ಪೌಲನು ಗಲಾತ್ಯದವರಿಗೆ ಬರೆದ ಪತ್ರಿಕೆ
ಪೌಲನೆ ಗಲಾತ್ಯವಾಳಾನ ಲೀಖ್ಯೋತೆ ಚಿಟ್ಟಿ
ಮಾಲುಮ್‌ಕರಾನು
ಅಪೊಸ್ತಲ ಹುಯಿರ‍್ಹೋತೆ ಪೌಲ ಗಲಾತ್ಯವಾಳಾನ ಚಿಟ್ಟಿ ಲೀಖಿರಾಖ್ಯೊಸ್ 1:1 ಆ ಚಿಟ್ಟಿನ ಪೌಲನೆ 48-57 ವರಖ್ಹ್‌ನ ಬೀಚ್ಮ ಗಲಾತ್ಯನಿ ಸಬೆನ ಲೀಖಿರಾಖ್ಯೊಸ್. ಗಲಾತ್ಯವಾಳು ಘಣೇಥಿ ರೋಮ್ ಸಾಮ್ರಾಜ್ಯನು ಗಲಾತ್ಯಕರಿ ಬೋಲೈಲ್ಯವಾನ ತಬರ್‌ಖಾಮ ಜಿವ್ಣು ಕರುಕರ್ತುಥು. ಪೌಲನೆ ಆ ಚಿಟ್ಟಿ ಲೀಖಾನಿವಖ್ಹ್‌ತೆ ಕಿಜ್ಜಾ಼ಥೂಕರಿ ಕರಿ ಬೋಲಾನು ಲಿಖಾಪಟ್‌ವಾಳನ ಬರೋಬರ್‌ ಮಾಲುಮ್ ಪಡ್ಯುಕೊಯ್ನಿ, ಕತೋಬಿ ಎಫೆಸ ಕೊರಿಂಥ ಆ ಭೇ ಖ್ಹಯೇರ್‌ಮ ಯೊ ಥೋಕರಿ ಬೋಲೈರ‍್ಹುಸ್.
ಪೌಲಾನಿ ಆಚಿಟ್ಟಿ ಗಲಾತ್ಯ ಸಭೆಮ ಛಾ಼ತೆ ಯೆಹೂದಿ ಅಜು಼ ಯೆಹೂದಿಕೊಂತೆ ವಿಶ್ವಾಸಿನ ಖ್ಹಾಜೆ ಆ ಚಿಟ್ಟಿ ಲೀಖಿರಾಖ್ಯೊಸ್. ವಿಶೇಷ್‌ಥಿ ಇನೆ ವಿಶ್ವಾಸಿಖ್ಹಾರು ಯೆಹೂದ್ಯರ್‌ನಿ ಜೂ಼ನಿ ಒಪ್ಪಂದಾನಿ ನಿಯಮ್ನ ಪಾಲನ್‍ ಕರ್ನುಕರಿ ಬಾರೇನು ಖ್ಹತ್ನಕರಾವನಿ ಬಾರೇಮ ಲೀಖಿರಾಖ್ಯೊಸ್. ಕ್ರಿಸ್ತ ವಿಶ್ವಾಸಿನ ಬೀಚ್ಮ ಯೆಹೂದ್ಯವಾಳಕರಿ ಬೋಲೈಲ್ಯವಾಳು ಥೋಡು ಅದ್ಮಿನು ಝೂ಼ಂಡ್‌ಥು. ಇವ್ಣುನ ಯೆಹೂದ್ಯಕಾಹೇತೆ ಕ್ರಿಸ್ತ ವಿಶ್ವಾಸಿಖ್ಹಾರು ಖ್ಹತ್ನ ಕರಾವ್ಣುಥು. ಇವ್ಣೆ ಪೌಲನಿ ಅಪೊಸ್ತಲಹುವಾನಿ ಅಧಿಕಾರ‍್ನಿ ಬಾರೇಮ ಸವಾಲ್‌ ಕರ‍್ಯು. ಪೌಲನೆ ಇನಿ ಜಿವ್ಣಾನಿ ಥೋಡಿ ಖೇಣಿನ ಬೋಲ್ತೊಹುಯಿನ್ ಅಪೊಸ್ತಲ್‌ಹುವಾನಿ ಬಾರೇಮ ಜ಼ವಾಬ್ ದೇಸ್. 1:11—2:14 ಅಜು಼ ಇನೆ ಸುವಾರ್ತೆ ಬೋಲ್ತೊಹುಯಿನ್ ಯೇಸು ಕ್ರಿಸ್ತನಪರ್‌ ರಾಖಾನಿ ವಿಶ್ವಾಸ್‌ಥೀಸ್ ಬಚೇಜಾ಼ಯ್‌ಕರಿ ಒಪ್ಪಿಕೆ ದಿದೊ 2:16 ಆಹೈರುತೆ ಅದ್ಮಿಥು ಹುಯಿರ‍್ಹುಕೊಯ್ನಿ. ದೇವ್ನಿ ಗೋರ್‌ನಿ ಪ್ರತಿಫಲ್ ಹುಯಿರ‍್ಹುಸ್‌ಕರಿ ದೆಖಾಡಸ್.
