13
ಖ್ಹರ್ತಿನು ಅಖ್ಖಿ ಝೇತಾವ್ಣಿ ಅಜು಼ ಖ್ಹಲಾಮ್
1 ಮೇ ತುಮಾರಕನ ಖ್ಹಲಾಮ್ ಕರಾನ ವಳ್ಯಾವ್‌ಸ್ತೆ ಆ ತೀನ್ನಿ ವಖ್ಹತ್. ಬೇ ತೀನ್ ಜ಼ಣ ಸಾಕ್ಷಿನ ಮ್ಹೋಡೆಥಿ ಹರೇಕ್ ವಾತ್‍ಬಿ ಬೋಲಾವ್ಣು ಕರಿ ಪವಿತ್ರ ದಪ್ತರ್‌ಮ ಲೀಖೈರ‍್ಹೂಸ್‍ನಿ.
2 ಮೇ ಬೇನಿ ವಖ್ಹತ್ ತುಮಾರಕನ ಆಯೋತದೆ, ಪಾಛೊ಼ಫರಿನ್ ಆಯೋತೊ ತುಮುನ ಖ್ಹತೈಶ್‍ಕೊಂತೆ ಮ್ಹೇಲಿಶ್‍ಕೊಯ್ನಿ ಕರಿ ಕಿಮ್ ಬೋಲ್ಯೊಕಿ ಇಮ್ಮಸ್ ಗಯೋತೆ ದನ್‌ಮಾನು ಪಾಪ್ನಕಾಮ್ನ ಚ಼ಲಾವವಾಳಾನಬಿ ಅಜು಼ ಖ್ಹಾರಾನಾಬಿ ಮೇ ಬೋಲುಸ್.
3 ಕ್ರಿಸ್ತ ಮಾರಾಮ ರ‍್ಹೀನ್ ವಾತ್‍ಬೋಲಸ್‍ಕರಿ, ತುಮುನ ಹೋಣುತೆ ಸಾಕ್ಷಿನ ಢೂಂಢಾಥಿ ಯೋ ತುಮಾರಿ ಬಾರೇಮ ಕಮ್‍ಜೋ಼ರಿ ರ‍್ಹಯೋತೊಬಿ ತುಮಾರಮ ಶಕತ್‌ವಾಳೊ ಹುಯಿರ‍್ಹೊಸ್.
4 ಕ್ರಿಸ್ತ ಕಮ್‍ಜೋ಼ರಿಮ ಶಿಲ್‌ಬೇಪರ್ ಟಂಗೈಘೊ ಖ್ಹಾಚಿಸ್. ಕತೋಬಿ ಯೋ ದೇವ್ನಿ ತಾಖಥೀಸ್ ಬಚಾ಼ವಾಳೊ ಹುಯಿರ‍್ಹೊಸ್. ಹಮೇಬಿ ಇನೀನಿತರಸ್ ಕಮ್‌ಜೋ಼ರಿವಾಳ ಹುಯಿರ‍್ಹಾಸ್. ಕತೋಬಿ ಇನಿಜೋ಼ಡ್ಮ ದೇವ್ನಿ ಶಕಥ್ಥಿ ಜಿವವಾಳ ಹುಯಿನ್ ತುಮಾರಿ ಶಕಥ್ಥಿ ಜಿವಿಯೇಸ್.
5 ತುಮೆ ವಿಶ್ವಾಸ್‌ಮ ಛಾ಼ಕಿ ಕೊಯ್ನಿಕಿ ಕರಿ ತುಮಾರು ತುಮೇಸ್ ತರೀಪ್‌ಶ ಕರಿಲೆವೊ. ಕ್ರಿಸ್ತ ಯೇಸು ತುಮಾರಮ ಛಾ಼ಕರಿ ತುಮುನ ಮಾಲುಮ್‌ಛಾ಼: ಯೋ ತುಮಾರಮ ನಾರ‍್ಹಯೋತೊ ತುಮೆ ನಾಲಾಯಕ್‌ ಹುಯಿರ‍್ಹಾಸ್.
6 ಕತೋಬಿ ಹಮೆ ನಾಲಾಯಕ್‌ ಕಾಹೆ ಕರಿ ತುಮುನ ಮಾಲುಮ್‌ಪಡ್‍ಶೇಸ್ ಪಡ್‌ಶೆ ಕರಿ ಹಮೂನ ಭರೋಖ್ಹೊ ಛಾ಼.
