಸ್.
20 ಇನಿ ಮಹಿಮೇನಿ ಶಕಥ್ಥಿಸ್ ಕ್ರಿಸ್ತನ ಮರಣ್‌ಥು ಉಠಾಡಿನ್, ಹರೇಕ್ ರಾಜ್ಯ, ಅಧಿಕಾರ್, ರಾಜ಼್‌ಭಾರ್ ಚ಼ಲಾವವಾಳನ ಸೊರ್ಗಾಮ ಇನ ಖ್ಹಾವಿಬಾಜು಼ಮ ಬೆಖ್ಹಾಡಿಲಿದೊ.
21 ಕ್ರಿಸ್ತನಿ ಅದಿಕಾರ್‌, ಶಕತ್ ಆ ಜಗತ್‌ಮಾಸ್ ಕಾಹೆತೆಸ್ ಅಗಾಡಿ ಆವ್‌ಶೇತೆ ಜಗತ್‌ಮ ಛಾ಼ತೆ ಖ್ಹಾರ ಜ಼ಣನ ಉಪ್ಪರ್‌ಬಿ ಅಖ್ಖನಾಮ್ನ ಉಪ್ಪರ್‌ಬಿ ಪರಲೋಕ್ಮ ಇನ ಇನು ಖಾವಿಬಾಜು಼ಮ ಬೆಖ್ಹಾಡಿಲಿದೊ.
22 ಅತ್ರೇಸ್ ಕಾಹೆತೆ ದೇವ್ನೆ ಅಖ್ಖಾಸ್ನ ಯೇಸು ಕ್ರಿಸ್ತನ ಗೋಡಾನ ಹೇಟ್‌ನಾಖ್ಯೊ, ಅಜು಼ ಸಬೆನ ಖ್ಹಾಜೆ ಯೋ ಅಖ್ಖಾನಪರ್ ಇನ ಮುಡ್‌ಕ್ಯು ಕರಿ ಬಣಾಯೊ.
23 ಸಬೆ ಕ್ರಿಸ್ತನು ಶರೀರ್ ಹುಯಿರ‍್ಹುಸ್, ಅಖ್ಖಾಸ್ನ ಅಖ್ಖಿ ತರಿಕಾಮಾಬಿ ದ್ಯವಾಳಥಿ ಯೊ ಭರ್‌ಪೂರ್‌ ಹುಯಿರ‍್ಹುಸ್.