ಕಾಡಿದೇಖೊ
1. ಪೌಲನೆ ಗಲಾತ್ಯನು ಸಬೆನ ಖ್ಹಲಾಮ್ ಕರ್ತೊಹುಯಿನ್ ಚಿಟ್ಟಿನ ಶುರುಕರಸ್. 1:1-5 ಇನಪಾರ್ ಪೌಲನೆ ಇನು ಶಿಕಾಡನು ಹಕ್ನಿ ಬಾರೇಮ ವತಾಳನಖ್ಹಾಜೆ ಇನು ಶೊಂತ್ ಬಾರೇಮ ಇನ ಪೀಛೆ ಶಾತ್‌ ಕರ‍್ಯೊಥೋಕಿ ಇನ ಬೋಲಿವತಾಳಸ್.
2. ಅಜು಼ ಇನೆ ಧರ್ಮಶಾಸ್ತ್ರನಿ ಪರಕ್ಮ ಜಿವ್ಣುಕರಾನ ಕೋಶಿಶ್ ಕರ‍್ಯೊ. ಕತೋಬಿ ಯೊ ಫಾಯಿದಾನ ಕೊಆಯುನಿ ಕರಿ ವತಾಳಸ್‍. 1:6—2:21
3. ಇನಕೇಡೆಥು ಯೊ ಧರ್ಮಶಾಸ್ತ್ರನಿ ಬಾರೇಮ ಅಜು಼ ರಕ್ಷಣೇನು ವಾರ್ಖ್ಹಾನಿ ಬಾರೇಮ ಬೋಲಿವತಾಳಸ್. 3:1—4:31
4. ಇನಕೇಡೆಥು ಯೊ ಅಛ್ಛು಼ ಕ್ರಿಸ್ತನು ಜಿವ್ಣಮ ಜಿವ್ಣುಕರಾನಖ್ಹಾಜೆ ಥೋಡು ಅಛ್ಛಿ ವಾಟ್ನ ಬೋಲಿ ಓತಾಳಸ್‍. 5:1—6:10
5. ಪೌಲನೆ ಖ್ಹಲಾಮ್ ಬೋಲ್ತೊಹುಯಿನ್ ಅಜು಼ ಬಹರ್‌ಲಿ ನಿಯಮ್ ಕತೊ ಖ್ಹತ್ನ ಕರಾವನಿತರಾನು ಭಾರ್‌ಲಿ ನಿಯಮ್‌ಥೀಬಿ ದೇವ್‍ಥಿ ಏಕ್‌ ನವ ಅದ್ಮಿ ಕರೀನ್ ಬದಲಾವ್ಣಿ ಹುವಾಸ್ತೆ ಘಣು ಮಹಾನ್‌ಕರಿ ಖ್ಹಯಾಲ್ಮ ರಾಖೊ ಕರಿ ಬಿಂತಿ ಕರ್ತೊಹುಯಿನ್ ಆ ಚಿಟ್ಟಿನ ಖತಮ್ ಕರಸ್. 6:11-18
1
1 ಅದ್ಮಿಖ್ಹಾರಥಿ ರ‍್ಹವೊ ಅದ್ಮಿವ್‌ನ ಅದಿಕಾರ್‌ಥಿ ರ‍್ಹವೊ ಮೋಕ್ಲಾಯೊಕೊಂತೆ ಯೇಸು ಕ್ರಿಸ್ತಥಿಬಿ ಅಜು಼ ಇನ ಮರ‍್ಯಮಾಥು ಉಠಾಡ್ಯೊತೆ ಬಾ ದೇವ್‌ಥಿಬಿ ಅಪೊಸ್ತಲರ್‌ನಕರಿ ಬೋಲೈರ‍್ಹೋತೆ ಪೌಲಕರಿ ಮೇಬಿ,
2 ಅಜು಼ ಮಾರ ಜೋ಼ಡ್ಮ ಛಾ಼ತೆ ಅಖ್ಖಾಸ್ ವಿಶ್ವಾಸಿಯೇಬಿ ಗಲಾತ್ಯಮ ರ‍್ಹವಾನಿ ಸಬೇವ್‌ನ ಲಿಖಾನು ಶಾತ್‌ಕತೊ:
3 ಬಾ ದೇವ್‌ಥಿಬಿ ಅಪ್ಣೊ ಪ್ರಭು ಯೇಸು ಕ್ರಿಸ್ತಥಿಬಿ ತುಮುನ ವಾರ್‌ಖ್ಹೊಬಿ ಶಾಂತಿ ಮಳಾದೆ.