7 ತುಮೆ ಖಿವೂಬಿ ಖರಾಬ್ ನಾಕರ‍್ನು ಕರಿ ಹಮೆ ದೇವ್ನ ಪ್ರಾರ್ಥನೆ ಕರಿಯೇಸ್. ಅನಾಮ ಹಮೇಸ್ ಯೋಗ್ಯ ಕರಿ ದೆಖಾವ್ಣು ಕರಿ ಹಮಾರಿ ಖ್ಹಯಾಲ್ ಕಾಹೆ. ಹಮೆ ನಾಲಾಯಕ್‌ ಹುಯಿನ್ ದೆಖಾಯಾತೋಬಿ ತುಮೆ ಅಛ್ಛು಼ಸ್ ಕರ್ನುಕರಿ ಹಮಾರಿ ಖ್ಹಯಾಲ್.
8 ಖ್ಹಾಚ಼ನ ವಿರೋದ್‌ ಹಮೆ ಶಾತ್ಬಿ ಕರಾನ ಕೊಹೊಯ್ನಿ. ಖ್ಹಾಚಾ಼ಭಣಿಥೂಸ್ ಅಖ್ಖು ಕರ್ಶು.
9 ಹಮೆ ಕಮ್‍ಜೋ಼ರಿ ರ‍್ಹಯಾತೋಬಿ ತುಮೆ ತಾಖತ್‌ವಾಳ ಹುಯಿರ‍್ಹಾತೊ ಹಮೆ ಖ್ಹುಶಿಕರ್‌ಶು. ಆ ನಾಹುಯಿನ್ ತುಮೆ ಪೂರಪರಕ್‍ಥಿ ಬರೋಬರ್ ರ‍್ಹೇವ್ಣುಕರಿ ಪ್ರಾರ್ಥನೆ ಕರಿಯೇಸ್.
10 ಅನಾಖ್ಹಾಜೇಸ್ ಮೇ ತುಮಾರಕನಕೊಂತೆ ವಖ್ಹತ್ ಆ ವಾತೆಖ್ಹಾರಿ ಲೀಖುಕರುಸ್. ತುಮುನ ರಡ್‍ಕೈನಾಖಾನ ಕಾಹೆ. ಭಾಂದಾನಖ್ಹಾಜೆ ಪ್ರಭು ಮನ ದೀರಾಖ್ಯೋತೆ ಅದಿಕಾರ್‌ಥಿ ತುಮೆ ಕಠಣ್‍ನ ವತಾಳನ ವಖ್ಹತ್‌ನ ರ‍್ಹೇವ್ಣುಕರಿ ಆಖ್ಹ್‌ಕರುಸ್.
11 ಖ್ಹರ್ತಿನಿ ವಾತೆ ಶಾತ್‍ಕತೊ ಭೈಯೇ ಭೇನೆವೊ ಖ್ಹುಶಿಕರೊ, ತುಮುನ ಬರೋಬರ್ ಕರಿಲೆವೊ; ಭಾಲಿವಾಳ ಹುಯಿ‍ರ‍್ಹೆವೊ, ಎಕ್ಕಸ್ ದಿಲ್‌ವಾಳ ಹುಯಿರ‍್ಹೇವೊ, ಸಮಾಧಾನ್‌ಥಿ ರ‍್ಹವೊ; ಪ್ಯಾರ್‌ನಾಬಿ ಶಾಂತಿಬಿ ದ್ಯವಾಳೊ ದೇವ್ ತುಮಾರಿ ಜೋ಼ಡ್ಮ ರ‍್ಹಿಶೆ.
12 ಪವಿತ್ರಥಿ ಏಕ್‌ಥಿಏಕ್ ಹಾತ್‍ಮಳೈನ್ ಖ್ಹಲಾಮ್ ಕರೊ.
13 ಪ್ರಭು ಯೇಸುಕ್ರಿಸ್ತನಿ ವಾರ್‌ಖ್ಹೇಥಿಬಿ, ದೇವ್ನ ಪ್ಯಾರ್‌ಬಿ ಅಜು಼ ದೇವ್ನುಆತ್ಮಥಿ ಮಳಿನ್ ರ‍್ಹವಾಳಖ್ಹಾರು ತುಮುನ ಖ್ಹಲಾಮ್ ಬೋಲ್‌ಶೆ.
14 ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತನಿ ಕೃಪೆಬಿ ದೇವ್ನಿ ಪ್ಯಾರ್‌ಬಿ, ಪವಿತ್ರಾತ್ಮನಿ ಲಾಡ್‌ಬಿ ತುಮಾರ ಖ್ಹಾರಾಸ್‍ನಿ ಜೋ಼ಡ್ಮ ರ‍್ಹವಾದೆ.