4 ಯೊ ಅಪ್ಣುನ ಹಮ್ಕೇನ ಖರಾಬ್ ಹಗಾಮ್‌ಥು ಛೋ಼ಡಾವ್ಣುಕರಿ ಅಪ್ಣೊ ಬಾ ಅಜು಼ ದೇವ್ನಿ ಖ್ಹೂಜ಼್‌ನಿ ಘೋಣಿ ಅಪ್ಣ ಪಾಪ್ನಖ್ಹಾಜೆ ಇನುಯೋಸ್ ಮರಣ್ಣ ದಿನಾಖ್ಯೊ.
5 ದೇವ್ನ ಜ಼ಗ್‌ಜ಼ಮಾನಮಾಬಿ ಮಹಿಮೆಹುವಾದೆ. ಆಮೆನ್.
ಎಕ್ಕಸ್ ಸುವಾರ್ತೆ
6 ಕ್ರಿಸ್ತನಿ ವಾರ್‌ಖ್ಹೇಥಿ ತುಮುನ ಬುಲಾಯ ಹುಯಾನ ಮ್ಹೇಲಿನ್ ಅತ್ರೆ ವಗ್ಗಿಸ್‌ಮ ಬಿಜೇಕ್ ಸುವಾರ್ತೆನ ತುಮೆ ಸ್ವಿಕಾರ್‌ಕರಾನು ದೇಖಿನ್ ಮನ ಆಶ್ಚರ್ಯ ಹುವಾಸ್.
7 ಬೋಲ್ನುಕತೊ ಸುವಾರ್ತೆ ಬಿಜು಼ ಕೊಯ್ನಿ ಕತೋಬಿ ಥೋಡುಜ಼ಣು ತುಮಾರಮ ಘುಂಜ್ಲಾ಼ವ್ಣಿಕರೀನ್ ಕ್ರಿಸ್ತನಿ ಸುವಾರ್ತೆನ ಬದ್ಲಾವನ ಕೋಶಿಶ್ ಕರುಕರಸ್.
8 ಕತೋಬಿ ಹಮೆ ತುಮುನ ಸುವಾರ್ತೆನ ಖ್ಹಮ್‍ಜಾ಼ಡ್ಯ. ಇನಖ್ಹಾಜೆ ಹಮೇಸ್ ರ‍್ಹವೊ, ಸೊರ್ಗಥೊ ಆಯೋತೆ ದೇವ್‌ನೊ ದೂತಾಸ್ ರ‍್ಹವೊ, ಬಿಜೇಕ್ ಸುವಾರ್ತೆನ ಬೋಲಿ ವತಾಳ್ಯುತೊ ಯೊ ಶಾಪ್‌ವಾಳೊ ಹುವಾದೆ.
9 ಮೆ ಪಹಿಲೆಸ್ ಬೋಲ್ಯೊತೆ ತಿಮ್ಮಸ್ ಹಮ್ಕೆಬಿ ಮೆ ಪಾಛು಼ ಬೋಲುಕರುಸ್. ತುಮೆ ಸ್ವೀಕಾರ್ ಕರ‍್ಯಾತೆ ಸುವಾರ್ತೆನ ವಿರೋದ್‌ಥಿ ಕೋಣ್‌ತೋಬಿ ಬೋಲಿವತಾಳ್ಯುತೊ ಯೊ ಶಾಪ್ ಲೀರಾಖವಾಳೊ ಹುಯಿರೊಸ್.
10 ಮೆ ಹಮ್ಕೆ ಖ್ಹಮ್‌ಜಾ಼ಡಿನ್ ಕಿನೊ ದಿಲ್‌ ಜೂತಾನ ಕೋಶಿಶ್ ಕರುಸ್? ಅದ್ಮಿನೋಕಿ? ದೇವ್ನೊಕಿ? ಮೆ ಅದ್ಮಿವ್‌ನ ಪಸಂದ್ ಕರಾವನ ಕೋಶಿಶ್ ಕರುಕರುಸ್ಕಿ? ಮೆ ಬಿಜೂ಼ಬಿ ಅದ್ಮಿವ್‌ನ ಪಸಂದ್ ಕರಾವನ ಕೋಶಿಶ್ ಕರ‍್ಯೊತೊ ಮೇ ಕ್ರಿಸ್ತನೊ ಸೇವಕ್ ಕಾಹೆ.
ಪೌಲ ಅಪೊಸ್ತಲ ಹುಯೋತೆ ಕಿಮ್
11 ಮೇ ಶಾತ್‌ ಬೋಲುಸ್‌ಕತೊ ಭೈಯೇ ಭೇನೆವೊ ಮೇ ಬೋಲಿವತಾಳ್ಯೋತೆ ಸುವಾರ್ತೆ ಖಲಿ ಅದ್ಮಿಥಿ ಆಯೂತೆ ಕಾಹೆಕರಿ ತುಮೆ ಮಾಲುಮ್‌ಕರಿಲೇವ್ಣು ಕರಿ ಮೇ ಆಖ್ಹ್‌ ಕರುಸ್.
12 ಮೇ ಇನ ಅದ್ಮಿಥಿ ಲಿದೊಕೊಯ್ನಿ, ಮನ ಕೋಣ್ ಭೋಧನ್‌ಬಿ ಕರ‍್ಯುಕೊಯ್ನಿ ಬದಲ್‍ಥಿ ಯೇಸು ಕ್ರಿಸ್ತಾಥೀಸ್ ಯೊ ಮನ ಬೋಲಿವತಾಳಯು.
13 ಅಗ್ಗಳ್ ಮೆ ಯೆಹೂದ್ಯರ್‌ಮ ಮಳಿರ‍್ಹೋಥೋತೆ ತದೆ ಮಾರಿ ಚಾ಼ಲ್ ಕಿಮ್ ಥೀ ಕರಿ ತುಮೆ ಖ್ಹಮ್‌ಜಿರಾಖ್ಯಾಥ. ಮೇ ದೇವ್ನಿ ಸಬೆನ ಗೋರ್‌ಕೊಂತೆ ನಾಶ್‌ಕರ್ತೊಥೊ.
14 ಆನಾಹುಯಿನ್ ಮಾರ ಗುರುಗುರಬ್‌ಲ್ಯನಿ ಪದತ್ತಿಮ ಖ್ಹಾರೇಥಿಬಿ ಮೇಸ್ ಜಾ಼ಖ್ಹತ್ ದಿಲ್‌ಲಗಾಡವಾಳೊ ಹುಯಿರ‍್ಹೋಥೊ. ಅಜು಼ ಮಾರಿ ಜೋ಼ಡ್ನ ಯೆಹೂದ್ಯರ್ ಉಂಬರ್‌ವಾಳಾಥಿಬಿ ಮೇಸ್ ಖ್ಹಾಮ್ಣೆ ರ‍್ಹೇತೊಥೊ.
15 ಕತೋಬಿ ದೇವ್ ಮೇ ಆಯಾನಿ ಪೇಟ್‌ಮ ರ‍್ಹವಾನಿವಖ್ಹ್‌ತೆಸ್ ಮಾರಿ ಬಾರೇಮ ವಿಶೇಷ್ ವಾರ್‌ಖ್ಹೇಥಿ ಚೂ಼ಣಿನ್, ಇನ ಛಿಯ್ಯಾನಸ್ ಪಸಂದ್ ಕರ‍್ಯೊ.
16 ಅಮ್ ಮೇ ಯೆಹೂದ್ಯರ್‌ಕಾಹೆತೆ ಅದ್ಮಿವ್‌ನ ಇನಿ ಛಿಯ್ಯಾನಿ ಬಾರೇಮ ಸುವಾರ್ತೆನ ಖ್ಹಮ್‌ಜಾ಼ಡ್ನುಕರಿ ದೇವ್ನಿ ಮರ್ಜಿ ಹುಯಿರ‍್ಹೀಥಿ. ಇನಖ್ಹಾಜೆ ದೇವ್ನೆ ಇನ ಛಿಯ್ಯಾನ ಮನ ವತಾಳ್ಯೊ. ಯೊ ಮನ ಬುಲಾವಖ್ಹತರ್ ಮೆ ಅದ್ಮಿಯೇವ್‌ನಿ ಖ್ಹೂಜ಼್‌ನ ಫುಛಾ಼ಯೊ ಕೊಯ್ನಿ.
17 ಯೆರೂಸಲೇಮ್ಮ ಮಾರೇಥಿಬಿ ಪಹಿಲೆ ಅಪೊಸ್ತಲರ್ ಹುಯಿರ‍್ಹುಥೂತೆ ಇವ್ಣಕನಾಬಿ ಕೊಗಯೊಂತೆ ಅರಬ್ ದೇಖ್ಹ್‌ನ ಜೈ಼ನ್ ಪಾಛು಼ ದಮಸ್ಕ ಖ್ಹಯೇರ್‌ಮ ಮೆ ಆಯೊ.
18 ತೀನ್ ವರಖ್ಹ್‌ನ ವಾರ್ ಕೇಫಥಿ ಮಳ್‌ಣುಕರಿ ಯೆರೂಸಲೇಮ್‌ ಗಯೊ. ಇನ ಜೋ಼ಡ್ಮ ಪಂಧ್ರ ದನ್‌ಲಗು ಥೊ.
19 ಕತೋಬಿ ಪ್ರಭುನೊ ಭೈಹುಯಿರ‍್ಹಾವಳೊ ಯಾಕೋಬ್ ಕಾಹೆತೆ ಅಪೊಸ್ತಲರ್‌ಮ ಬಿಜು಼ ಕಿನಾಬಿ ಕೊ ದೇಖ್ಯೋನಿ.
20 ಮೇ ತುಮುನ ಲೀಖುಕರುತೆ ವಾತೆಅಖ್ಖು ಝೂ಼ಟು ಕಾಹೆಕರಿ ದೇವ್ನಾಸ್ ಮಾಲುಮ್.
21 ಇನಕೇಡೆಥು ಸಿರಿಯ ಅಜು಼ ಕಿಲಿಕ್ಯ ದೇಖ್ಹ್‌ನ ತಬರ್‌ಖಾಮ ಗಯೊ.
22 ಕತೋಬಿ ಕ್ರಿಸ್ತಮಾನು ಯೂದಾಯನು ಸಬೆವಾಳು ಮನ ಬಿಜು಼ ಅಗ್ಗಳ್ ಕೆದೇಬಿ ಮಳಿರ‍್ಹುಥು ಕೊಯ್ನಿ.
23 ಕತೋಬಿ “ಇವ್ಣೆ ಪಹಿಲೇಸ್ ಏಕ್‌ಹಲ್ಲ ಖ್ಹತಾಪ್ಣಿ ದಿದೊಥೋತೆ ಕತೋಬಿ ಯೊ ನಾಶ್‌ ಕರ್ತೊಥೋತೆ ವಿಶ್ವಾಸ್‌ನಿ ಬಾರೇಮಸ್ ಹಮ್ಕೆ ಅದ್ಮಿಖ್ಹಾರನ ಬೋಲಿವತಾಳುಕರಾಸ್‌” ಕರಿ ಸಮಾಚಾರ‍್ನ ಇವ್ಣೆ ಖ್ಹಮ್‌ಜ್ಯು.
24 ಅಜು಼ ಮಾರಖ್ಹಾಜೆ ದೇವ್ನ ಮಹಿಮೆ ಕರ‍್ಯು.